បេឡារុស បន្តចាប់ឃុំខ្លួនបាតុករជាង១០០នាក់ថែមទៀត ក្នុងឱកាសបាតុកម្មថ្ងៃអាទិត្យ
ថ្ងៃអាទិត្យ ទី១៨តុលា បាតុកររាប់ពាន់នាក់ បានចុះផ្លូវ តវ៉ាប្រឆាំងនឹងប្រធានាធិបតីបេឡារុស នៅកណ្តាលរដ្ឋធានី និងបណ្តាទីក្រុងធំៗ ដូចសព្វដង។ កម្លាំងនិងស្មារតីរបស់ហ្វូងបាតុករ ហាក់គ្មានការស្រកស្រុតសោះ បើទោះបីជារដ្ឋអំណាចគំរាមបាញ់កាំភ្លើងប្រើគ្រាប់ពិត ដើម្បីបំបែកចលនាបាតុកម្ម យ៉ាងណាក្តី។ ទីបំផុត ក្រុមបាតុករ និង អ្នកកាសែត ជាង១០០នាក់ ត្រូវចាប់ខ្លួន ក្នុងនោះ ប្រមាណ៦០នាក់ ត្រូវប៉ូលីសចាប់នៅកណ្តាលរដ្ឋធានី Minsk ។
ចុះផ្សាយនៅថ្ងៃ៖
ស្តាប់ - ០២:១១
ប្រធានាធិបតី Loukachenko ដែលកាន់អំណាច ដោយកណ្តាប់ដៃដែក ២៦ឆ្នាំហើយ គឺមិនព្រមបន្ទន់ដៃ ធ្វើសម្បទានតាមការទាមទាររបស់ហ្វូងបាតុករនោះឡើយ។ បាតុករដែលញាក់ខ្សែដោយបក្សប្រឆាំង បានច្រានចោលលទ្ធផលបោះឆ្នោតថ្ងៃទី៩សីហា ដោយចោទថាមានការលួចបន្លំ ហើយនិង នាំគ្នាចុះផ្លូវតវ៉ាឱ្យប្រមុខរដ្ឋចុះចេញពីតំណែង។
មេបក្សប្រឆាំង លោកស្រី Tikhanovskaïa ដែលរត់ភៀសខ្លួនទៅប្រទេសជិតខាង បានដាក់ឱសានុវាទ ត្រឹមថ្ងៃ២៥តុលាខាងមុខ ទុកពេលឱ្យរដ្ឋអំណាចបេឡារុស ដោះលែងអ្នកទោសមនសិការ ដោះលែងអ្នកកាសែត និងបាតុករ ដែលសមត្ថកិច្ចចាប់ខ្លួន ប៉ុន្មានជាងពីរខែមកនេះ។ ទន្ទឹមនឹងគ្នានេះ អ្នកនយោបាយស្រីនិរទេសខ្លួនរូបនេះ នៅតែបន្តជំរុញឱ្យហ្វូងបាតុករធ្វើបាតុកម្មជានិច្ច ធ្វើដោយអហិង្សា លុះត្រាទាល់តែមានការរៀបចំបោះឆ្នោតប្រធានាធិបតី សាជាថ្មី ដោយសុចរិតត្រឹមត្រូវ។ លោកស្រីបានធ្វើនយោបាយការបរទេស ទាក់ទាញ បារាំងនិងអាល្លឺម៉ង់ ជាដើម ឱ្យឈរនៅខាងខ្លួន។ តែចំណុចនេះ ត្រូវរដ្ឋបាលក្រុងម៉ូស្កូ ចោទថា បច្ចិមលោក លូកដៃជ្រៀតជ្រែកកិច្ចការផ្ទៃក្នុងរបស់បេឡារុស។
ប្រទេសប្រកាន់របបប្រជាធិបតេយ្យនៅលោកខាងលិច មិនទទួលស្គាល់លទ្ធផលបោះឆ្នោត ថ្ងៃទី៩សីហាឡើយ។សហភាពអឺរ៉ុប បានដាក់ទណ្ឌកម្មថ្នាក់ដឹកនាំកំពូលៗ របស់បេឡារុស ចំនួន៤០នាក់ ក្នុងនោះក៏មានរដ្ឋមន្ត្រីនិងអនុរដ្ឋមន្ត្រីក្រសួងមហាផ្ទៃផង។ រដ្ឋមន្ត្រីមហាផ្ទៃ និងមេប៉ូលីស មិនព្រឺញញើតនឹងសម្រែកបាតុករ ហើយកាលពីថ្ងៃចន្ទ បានព្រមានឱ្យកងកម្លាំងរបស់ខ្លួនប្រើគ្រាប់កាំភ្លើងពិត ដើម្បីបាញ់បំបែកហ្វូងបាតុករ។
តាំងពីពេលផ្ទុះបាតុកម្មជាច្រើនសប្តាហ៍មក មនុស្សយ៉ាងហោច៣នាក់បានស្លាប់ ហើយច្រើនរយនាក់រងរបួស។ បាតុកររាប់ពាន់នាក់ត្រូវចាប់ខ្លួន។ ក្រុមបាតុករ ដែលប្រព័ន្ធឃោសនាសារព័ត៌មានបរទេស តែងតែជជក់មាត់សរសើរ គឺក្រុមស្រីៗ និងយុវជន អ្នករៀនសូត្រ ដែលតែងតែមានមុខជានិច្ច ក្នុងបាតុកម្ម បណ្តេញពួកជនដែលគេយល់ថា ផ្តាច់ការ និងស្រេកឃ្លានអំណាច នៅក្រុង Minsk៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ