អង់គ្លេសត្រៀមដាក់ចេញវិធានការរឹតត្បិតជាងមុនដើម្បីទប់ស្កាត់ការឆ្លងរាលដាលកូវីដ
នាយករដ្ឋមន្រ្តីអង់គ្លេសលោកបូរីស ចនសុន បានលើកឡើងនៅថ្ងៃអាទិត្យ ៣ មករាពីលទ្ធភាពនៃការអនុវត្តន៍វិធានការតឹងរ៉ឹងខ្លាំងជាងមុន ដើម្បីប្រយុទ្ធប្រឆាំងនឹងករណីឆ្លងរាលដាលខ្លាំងនៃជំងឺកូវីដ។ ខណៈករណីឆ្លងកូវីដនៅបន្តកើនឡើងខ្លាំង មានសំណួរលើកឡើងដែរថាតើអង់គ្លេសគួរបើកសាសារៀននាថ្ងៃចន្ទ ទី៤ មករាដែរឬក៏អត់?
ចុះផ្សាយនៅថ្ងៃ៖
ស្តាប់ - ០២:១៣
នៅក្នុងបទសម្ភាសន៍មួយជាមួយសារព័ត៌មាន BBC លោកបូរីស ចនសុន បានមានប្រសាសន៍ថា នាប៉ុន្មានសប្តាហ៍ខាងមុខ រដ្ឋាភិបាលអង់គ្លេសទំនងជាត្រូវចាត់វិធានការកាន់តែតឹងរ៉ឹងបន្ថែមទៀតនៅតាមតំបន់ជាច្រើននៃប្រទេស។
អង់គ្លេសបានរាយការណ៍កាលពីថ្ងៃសៅរ៍ អំពីការបំបែកកំណត់ត្រាថ្មីនៃអត្រាអ្នកឆ្លងកូវីដដែលមានចំនួនរហូតដល់ទៅ ៥៧ ៧២៥ ករណី ដែលជាចំនួនខ្ពស់បំផុតចាប់តាំងពីជំងឺរាតត្បាតកូវីដផ្ទុះឡើងនៅក្នុងប្រទេសមក។
ដោយករណីឆ្លងកូវីដចេះតែបន្តកើនឡើងបែបនេះ ក្រុមមន្រ្តីសុខាភិបាលអង់គ្លេសមានការព្រួយបារម្ភថា ខាងមន្ទីរពេទ្យនឹងលែងអាចទប់ទល់ស្ថានការណ៍បានដោយសារចំនួនអ្នកជំងឺចាល់ឡើងខ្លាំងពេក។
ស្របពេលដែលការឆ្លងរាលដាលកូវីដនៅតែមានសភាពធ្ងន់ធ្ងរគួរឲ្យព្រួយបារម្ភ ក៏មានសំណួរចោទឡើងផងដែរថាតើគេគួរបើកសាលារៀនវិញនៅថ្ងៃចន្ទឬយ៉ាងណា? ឆ្លើយតបនឹងសំណួរខាងលើ លោកប្រមុខរដ្ឋាភិបាលអង់គ្លេសបាននិយាយថា ឪពុកម្តាយគួរតែបញ្ជូនកូនៗរបស់ពួកគេទៅសាលាបឋមសិក្សាវិញនាថ្ងៃចន្ទ ទី៤ មករានេះ ប្រសិនបើសាសានៅក្នុងតំបន់រស់នៅរបស់ពួកគេបើកទ្វារ។
លោកចនសុន ថា លោកយល់ពីការរារែកអល់អែក ពីកង្វល់របស់ឪពុកម្តាយ និងអាណាព្យាបាលនៃសិស្ស ប៉ុន្តែលោកថាគ្មានអ្វីដែលគួរឲ្យងឿងឆ្ងល់នៅក្នុងចិត្តរបស់លោកឡើយថាសាលារៀន គឺជាកន្លែងដែលមានសុវត្ថិភាព ហើយការសិក្សាអប់រំគឺជាចំណុចអាទិភាពមួយ។ លោកបានបន្ថែមទៀតថា រដ្ឋបាលរបស់លោកពិតជាបានខិតខំប្រឹងប្រែងខ្លាំងណាស់ ក្នុងកាលៈទេសៈដែលប្រទេសធ្លាក់ក្នុងវិបត្តិកូវីដដើម្បីអាចបើកទ្វារសាលារៀនបាន។
យ៉ាងណាក៏ដោយ សមាគមជាតិគ្រូបង្រៀនអង់គ្លេសកំពុងជូនព័ត៌មានទៅកាន់បុគ្គលិកសាសា ថា វាគ្មានសុវត្ថិភាពនោះទេក្នុងការវិលត្រលប់ទៅធ្វើការក្រោយឈប់សម្រាកបុណ្យណូអែលនាថ្ងៃចន្ទ និងបានអំពាវនាវឲ្យមានការបង្រៀនតាមអនឡាញជំនួសវិញ។
ជាមួយគ្នានេះ លោក Paul Whiteman ដែលជាប្រធានសមាគមគ្រូបង្រៀនរបស់ប្រទេសអង់គ្លេស បានអំពាវនាវផងដែរឲ្យរដ្ឋាភិបាលពន្យារពេលបើកសាលារៀន ដើម្បីទុកពេលឲ្យអ្នកពាក់ព័ន្ធអាចរិះរកវិធានការកាត់បន្ថយហានិភ័យឲ្យបានត្រឹមត្រូវ ដើម្បីធានាថាទាំងសិស្សសាលានិងគ្រូបង្រៀនមានសុវត្ថិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ