អង់គេ្លសបើកយុទ្ធនាការធំមួយដើម្បីប្រយុទ្ធប្រឆាំងនឹងជំងឺធាត់ជ្រុល
រដ្ឋាភិបាលអង់គ្លេស នៅថ្ងៃចន្ទនេះ បានប្រកាស ផែនការដ៏ធំមួយ ដើម្បីប្រយុទ្ធប្រឆាំងជំងឺធាត់ជ្រុល។ រដ្ឋាភិបាលបើកយុទ្ធនាការប្រយុទ្ធប្រឆាំងជំងឺធាត់ជ្រុល បន្ទាប់ពីការសិក្សារបស់ទីភ្នាក់ងារសុខភាពសាធារណៈ អង់គ្លេស ចេញផ្សាយ កាលពីថ្ងៃសៅរ៍កន្លងទៅបង្ហាញថា ជំងឺធាត់ជ្រុល ចូលរួមចំណែក សំខាន់ធ្វើឲ្យស្ថានភាពអ្នកជំងឺកូវីដ កាន់តែធ្លាក់ធ្ងន់ធ្ងរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
ហាមមិនឲ្យមានការផ្សាយពាណិជ្ជកម្ម របបចំណីអាហារមិនត្រឹមត្រូវ។ ភោជនីយដ្ឋាន និងក្រុមហ៊ុនផលិតចំណីអាហារត្រូវលម្អិត បញ្ជាក់ពីចំនួនកាឡូរី នៅក្នុងអាហារ ឬសំបុត្រពេទ្យ សម្រាប់ធាក់កង់ ធ្វើកីឡា។ ទាំងនេះ ជាវិធានការដែលរដ្ឋាភិបាលអង់គ្លេស បានប្រកាស នៅថ្ងៃនេះ នៅក្នុងគោលដៅ ប្រយុទ្ធប្រឆាំងនឹងជំងឺធាត់ជ្រុលចុកខ្លាញ់។
តាមរដ្ឋមន្រ្តីសុខាភិបាលអង់គ្លេស លោក Matt Hancock ជំងឺធាត់ជ្រុលជាកត្តាជំរុញឲ្យស្ថានភាពរបស់អ្នកជំងឺកាន់តែធ្លាក់ធ្ងន់ធ្ងរ និងអាចស្លាប់ដោយសារកូរ៉ូណាវីរុស។ ដូច្នេះ វាមានសារៈសំខាន់ណាស់ដែលរដ្ឋាភិបាលត្រូវចាត់វិធានការដើម្បី កែលម្អសុខភាពប្រជាជន និងដើម្បី ការពារ សេវាសុខភាពសាធារណៈរបស់អង់គ្លេស។
នៅក្នុងចំណោមវិធានការប្រយុទ្ធប្រឆាំងនឹងជំងឺធាត់ជ្រុល មានផងដែរ ការហាមផ្សាយពាណិជ្ជកម្ម រាល់ចំណីអាហារ មិនល្អសម្រាប់សុខភាព នៅតាមទូរទស្សន៍ ឬអ៊ីនធ័រនែត នៅមុនម៉ោង ៩យប់ ម៉ោងដែលកុមារ អាចអង្គុយមុខកញ្ចក់ទូរទស្សន៍។ រដ្ឋាភិបាលនឹងហាមផងដែរ មិនឲ្យហាង ផ្សារលក់ទំនិញ លក់បញ្ចុះតម្លៃ ឬតាំងបង្ហាញផលិតផល ចំណីអាហារ ដែលមិនល្អ សម្រាប់សុខភាព នៅតាមកន្លែងដ៏ទាក់ទាញ សម្រាប់អតិថិជន ដូចជានៅច្រកចេញ ក្បែរកន្លែងគិតលុយជាដើម។ គោលដៅរបស់រដ្ឋាភិបាល គឺកាត់បន្ថយ ជំងឺធាត់ជ្រុល ចុកខ្លាញ់ ដែលបណ្តាលមកពីការបរិភោគអាហារមិនត្រឹមត្រូវ ដែលមានជាតិផ្អែមច្រើន ខ្លាញ់ច្រើន និងសាច់ច្រើន។
ក្រៅតែពីកែលម្អរបបអាហាររបស់ប្រជាជនអង់គ្លេស រដ្ឋាភិបាលផ្តោតសំខាន់ផងដែរ លើការហាត់ប្រាណ ដើម្បីបញ្ចុះទម្ងន់ ដូចជា គ្រូពេទ្យ អំណើះតទៅ នឹងអាចចេញវេជ្ជបញ្ជាឲ្យអ្នកជំងឺហាត់ប្រាណ ដូចជាធាក់កង់ ជាដើម។
សូមបញ្ជាក់ថា នៅអង់គ្លេស មនុស្សជិត ២ភាគ៣ (៦៣%)មានទម្ងន់លើសគីឡូ ដែលគេចាត់ទុកថា មានសុខភាពល្អ។ នៅក្នុងចំណោមនោះ មាន៣៦%ជាអ្នកដែលធាត់លើសគីឡូ និងសល់ពីនោះ គឺ ធាត់ជ្រុលចុកខ្លាញ់។
រដ្ឋាភិបាលអង់គ្លេសមិនបានបញ្ជាក់ចំនួនថវិកាដែលត្រូវចំណាយសម្រាប់ផែនការប្រយុទ្ធប្រឆាំងនឹងជំងឺធាត់ជ្រុល នោះទេ។ ប៉ុន្តែ កាសែត អង់គ្លេស Guardian បានចុះផ្សាយថា វិធានការរបស់រដ្ឋាភិបាល មានតម្លៃ ប្រមាណ ១១លានអឺរ៉ូ។
រដ្ឋាភិបាលអង់គ្លេសប្រកាសផែនការប្រយុទ្ធប្រឆាំងនឹងជំងឺធាត់ជ្រុល ចុកខ្លាញ់ នៅពេលនេះ គឺនៅបន្ទាប់ពីការសិក្សារបស់ ទីភ្នាក់ងារសុខភាព អង់គ្លេស កាលពីថ្ងៃសៅរ៍បង្ហាញថា ជំងឺធាត់ជ្រុល ចុកខ្លាញ់ ជាកត្តាធ្វើឲ្យស្ថានភាពអ្នកជំងឺកូវីដ កាន់តែធ្លាក់ធ្ងន់ធ្ងរ។ សម្រាប់នាយករដ្ឋមន្រ្តី អង់គ្លេស លោកបូរីស ចនសុន ផែនការរបស់រដ្ឋាភិបាលនឹងជួយកាត់បន្ថយ ការប្រឈមនឹងជំងឺ និងអាចជួយឲ្យគេការពារខ្លួន ពីជំងឺកំណាច កូវីដ។ នាយករដ្ឋមន្រ្តីអង់គ្លេស ដឹងរឿងនេះច្បាស់ណាស់ ព្រោះថា លោកធ្លាប់កើតជំងឺកូវីដ កាលពីប៉ុន្មានខែមុននេះ។ តាមគ្រូពេទ្យអង់គ្លេស ដោយសារតែលោកចនសុន ធាត់ មានទម្ងន់ហួសកំណត់ ស្ថានភាពជំងឺរបស់លោក ធ្លាក់ធ្ងន់ធ្ងរ ម្តងម្តាល នៅពេលលោកចូលសម្រាកព្យាបាលនៅមន្ទីរពេទ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ