លោកប៉ាវែល ឡាទូសកូ៖ខ្ញុំចង់ត្រឡប់ចូលប្រទេសកំណើតដើម្បីជួយដោះស្រាយវិបត្តិសព្វថ្ងៃ
នៅក្នុងប្រទេសបេឡារុស ចលនាបាតុកម្មប្រឆាំងនឹងប្រធានាធិបតីលោកអាឡិចសង់ លូកាឆេនកូហាក់កំពុងបន្តមានយ៉ាងផុសផុល។ វិបត្តិនយោបាយមួយនេះបានផ្ទុះឡើង បន្ទាប់ពីលោកលូកាឆេនកូដែលបានកាន់តំណែងតាំងពី ២៦ឆ្នាំបានជាប់ឆ្នោតអាណត្តិថ្មីនាការបោះឆ្នោតកាលពី ១ខែមុន។ ក្រុមបាតុករបានចុះផ្លូវតវ៉ាមិនសុខចិត្តដោយពួកគេចាត់ទុកការជាប់ឆ្នោតរបស់លោកលូកាឆេនកូជាការលួចសន្លឹកឆ្នោត។ លោកប៉ាវែល ឡាទូសកូ អ្នកទទួលខុសត្រូវជាន់ខ្ពស់ម្នាក់ក្នុងរដ្ឋាភិបាលរបស់លោកលូកាឆេនកូបានផ្តាច់ខ្លួនទៅចូលរួមជាមួយក្រុមប្រឆាំង។ សព្វថ្ងៃ លោកឡាទូសកូជាសមាជិកនៃក្រុមប្រឹក្សាសម្របសម្រួល។ ខណៈនេះ លោកឡាទូសកូកំពុងស្ថិតក្នុងប្រទេសប៉ូឡូញដែលលោកបានទៅដល់នាថ្ងៃព្រហស្បតិ៍ ទី៣ កញ្ញា។ ថ្លែងប្រាប់វិទ្យុបារាំងអន្តរជាតិពីប៉ូឡូញ លោកឡាទូសកូបានបញ្ជាក់រៀបរាប់ពីមូលហេតុនៃដំណើរទៅកាន់ប្រទេសប៉ូឡូញរបស់លោក និងពីគំនាបដែលលោកបានទទួលពីរបបរបស់លោកលូកាឆេនកូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
" ខ្ញុំគ្មានបំណងសុំសិទ្ធិជ្រកកោណនយោបាយទេ ហើយខ្ញុំក៏មិនចង់ក្លាយជាអ្នកនិរទេសខ្លួនដែរ។ ខ្ញុំចង់ត្រឡប់ទៅបេឡារុសវិញដើម្បីចូលរួមជួយដោះស្រាយវិបត្តិដែលប្រទេសកំពុងជួបប្រទះពេលនេះ។ ពិតជាអភព្វ ចំនួនសមាជិកក្នុងក្រុមបឹក្សាសម្របសម្រួលនៃក្រុមប្រឆាំងរបស់យើងបានថយចុះ។ ក្នុងចំណោមសមាជិកទាំង ៧០នាក់ដែលយើងមានពីដំបូង គឺមាននៅសល់តែ ៤០នាក់ប៉ុណ្ណោះ។
នេះមិនមែនមានន័យថាអ្នកផ្សេងមិនចង់ចូលរួមនៅក្នុងកិច្ចសន្ទនា ឬមួយក៏មិនជឿលើគោលការណ៍នៃក្រុមបឹក្សាសម្របសម្រួលរបស់ក្រុមប្រឆាំងទេ។ មូលហេតុគឺសាមញ្ញងាយយល់ណាស់ គឺមកពីសមាជិកទាំងអស់នៃក្រុមបឹក្សាសម្របសម្រួលរបស់ក្រុមប្រឆាំងបានទទួលរងគំនាបពីរដ្ឋអំណាច។ កុំថាឡើយសមាជិកក្នុងក្រុមប្រឹក្សានេះ សូម្បីតែមនុស្សធម្មតាក៏បារម្ភពីការចាប់ខ្លួនដែរនៅពេលដែលមនុស្សរូបនោះនិយាយពីទង្វើខុសច្បាប់។
គេដឹងច្បាស់ថា ប្រសិនបើខ្ញុំត្រូវបានគេឃាត់ខ្លួន ឬចាប់ខ្លួនដូចសមាជិកដទៃទៀតនៃក្រុមបឹក្សាសម្របសម្រួល វាជាទង្វើដែលបានធ្វើឡើងក្រោមហេតុផលនយោបាយ។ តែខ្ញុំនៅសង្ឃឹមថា យើងនឹងអាចដោះស្រាយស្ថានការណ៍មួយនេះដោយធ្វើយ៉ាងណា កុំឲ្យមានពលរដ្ឋបេឡារុសណាម្នាក់ចាកចេញពីប្រទេសរបស់ពួកគេ និងអនុញ្ញាតឲ្យពលរដ្ឋម្នាក់ៗអាចបញ្ចេញមតិ និងការយល់ឃើញរបស់ខ្លួន។
ម្យ៉ាងទៀត រដ្ឋអំណាចត្រូវតែស្តាប់ ទទួលយកនូវមតិយោបល់ និងការយល់ឃើញរបស់ពលរដ្ឋម្នាក់ៗនៅក្នុងការសម្រេចចិត្ត "
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ