លោកអូលីវីយេ ប៊ូស្ហូ៖គេមិនទាន់អាចសន្និដ្ឋានពីកំណើនករណីឆ្លងកូវីដ១៩នៅអង់គ្លេសដោយការបំផ្លែងខ្លួនរបស់វីរុសទេ
វត្តមានកោសិកាថ្មីដែលកើតចេញពីការបំផ្លែងខ្លួនរបស់វីរុសកូវីដ១៩ នៅក្នុងប្រទេសអង់គ្លេសកំពុងបន្តជាបច្ចុប្បន្នភាពយ៉ាងក្តៅគគុក។ នាយករដ្ឋមន្រ្តីអង់គ្លេសបានប្រកាសបិទទីក្រុងឡុងដ៏ និងតំបន់ប៉ែកអាគ្នេយ៍ពីថ្ងៃអាទិត្យ ទី២០ ធ្នូរហូតដំណាច់ឆ្នាំ ២០២០ នេះ។ ប្រទេសអឺរ៉ុបខ្លះ ដូចជាហូឡង់ បែលហ្ស៊ិក និងអ៊ីតាលីបានផ្អាកជើងហោះហើរជាមួយអង់គ្លេស។ រីឯប្រទេសអឺរ៉ុបខ្លះទៀត ដូចយ៉ាងបារាំង និងអាល្លឺម៉ង់ចង់ឲ្យមានវិធានការរួមក្នុងកម្រិតសហភាពអឺរ៉ុប។ ចំណែកអង្គការសុខភាពពិភពលោកបានអំពាវនាវឲ្យប្រទេសសមាជិកអឺរ៉ុបពង្រឹងការត្រួតពិនិត្យទប់ស្កាត់នឹងការឆ្លងរាតត្បាតនៃកោសិកាថ្មីដែលកើតចេញពីការបំផ្លែងខ្លួនរបស់កូវីដ១៩។ ដោយឡែក លោកអូលីវីយេ ប៊ូស្ហូ ប្រធានការិយាល័ជំងឺឆ្លងក្នុងមន្ទីរពេទ្យបារាំងមួយបានអះអាងថា វាដូចជារហ័សពេលដែលគេហ៊ានសន្និដ្ឋានថា កោសិកាថ្មីកើតពីការបំផ្លែងខ្លួនរបស់កូវីដ១៩ ជាប្រភពកំណើនករណីឆ្លងវីរុសកូវីដ១៩ នៅអង់គ្លេស។
ចុះផ្សាយនៅថ្ងៃ៖
ស្តាប់ - ០១:២៤
« សម្មតិកម្មនៃការបំផ្លែងខ្លួនរបស់វីរុសជារឿងដែលគេមិនអាចទាត់ចោលបានទេ។ ព្រោះចូរកុំភ្លេចថាគ្រប់ពេលទាំងអស់ វីរុសបានបង្កាត់ពូជឡើងវិញដោយខ្លួនវា ហើយគេថែមទាំងបានដឹងទៀតថា ជាការបង្កាត់ពូជឡើងវិញដោយខ្លួនវាជាអចិន្ត្រៃយ៍។ គេអាចនិយាយបានថា ការបំផ្លែងខ្លួនរបស់វីរុសជាការថតចម្លងរបស់វីរុសខ្លួនឯង។ តែមានការកត់សម្គាល់ឃើញថា ការបំផ្លែងខ្លួនរបស់វីរុសអាចបង្កឲ្យមានផលវិបាកផង និងគ្មានផលវិបាកផង។
វាដូចជារហ័សពេកដែលគេហ៊ានសន្និដ្ឋានថា កោសិកាថ្មីនៃការបំផ្លែងខ្លួនរបស់វីរុសកូវីដ១៩ ជាប្រភពនៃកំណើនករណីឆ្លងជំងឺកូវីដ១៩ នៅក្នុងប្រទេសអង់គ្លេស។ ព្រោះគេពិបាកនឹងភ្ជាប់ការផ្លាស់ប្តូរភិនភាគរបស់វីរុសទៅនឹងការបំផ្លែងខ្លួនណាមួយរបស់វីរុស។ ចូរកុំភ្លេចថា យើងកំពុងស្ថិតក្នុងរដូវរងារ ហើយរដូវរងារជាពេលវេលាមានអំណោយផលល្អណាស់សម្រាប់ការឆ្លងវីរុស។
មួយវិញទៀត ស្ថានភាពចុងឆ្នាំដែលចំពេលបុណ្យណូអែល និងឆ្លងឆ្នាំថ្មីជារយៈពេលនៃការទាក់ទងគ្នាក្នុងសង្គម ជួបជុំក្រុមគ្រួសារ និងមិត្តភក្តិ។ នេះក៏ជាហេតុផលមួយទៀតដែលបញ្ជាក់ពីកំណើនឆ្លងជំងឺកូវីដ១៩ គួរឲ្យកត់សម្គាល់ដែរ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ