ប្រធានាធិបតីបេឡារុស ប្រកាសឱ្យប្រើ«កម្លាំងយោធា» ដើម្បីរក្សាបូរណភាពដែនដី
ប្រធានាធិបតីបេឡារុស ប្រកាសពីថ្ងៃសៅរ៍ ឱ្យប្រើ«កម្លាំងយោធា» ដើម្បីរក្សាអធិបតីភាពដែនដី និងឱ្យយោធាត្រៀមខ្លួនគ្រប់វិនាទី ដើម្បីការពារជាតិ ទប់ទល់នឹងកម្លាំងពីខាងក្រៅ។ ការប្រកាសនេះ ដោយសារតែប្រមុខរដ្ឋបេឡារុស មើលឃើញពីចរន្តរំជើបរំជួលនៃចលនាបាតុកម្មក្នុងស្រុក ដែលកាន់តែពុះកញ្ជ្រោលខ្លាំង ហើយនិងមានសញ្ញាណលូកដៃរួមកម្លាំងពីប្រទេសជិតខាងជាប់ព្រំដែន។
ចុះផ្សាយនៅថ្ងៃ៖
ស្តាប់ - ០២:១០
ប្រធានាធិបតីបេឡារុស Alexandre Loukachenko ប្រកាសបញ្ជាឱ្យរដ្ឋមន្ត្រីក្រសួងការពារជាតិ ត្រូវតែប្រើវិធានការឱ្យតឹងតែងបំផុត ទោះក្នុងតម្លៃណាក៏ដោយ ដើម្បីការពារបូរណភាពទឹកដី ហើយ កម្លាំងយោធាត្រូវតែស្ថិតនៅក្នុងសភាពត្រៀមប្រយុទ្ធជានិច្ច ឬត្រៀមចេញប្រតិបត្តិការប្រចាំ។ បុរសខ្លាំងកាន់អំណាច២៦ឆ្នាំរូបនេះ ថែមទាំងថានឹងឱ្យធ្វើសមរយុទ្ធយោធាយ៉ាងធំសម្បើមនៅចុងខែសីហានេះ។
សេចក្តីប្រកាសដូច្នេះ គឺស្តែងឱ្យឃើញថា ថ្នាក់ដឹកនាំស្រុកបេឡារុស ក្រពុលមុខនឹងសម្ពាធបាតុកម្ម តាមដងផ្លូវ ដែលកាន់តែខ្លាំងឡើងៗនិងជាច្រើនថ្ងៃជាប់ៗគ្នា បន្ទាប់ពីគណបក្សប្រឆាំងនិងក្រុមប្រជាពលរដ្ឋនាំគ្នាបះបោរបដិសេធទាត់ចោលលទ្ធផលបោះឆ្នោត ថ្ងៃទី៩សីហា។ ប្រធានាធិបតីបេឡារុស Loukachenko បង្វែរសាច់រឿងបន្តិច ដោយចង្អុរចោទប្រកាន់ថា មានកម្លាំងពីខាងក្រៅ មករួមដៃនឹងហ្វូងបាតុករ គឺហូរចូលពីច្រកព្រំដែន ប៉ូឡូញ និងលីទុយអានី ជាទីដែលលោកកំពុងតែត្រួតពល នៅថ្ងៃសៅរ៍ ទី២២សីហា។
ត្រង់ចំណុចចោទនេះ ប្រធានាធិបតី លីទុយអានី នៅក្បែរខាង គឺ លោក Gitanas Nauseda បានប្រតិកម្មថា «លោក Loukachenko កំពុងកាច់មួលបង្វែរពីវិបត្តិផ្ទាល់ខ្លួនក្នុងស្រុក មកបំភ្លៃជាបញ្ហាព្រំដែន និងថាជាបញ្ហាមកពីក្រៅ។ នេះការស្រមៃ និងបំភ្លៃជ្រុលហួស។»
ទោះយ៉ាងនេះក្តី ក្រសួងការបរទេសលីទុយអានី ក៏បានបង្ហើបឱ្យដឹងខ្លះដែរ ប្រាប់ទីភ្នាក់ងារព័ត៌មានបារាំង AFP ថាអនុរដ្ឋមន្ត្រីការទូតអាមេរិក លោក Stephen Biegun នឹងធ្វើដំណើរទស្សនកិច្ចនៅលីទុយអានី ថ្ងៃចន្ទខាងមុខនេះ មុននឹងបន្តចេញទៅ រុស្ស៊ី ថែមទៀត។
អតីតឯកអគ្គរដ្ឋទូតសហភាពអឺរ៉ុបនៅម៉ូស្កូ និងជាមន្ត្រីទូតលីទុយអានី លោក Vygaudas Usakas យល់ឃើញថា «ទស្សនកិច្ចនេះរបស់មន្ត្រីជាន់ខ្ពស់ លំដាប់លេខ២ នៃក្រសួងការបរទេសសហរដ្ឋអាមេរិកនេះ គឺជាសញ្ញាណមួយដែលបញ្ជាក់ច្បាស់ថា សហរដ្ឋអាមេរិក អាចនឹងត្រៀមខ្លួនរួចស្រេច សម្រាប់ដើរតួមួយដែរ ក្នុងដំណោះស្រាយនៃវិបត្តិនៅបេឡារុស ហើយនិងបញ្ហានៅរុស្ស៊ី»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ