វិបតិ្តកូវីដកំពុងជួយជំរុញ យន្តការប្រើគ្រឿងម៉ាស៊ីន សម្រាប់ជំនួសការងាររបស់មនុស្ស
វិបត្តិកូវីដ១៩ បានធ្វើឲ្យ “ការងារនៅថ្ងៃអនាគត” មកដល់មុនកាលកំណត់។ របាយការណ៍ ស្តីពីអនាគតទីផ្សារកាងារ ដែលវេទិកាសេដ្ឋកិច្ចពិភពលោក World Economic Forum ចេញផ្សាយ នៅថ្ងៃពុធនេះ បានបង្ហាញថា វិបត្តិកូវីដ បូកផ្សំជាមួយកំណើនបច្ចេកវិទ្យានឹងជំរុញ ការប្រើប្រាស់គ្រឿងម៉ាស៊ីន ដែលនឹងប៉ះពាល់ដល់ការងាររបស់មនុស្សប្រមាណ ៨៥លានការងារ នៅក្នុងពិភពលោក ក្នុងរយៈពេល៥ឆ្នាំទៅមុខ។ តាមអគ្គនាយិការបស់ វេទិកាសេដ្ឋកិច្ចពិភពលោក បដិវត្តមនុស្សយន្ត ឬគ្រឿងម៉ាស៊ីន នឹងធ្វើឲ្យវិសមភាពនៅទីផ្សារការងារ មានកាន់តែខ្លាំងឡើង។
ចុះផ្សាយនៅថ្ងៃ៖
ស្តាប់ - ០២:២៩
វិបត្តិកូវីដ ១៩បានជំរុញឲ្យមានការផ្លាស់ប្តូរ ដ៏លឿន នៅទីផ្សារការងារ។ ការងារ ដែលគេរំពឹងថា នឹងអាចកើតឡើង នៅថ្ងៃអនាគត គឺកំពុងលេចចេញរូបរាងបណ្តើរៗ។ តាមរបាយការណ៍របស់អង្គការវេទិកាសេដ្ឋកិច្ចពិភពលោក វិបត្តិកូវីដ ហើយការរីកចំរើនផ្នែកបច្ចេកវិទ្យា បានជំរុញយន្តការប្រើប្រាស់គ្រឿងយន្ត នៅក្នុងពិភពការងារ។
នៅពេល បដិវត្តន៍មនុស្សយន្ត អាចបង្កើតការងារ ដល់ទៅ ៩៧លានការងារនៅក្នុងពិភពលោក វាក៏ជាគ្រោះថ្នាក់ ខ្លាំងណាស់ដែរ សម្រាប់អនាគតការងាររបស់មនុស្ស។
គេវាយតម្លៃថា ពីពេលនេះ រហូតដល់ឆ្នាំ ២០២៥ ពោលគឺ ក្នុងរយៈពេល ៥ឆ្នាំទៅមុខ ការបែងចែកការងាររវាង គ្រឿងម៉ាស៊ីន ហើយនិងមនុស្ស នឹងធ្វើឲ្យប៉ះពាល់ដល់ការងាររបស់មនុស្សប្រមាណ ៨៥លាននាក់ នៅក្នុងពិភពលោក។ តាមរបាយការណ៍ របស់វេទិការសេដ្ឋកិច្ចសកល ប្រធានក្រុមហ៊ុនប្រមាណ ៥០ភាគរយ បានអះអាងថា គេកំពុងជំរុញកម្មវិធី ប្រើគ្រឿងម៉ាស៊ីនសម្រាប់ការងារមួយចំនួន នៅក្នុងក្រុមហ៊ុន។ ៤៣ភាគយនៃក្រុមហ៊ុនដែលគេបានជួបសម្ភាសន៍ បានបង្ហាញថា ដោយសារតែគេត្រូវប្រើគ្រឿងម៉ាស៊ីន ជំនួសមនុស្ស គេត្រៀមខ្លួនរួចហើយ ដើម្បី កាត់បន្ថយ បុគ្គលិក។
តាមវេទិកាសេដ្ឋកិច្ចពិភពលោក ជំងឺរាតត្បាតកូវីដ លើកនេះ បានជំរុញឲ្យក្រុមហ៊ុនកាន់តែច្រើន ពិចារណា ជ្រើសរើសបច្ចេកវិទ្យា ដើម្បីធ្វើការងារតាមបែបថ្មី និង ដើម្បី កាត់បន្ថយការចំណាយរបស់ក្រុមហ៊ុន។
នៅពេលពិភពលោកកំពុងរួបរឹត ដោយសារវិបត្តិកូវីដ ការបង្កើតការងារសម្រាប់មនុស្ស កាន់តែយឺត ចំណែក ការបំផ្លាញការងាររបស់មនុស្ស មិនថា ក្នុងហេតុផល សេដ្ឋកិច្ច ឬកំណើនបច្ចេកវិទ្យា តាមរយៈ ការប្រើគ្រឿងម៉ាស៊ីន គឺកំពុងបោះជំហានលឿនស្លេវ ទៅមុខ។
តាមរបាយការណ៍របស់វេទិកាសេដ្ឋកិច្ចពិភពលោក គឺកម្មករនៅតាមរោងចក្រ និងបុគ្គលិកតូចតាច សម្រាប់ការងាររដ្ឋបាល ដែលទទួលបានប្រាក់ខែតិចតួចរួចហើយនោះ នឹងរងគ្រោះមុនគេ ដោយសារបច្ចេកវិទ្យា ប្រើគ្រឿងម៉ាស៊ីនជំនួសមនុស្ស។ ការងារមួយចំនួន ដូចជា ការបញ្ចូលទិន្នន័យ ការងារគណនេយ្យ ឬការងាររដ្ឋបាល ជាដើម នឹងត្រូវផ្តល់ទៅគ្រឿងម៉ាស៊ីនជាអ្នកធ្វើជំនួសវិញ។
គ្រឿងយន្តអាចដណ្តើមការងាររបស់មនុស្សដូចជា ការងារពលកម្ម ដែលប្រើដៃ នៅតាមរោងចក្រ ឬការងាររដ្ឋាបាល ប៉ុន្តែ គ្រឿងម៉ាស៊ីន មិនអាច មកជំនួសមនុស្ស សម្រាប់ការងារដែលត្រូវការប្រើខួរក្បាល ប្រើជំនាញ ដូចជា ការងារជាអ្នកផ្តល់ប្រឹក្សាយោបល់ អ្នកសម្រេចចិត្ត អ្នកទទួលខុសត្រូវលើទំនាក់ទំនង អ្នកជំនាញបរិស្ថាន ហើយនិងវិស្វកម្ម ដែលសុទ្ធសឹងជាការងារ ចាំបាច់ ទៅថ្ងៃអនាគត។ របាយការណ៍របស់វេទិកាសេដ្ឋកិច្ចពិភពលោកបានបង្ហាញថា បើសិនរដ្ឋាភិបាល ក្រុមហ៊ុន សហការគ្នា ដើម្បី បណ្តុះបណ្តាលសមត្ថភាព របស់បុគ្គលិកដើម្បីសម្របទៅតាមការវិវឌ្ឍរបស់បច្ចេកវិទ្យា នោះ គ្រឿងយន្ត មិនអាចសម្លាប់ការងារទាំងស្រុងរបស់មនុស្សបាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ