បារាំង-អាហ្រ្វិក៖លោកម៉ាក្រុងអំពាវនាវឲ្យពង្រឹងយុទ្ធនាការប្រឆាំងនឹងពួកជីហាតនៅតំបន់សាហ៊ែល
នៅថ្ងៃអង្គារ ទី១៦ កុម្ភៈ ប្រធានាធិបតីបារាំងលោកអេម៉ានុយអែល ម៉ាក្រុងបានអំពាវនាវឲ្យពង្រឹងយុទ្ធនាការប្រឆាំងនឹងពួកជីហាតដែលមានចំណងទាក់ទងជាមួយពួកអាល់កៃដានៅតំបន់សាហ៊ែល។ លោកម៉ាក្រុងបានថ្លែងយ៉ាងដូចនេះនៅក្នុងសន្និសីទកាសែតមួយ បន្ទាប់ពីមានជំនួបកំពូលតាមអនឡាញរៀបចំក្នុងប្រទេសឆាដជាមួយសមភាគីនៃ ៥ប្រទេសអាហ្រ្វិកក្នុងក្រុម G៥ សាហ៊ែល គឺឆាដ នីហ្សេ បួគីណាហ្វាសូ ម៉ាលី និងប្រទេសម៉ូរីតានី។ លោកម៉ាក្រុងបានធានាថា គ្មានការកាត់បន្ថយចំនួនទ័ពបារាំងនៅក្នុងកម្លាំងបាកាននារយៈពេលខ្លីខាងមុខទេ និងថា ការដែលបារាំងបានសន្យាបញ្ជូនទ័ពបារាំងបន្ថែមចំនួន ៦០០នាក់ទៅក្នុងកម្លាំងបាកាននៅបន្តជាបច្ចុប្បន្នភាពដដែល។ គួររម្លឹកថា ការសន្យារបស់បារាំងនេះបានធ្វើឡើងនៅក្នុងជំនួបកំពូល G៥ សាហ៊ែលរៀបចំក្នុងទីក្រុងប៉ូ ប្រទេសបារាំងកាលពីមួយឆ្នាំមុន។ មានកម្មវត្ថុចំនួនពីរដែលលោកម៉ាក្រុងចង់ឃើញកម្លាំងបាកានសម្រេចបាននៅពេលខាងមុខ ទី១ កម្ទេចពួកជីហាតដែលមានចំណងទាក់ទងជាមួយពួកអាល់កៃដា និងទី២ ការវិលត្រឡប់នូវសន្តិសុខសម្រាប់ប្រជាជនក្នុងតំបន់សាហ៊ែល។
ចុះផ្សាយនៅថ្ងៃ៖
ស្តាប់ - ០១:២៧
« សារទីមួយ គឺយើងមិនត្រូវបន្ធូរដៃទៅលើក្រុមភេរវជនឡើយ។ យើងត្រូវបន្តយុទ្ធនាការនៅក្នុងតំបន់នៃព្រំដែនទាំង ៣ ជាមួយប្រទេសម៉ាលី នីហ្សេ និងបួគីណាហ្វាសូ។ ចាប់ពីថ្ងៃខាងមុខ និងពីសប្តាហ៍ខាងមុខទៅ យើងត្រូវបើកប្រតិបត្តិពិតប្រាកដដើម្បីដណ្តើមយកតំបន់នោះមកកាន់កាប់វិញ។
ខ្ញុំក៏គិតថា យើងត្រូវត្រៀមកម្លាំងរបស់យើងដើម្បីព្យាយាមកម្ទេចពួកជីហាតដែលមានចំណងទាក់ទងជាមួយអាល់កៃដាឲ្យដល់ឫសគល់។ ទន្ទឹមគ្នានេះ យើងក៏មិនអាចផ្តោតតែលើគោលដៅតាមកំចាត់ពួកភេរវជនមួយប៉ុណ្ណោះទេ។ យើងក៏ត្រូវគិតគូរផងដែរពីអនាគតរបស់ប្រជាជននៅតំបន់សាហ៊ែល។
នេះជាគោលដៅទី២ ដែលយើងត្រូវសម្រេចឲ្យបាន មានន័យថា គឺការវិលត្រឡប់វិញនូវសន្តិសុខ និងសេវាកម្មផ្សេងៗសម្រាប់ប្រជាជននៅសាហ៊ែល។ នៅត្រង់ចំណុចនេះ យើងត្រូវមានចក្ខុវិស័យ និងឆន្ទៈដូចដែលបានសន្យានាជំនួបកំពូលរៀបចំក្នុងទីក្រុងប៉ូ ប្រទេសបារាំងកាលពីមួយឆ្នាំមុន។
ការចូលរួមពីអន្តរជាតិក្នុងបុព្វហេតុតំបន់សាហ៊ែលមិនដែលមានសន្ទុះខ្លាំងក្លាដូចពេលនេះទេ។ ឆ្លៀតឱកាសនេះ ខ្ញុំសូមអរគុណដល់ក្រុមប្រទេសដៃគូអឺរ៉ុបដែលបានចូលរួមនៅក្នុងកម្លាំងពិសេសតាគូបា »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ