បណ្តាប្រទេសអឺរ៉ុបចាប់ផ្តើមដកចេញវិធានការបិទខ្ទប់មនុស្សក្នុងផ្ទះ
ទ្វីបអឺរ៉ុបដែលរងប៉ះពាល់ខ្លាំងជាងគេដោយសារជំងឺកូវីដ១៩ ចាប់ផ្តើមដកចេញ វិធានការបិទខ្ទប់ប្រជាជន ចាប់ពីថ្ងៃចន្ទទី ៤ ឧសភា។ នៅក្នុងបណ្តាប្រទេសអឺរ៉ុបជាច្រើន រដ្ឋាភិបាលបានសម្រេចដកចេញ បម្រាម បើទោះបីជាមានការបារម្ភខ្លាចរលកទី២ នៃការរាតត្បាតរបស់ជំងឺកូវីដ១៩។ នៅអេស្ប៉ាញ កាលពីថ្ងៃសៅរ៍ ប្រជាជនត្រូវបានអនុញ្ញាតឲ្យចេញទៅហាត់ប្រាណ នៅក្រៅផ្ទះ ជាលើកទី១ ចាប់តាំងពីមានវិធានការ ដាក់ក្រុងមនុស្ស នៅក្នុងផ្ទះ កាលពីពាក់កណ្តាលខែមីនាមក។
ចុះផ្សាយនៅថ្ងៃ៖
ស្តាប់ - ០២:១៣
ចាប់ពីថ្ងៃចន្ទទី៤ឧសភា ហាងទំនិញតូចៗ ហាងកាត់សក់ បារ និងភោជនីយដ្ឋានត្រូវអនុញ្ញាតឲ្យបើកទ្វារឡើងវិញ នៅអេស្ប៉ាញ ប៉ុន្តែ ជាមួយនឹងការរឹតត្បិតសេវា និងការរក្សារគម្លាតសង្គម ដើម្បីជៀសវាងការឆ្លងកូរ៉ូណាវីរុស។ ចំណែកការពាក់ម៉ាសវិញ ត្រូវធ្វើជាចាំបាច់ នៅក្នុងពេលប្រើប្រាស់មធ្យោបាយដឹកជញ្ជូនសាធារណៈ។ អេស្ប៉ាញ ជាប្រទេសអឺរ៉ុបទី៣ បន្ទាប់ពីអ៊ីតាលី និងអង់គ្លេស ដែលប៉ះពាល់ខ្លាំងជាងគេ ដោយសារកូវីដ១៩ ជាមួយនឹងអ្នកស្លាប់ ដោយសារកូវីដ១៩ ចំនួន២៥១០០នាក់។
ប៉ុន្តែ អេស្ប៉ាញ ដែលកត់សំគាល់ឃើញ ចំនួនអ្នកស្លាប់ដោយកូវីដ១៩ ធ្លាក់ចុះ ជាបន្តបន្ទាប់ រហូតមកនៅត្រឹម ១៦៤នាក់ ក្នុងមួយថ្ងៃអាទិត្យ ម្សិលមិញ បានសម្រេចបន្ធូរបន្ថយ (ពីពេលនេះ រហូតដល់ខែមិថុនា) វិធានការ បិទខ្ទប់ប្រជាជន បន្ទាប់ពីអនុវត្តជិត២ខែ ដោយសារជំងឺរាតត្បាតកូវីដ១៩។
អាល្លឺម៉ង់បានដើរចេញពីវិធានការបិទខ្ទប់ប្រជាជន នៅមុនអេស្ប៉ាញទៅទៀត។ នៅថ្ងៃចន្ទ អាល្លឺម៉ង់គ្រោងនឹងបើកសាលារៀន នៅតាមតំបន់មួយចំនួន។ នៅអូទ្រីស ក៏ដូចជាបណ្តាប្រទេសស្កង់ឌីណាវ ហាងទំនិញ បានចាប់បើកទ្វារ តាំងពីថ្ងៃសៅរ៍។ នៅអឺរ៉ុបខាងកើត ហាងកាហ្វេ និងភោជនីយដ្ឋាននឹងបើកទ្វារ ចាប់ពីថ្ងៃចន្ទ នៅប្រទេសស្លូវេនី និងហុងគ្រី ប៉ុន្តែលើកលែង រដ្ឋធានី ប៊ុយដាប៉េស។ នៅប៉ូឡូញ សណ្ឋាគារ ហាងទំនិញទំនើប បណ្ណាល័យ និងសារមន្ទីរ នឹងចាប់បើកទ្វារ ជាធម្មតាឡើងវិញ ចាប់ពីថ្ងៃចន្ទ។
នៅពេលបណ្តាប្រទេសអឺរ៉ុបកាន់តែច្រើនចាប់ផ្តើមដើរចេញពីវិធានការបិទខ្ទប់ប្រជាជន បារាំង និងអ៊ីតាលី ដែលរងគ្រោះខ្លាំងដោយសារកូវីដ១៩ កំពុងត្រៀមខ្លួនធ្វើនឹងគេដែរ ប៉ុន្តែមិនគំហុកនោះទេ។ បារាំង ដែលត្រៀមដើរចេញពីវិធានការបិទខ្ទប់ប្រជាជន នៅថ្ងៃទី ១១ឧសភាខាងមុខ បានចាត់វិធានការបន្ធូរបន្ថយមួយចំនួន ដូចជាបើកសួនច្បារ អនុញ្ញាតឲ្យធ្វើដំណើរទៅសួរសុខទុក្ខគ្រួសារ ឬការជួបជុំក្នុងចំនួនមនុស្សមានកំរិត។ នៅបារាំង រដ្ឋមន្រ្តីសុខាភិបាល ព្រមានលើកថ្ងៃ បើកទីក្រុង បើសិន វិបត្តិកូវីដ ត្រលប់ទៅអាក្រក់ដូចដើម។ នៅសប្តាហ៍នេះ រដ្ឋាភិបាលបារាំងទើបសម្រេចផងដែរ ពន្យារ ច្បាប់ដាក់ប្រទេសក្នុងស្ថានភាពអាសន្នផ្នែកសុខាភិបាល ២ខែទៀត ពោលគឺរហូតដល់ចុងខែកក្កដាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ