ប្រធានាធិបតីបេឡារុស ថាមិនព្រមចុះចេញពីតំណែងទៅតាមសម្រែកទាមទាររបស់ក្រុមប្រឆាំង
ប្រធានាធិបតីបេឡារុសលោក អាឡិចសង់ លូកាស្ហិនកូ (Alexander Lukashenko) បានប្តេជ្ញានៅក្តោបក្តាប់តំណែងជាមេដឹកនាំប្រទេស និងបានច្រានចោលនូវការអំពាវនាវឲ្យលោកចុះចេញពីអំណាច នៅក្នុងសុន្ទរកថាទៅកាន់អ្នកគាំទ្រ នាថ្ងៃអាទិត្យ ទី១៦ សីហា។ ការប្រកាសរបស់លោក លូកាសិនកូនេះ ធ្វើឡើងគាប់ជួនដែលក្រុមអ្នកប្រឆាំងរាប់ម៉ឺននាក់បានទៅប្រមូលផ្តុំគ្នាដែរនៅទីក្រុងមីនស្កិ៍ ដើម្បីធ្វើបាតុកម្មដ៏ធំប្រឆាំងទៅនឹងលទ្ធផលនៃការបោះឆ្នោតប្រធានាធិបតី ដែលថាលោក លូកាសិនកូ បានឈ្នះភ្លូកទឹកភ្លូកដី។
ចុះផ្សាយនៅថ្ងៃ៖
ស្តាប់ - ០២:១២
បុរសខ្លាំងបេឡារុស លោក អាឡិចសង់ លូកាស្ហិនកូ ដែលបានឡើងគ្រប់គ្រងប្រទេសរយៈពេល ២៦ ឆ្នាំមកហើយនោះ កំពុងតែប្រឈមទៅនឹងបាតុកម្មប្រឆាំងកាន់តែធំមិនធ្លាប់មានពីមុនមកចំពោះបែបផែនដឹកនាំផ្តាច់ការរបស់លោក។
នៅក្នុងពេលជួបជាមួយអ្នកគាំទ្រនៅកណ្តាលទីក្រុងមីនស្កិ៍ (Minsk) នាថ្ងៃអាទិត្យ លោក លូកាស្ហិនកូ បានប្រៀបប្រដូចក្រុមអ្នកប្រឆាំង ថាមិនខុសអីពីសត្វ "កណ្តុរ" ឡើយ។ ក្រៅពីនេះ លោកបាននិយាយទៅកាន់ក្រុមអ្នកគាំទ្រប្រមាណ ១ម៉ឺននាក់ថា លោកបានអញ្ជើញពួកគេមក មិនមែនដើម្បីឲ្យការពាររូបលោកនោះទេ។ ក៏ប៉ុន្តែ លោកចង់សុំឲ្យអ្នកគាំទ្រទាំងអស់ក្រោកការពារប្រទេសនិងឯករាជ្យភាពរបស់ប្រទេសដែលលោកចង់សំដៅថាបានញាំញីដោយបាតុកម្មប្រឆាំងនៅបេឡារុសប៉ុន្មានថ្ងៃមកនេះ។
ឈរនៅលើវេទិកា លោក លូកាស្ហិនកូ បានបញ្ជាក់ពីភាពស្របច្បាប់នៃការជាប់ឆ្នោតសាជាថ្មីក្លាយជាមេដឹកនាំបេឡារុសរបស់លោក ក្នុងការបោះឆ្នោតកាលពីថ្ងៃអាទិត្យ ទី៩ សីហាកន្លងទៅ។ លោក បានអះអាងទៀតថាបានទទួលជ័យជម្នះលើគូបដិបក្ខលោកស្រី ស្វេតឡាណា ទីខានូវស្កាយ៉ា (Svetlana Tikhanovskaya) ដែលជាមេបក្សប្រឆាំងចំនួន ៨០% នៃសំឡេងឆ្នោតសរុប។ “ការបោះឆ្នោតមានសុពលភាព។ វាមិនអាចទៅរួចនោះទេដែលច្រើនជាង ៨០ %នៃសន្លឹកឆ្នោតសរុបត្រូវបានក្លែងបន្លំនោះ។ ដូច្នោះហើយ យើងនឹងមិនប្រគល់អំណាចឲ្យទៅបក្សប្រឆាំងឡើយ”។ នេះគឺជាសម្តីរបស់បុរសខ្លាំងបេឡារុស។
គួរជ្រាបថា លោកប្រធានាធិបតី អាឡិចសង់ លូកាស្ហិនកូ បានទៅជួបក្រុមអ្នកគាំទ្រនៅទីក្រុងមីនស្កិ៍ បន្ទាប់ពីប្រធានាធិបតីរុស្ស៊ីលោក វ្ល៉ាឌីមៀរ ពូទីន បានសន្យាជួយការពាររដ្ឋាភិបាលរបស់លោក ក្នុងករណីមានការគំរាមកំហែងយោធាពីខាងក្រៅ។ ការបោះដៃជួយរបស់រុស្សីនេះលេចចេញមកក្រោយលោក លូកាស្ហិនកូ បានទៅជួបនិយាយចរចាពីរដងជាមួយលោកពូទីននៅចុងសប្តាហ៍។
គួរជ្រាបទៀតថា នៅថ្ងៃអាទិត្យ ១៦ សីហាដែរ ក្រុមអ្នកប្រឆាំងរដ្ឋាភិបាលរបស់លោក លូកាស្ហិនកូ ជាច្រើនពាន់នាក់ បានទៅប្រមូលផ្តុំគ្នានៅក្បែរស្តូបអនុស្សាវរីយ៍សង្គ្រាមលោកលើកទី២ ក្នុងទីក្រុងមីនស្កិ៍ ស្របទៅតាមការអំពាវនាវរបស់លោកស្រី ទីខានូវស្កាយ៉ា។
លោកស្រី ទីខានូវស្កាយ៉ា មេបក្សប្រឆាំងបេឡារុស និងដែលទើបបាននិរទេសខ្លួនទៅប្រទេសលីទុយអានី បន្ទាប់ពីត្រូវជាប់ឃុំរយៈពេល ៧ ម៉ោង ដោយសារការដាក់ពាក្យប្រឆាំងតវ៉ានឹងលទ្ធផលឆ្នោត ទៅកាន់គណៈកម្មាធិការរៀបចំការបោះឆ្នោតបេឡារុស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ