អឺរ៉ុបជំរុញឲ្យមានពាណិជ្ជកម្មបៃតងនិងកំណែទម្រង់ស៊ីជម្រៅលើអង្គការពាណិជ្ជកម្មពិភពលោក
សហភាពអឺរ៉ុបនឹងធ្វើឲ្យការឆ្លើយតបទៅនឹងបញ្ហាអាកាសធាតុ ព្រមទាំងការកែទម្រង់ស៊ីជម្រៅ ក្លាយជាចំណុចស្នូលនៅក្នុងស្ថាប័នអង្គការពាណិជ្ជកម្មពិភពលោក។ នេះបើយោងតាមយុទ្ធសាស្រ្តពាណិជ្ជកម្មថ្មី សម្រាប់រយៈពេល ១០ ឆ្នាំខាងមុខដែលត្រូវបានគេបង្ហាញឲ្យដឹងនៅថ្ងៃព្រហស្បតិ៍ ទី១៨ កុម្ភៈ ឆ្នាំ២០២១។
ចុះផ្សាយនៅថ្ងៃ៖
ស្តាប់ - ០១:៥៨
កិច្ចពិភាក្សាស្តីអំពីគោលនយោបាយពាណិជ្ជកម្មរបស់សហភាពអឺរ៉ុបនេះ បានកើតឡើងប្រកបដោយក្តីសង្ឃឹមនៅឯទីក្រុងព្រុចសែល ជាមួយនឹងកិច្ចសហប្រតិបត្តិការកាន់តែមុតមាំពីសំណាក់រដ្ឋបាលអាមេរិកថ្មីរបស់លោក ចូ បៃដិន បន្ទាប់ពីទំនាក់ទំនងប្រេះឆារយៈពេល ៤ ឆ្នាំ ជាមួយរដ្ឋបាលលោកដូណាល់ ត្រាំ។
ក្នុងនាមជាទីផ្សារដ៏ធំមួយ សហភាពអឺរ៉ុបដែលមានចំនួនប្រជាជនសរុបប្រមាណ ៤៥០ លាននាក់ បានខ្វះខ្នែងខំតស៊ូដើម្បីសម្រេចនូវគោលនយោបាយពាណិជ្ជកម្មរបស់ខ្លួន នៅចំពោះមុខឧបសគ្គជាច្រើន ក្នុងនោះក៏មានផងដែរនយោបាយគាំពារនិយមរបស់អាមេរិកក្នុងអាណត្តិដឹកនាំរបស់លោកត្រាំ។
មន្ត្រីជាន់ខ្ពស់នៃគណៈកម្មការអឺរ៉ុប ដែលជាអ្នកចាត់ចែង គោលនយោបាយពាណិជ្ជកម្ម សម្រាប់ក្រុមប្រទេសជាសមាជិកទាំង ២៧ បានប្រកាសពីយុទ្ធសាស្ត្រថ្មីរបស់ខ្លួននៅថ្ងៃព្រហស្បតិ៍ ១៨ កុម្ភៈ។ យុទ្ធសាស្ត្រថ្មីនេះ មានគោលបំណងសំខាន់ជួយកំណត់គោលដៅរយៈពេល ១០ ខាងមុខទៀត សម្រាប់អង្គការពាណិជ្ជកម្មពិភពលោក ដែលជាស្ថាប័នកំពុងជួបវិបត្តិធ្ងន់ធ្ងរ និងដែលទើបរកបានមេដឹកនាំថ្មីជាស្ត្រីជនជាតិអាហ្រ្វិកទី១ កាលពីប៉ុន្មានថ្ងៃមុននេះ។
នាយកប្រតិបត្តិរងសហភាពអឺរ៉ុបបានមានប្រសាសន៍ថា គោលនយោបាយពាណិជ្ជកម្ម ត្រូវតែផ្តល់ការគាំទ្រដល់ការឆ្លើយតបជាបន្ទាន់ទៅនឹងបញ្ហាអាកាសធាតុ (ពាណិជ្ជកម្មបៃតង) និងសេដ្ឋកិច្ចឌីជីថល ព្រមទាំងដឹកនាំកិច្ចប្រឹងប្រែងជាសកលមួយដើម្បីធ្វើកំណែទម្រង់លើស្ថាប័នអង្គការពាណិជ្ជកម្មពិភពលោក។
នៅក្នុងចក្ខុវិស័យថ្មីរបស់ខ្លួន គណៈកម្មការអឺរ៉ុបបានស្នើថាកិច្ចព្រមព្រៀងពាណិជ្ជកម្មទាំងឡាយនាពេលអនាគត ត្រូវភ្ជាប់ជាមួយផងដែរនូវកិច្ចព្រមព្រៀងអាកាសធាតុក្រុងប៉ារីសឆ្នាំ ២០១៥។ ជាកិច្ចព្រមព្រៀងដែលអឺរ៉ុប គិតថាសំខាន់និងជាចំណុចខ្វះខាតដ៏ធំនៅក្នុងយុទ្ធសាស្រ្តពាណិជ្ជកម្មចាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ