បារាំង៖សមាជពលរដ្ឋដើម្បីអាកាសធាតុ ស្នើប្រជាមតិ បញ្ចូលសញ្ញាណការពារប្រព័ន្ធជីវចម្រុះទៅក្នុងរដ្ឋធម្មនុញ្ញ
សមាជពលរដ្ឋបារាំងដើម្បីអាកាសធាតុ បានធ្វើសេចក្តីសន្និដ្ឋានរួម និងបានផ្ញើសំណើរបស់ខ្លួនទៅកាន់រដ្ឋាភិបាលបារាំង កាលពីថ្ងៃអាទិត្យទី២១មិថុនា។ នៅក្នុងសំណើរនោះ មានជាអាទិ៍ ការស្នើឲ្យមានការបោះឆ្នោតប្រជាមតិ ដើម្បីចាត់បញ្ចូលសញ្ញាណនៃការប្រយុទ្ធប្រឆាំង នឹងការកើនឡើងនូវកំដៅផែនដៅ ទៅក្នុងរដ្ឋធម្មនុញ្ញបារាំង ព្រមទាំងការបង្កើតឲ្យមានទោសព្រហ្មទណ្ឌទាក់ទិនទង្វើបំផ្លាញប្រព័ន្ធជីវចម្រុះ។ សូមបញ្ជាក់ថា សមាជពលរដ្ឋបារាំងនេះ មានសមាជិកចំនួន១៥០នាក់ ដែលត្រូវបានបង្កើតឡើង ក្រោមការផ្តួចផ្តើមរបស់លោកម៉ាក្រុង ដើម្បីឆ្លើយតបទៅនឹងវិវាទក្នុងសង្គម ទាក់ទិននឹងបញ្ហាអាកាសធាតុ បរិស្ថាន។
ចុះផ្សាយនៅថ្ងៃ៖
ស្តាប់ - ០២:៣០
ឆ្លងកាត់៩ខែនៃការជជែកដោះដូរយោបល់គ្នា រវាងសមាជិក១៥០នាក់ ជាប្រជាពលរដ្ឋសាមញ្ញ តំណាងមកពីគ្រប់មជ្ឈដ្ឋានសង្គម សាមជពលរដ្ឋដើម្បីអាកាសធាតុ បានបិទបញ្ចប់ការងារ និងបានធ្វើសំណើររួមមួយទៅកាន់រដ្ឋាភិបាលបារាំង។ លោកស្រី Elisabeth Borne រដ្ឋមន្ត្រីទទួលបន្ទុកអន្តរកម្មអេកូឡូស៊ី និងសាមគ្គី ដែលជាអ្នកទទួលសំណើនេះ នៅរសៀលថ្ងៃអាទិត្យទី២១មិថុនា។
ចំណុចសំខាន់បំផុតនៅក្នុងសំណើនេះ គឺការសុំឲ្យមានការបោះឆ្នោត ធ្វើប្រជាមតិទូទាំងប្រទេស ដើម្បីបញ្ចូលសញ្ញាណនៃការប្រយុទ្ធប្រឆាំង នឹងការកើនឡើងនូវកំដៅផែនដៅ ទៅក្នុងរដ្ឋធម្មនុញ្ញបារាំង ព្រមទាំងបង្កើតទោសព្រហ្មទណ្ឌពិសេសមួយ ផ្តន្ទាទោសទង្វើបំផ្លិចបំផ្លាចប្រព័ន្ធជីវចម្រុះ (Ecocide)។
ក្រៅពីនេះ សមាជពលរដ្ឋដើម្បីអាកាសធាតុ បានធ្វើបញ្ជីរាយនូវសំណើរជាច្រើនផ្សេងទៀត ក្នុងគោលដៅកាត់បន្ថយការខ្ជះខ្ជាយថាមពល និងកាត់បន្ថយការបញ្ចេញឧស្ម័នកាបូនិក រៀបចំសង្គមដែលផ្តោតការយកចិត្តទុកដាក់ជាអាទិភាព ទៅលើបញ្ហាបរិស្ថាន អាកាសធាតុ និងប្រព័ន្ធជីវចម្រុះ។ សំណើទាំងអស់នេះ សមាជពលរដ្ឋបានរុញទំលាក់ទៅឲ្យរដ្ឋាភិបាល ជាអ្នកទទួលបន្ទុក រៀបចំវិធានការអនុវត្តភ្លាមៗ។
សំណើទាំងនោះ មានជាអាទិ៍ ទាក់ទិននឹងការជំរុញឲ្យប្រជាពលរដ្ឋ បោះបង់ចោល នូវធម្យោបាយធ្វើដំណើរ ដែលប្រើរថយន្តដែលបញ្ចេញឧស្ម័នពុលខ្លាំង ហើយងាកមកប្រើមធ្យោបាយធ្វើដំណើររួម ឬយានជំនិះដែលមិនបញ្ចេញឧស្ម័នពុល។ សមាជពលរដ្ឋ ក៏បានស្នើផងដែរ នូវការហាមឃាត់ការផ្សាយពាណិជ្ជកម្ម នូវមុខទំនិញមួយចំនួនដែលជះផលអវិជ្ជមាន មកលើបរិស្ថានធម្មជាតិ និងសុខភាពរបស់ប្រជាពលរដ្ឋ។
លោក Cyril Dion អ្នកដឹកនាំរឿង និងជាសកម្មជនបរិស្ថានម្នាក់ដ៏ល្បី ដែលឈរឈ្មោះតំណាងឲ្យសមាជពលរដ្ឋដើម្បីអាកាសធាតុនេះ បានលើកឡើងថា សំណើទាំងអស់ដែលសាមជិកបានបោះឆ្នោត គឺជាសំណើដែលពោរពេញដោយសេចក្តីក្លាហាន។ លោកបន្តថា ពេលនេះ ប្រជាជនបានបោះបាល់ទៅឲ្យរដ្ឋាភិបាលហើយ ដូច្នេះ វាគឺជាតួនាទីរបស់រដ្ឋាភិបាល ដែលត្រូវសម្រេចថាលេងបន្ត ឬយ៉ាងណា។
អង្គការ Greenpeace បានថ្លែងអបអរ ចំពោះសំណើរដែលសម្រេចបានដោយសមាជពលរដ្ឋបារាំងនេះ។ តំណាងអង្គការនេះលើកឡើងថា នេះគឺជាការបោះជំហានមួយដ៏សំខាន់ ដើម្បីឈានទៅផ្លាស់ប្តូរផ្នត់គំនិតរបស់មនុស្សក្នុងសង្គម ហើយរដ្ឋាភិបាល ត្រូវតែឆ្លើយតប តាមរយៈវិធានការជាក់ស្តែង មិនមែនគ្រាន់តែ ជាវិធានការជានិម្មិតរូប ធ្វើយកតែនាមនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ