ប្រទេសលោកខាងលិច និងសកម្មជនគាំទ្រលោកណាវ៉ាល់នី ទាមទារឲ្យយកលោកទៅសង្គ្រោះបន្ទាន់
លោកអាឡិចសី ណាវ៉ាល់នី សកម្មជននយោបាយប្រឆាំងដ៏ល្បីនៅរុស្ស៊ី បានធ្វើកូដកម្មបង្អត់អាហារខ្លួនឯង ជាង២សប្តាហ៍មកហើយ នៅក្នុងមន្ទីរឃុំឃាំង។ ស្ថានភាពសុខភាពលោក កំពុងប្រឈមនឹងគ្រោះថ្នាក់ធ្ងន់។ ប្រទេសលោកខាងលិច ព្រមទាំងសកម្មជនប្រជាធិបតេយ្យរុស្ស៊ី បានអំពាវនាវ ឲ្យអាជ្ញាធររុស្ស៊ី ត្រូវបញ្ជូនលោកណាវ៉ាល់នី ទៅសង្គ្រោះបន្ទាន់។ សកម្មជនរុស្ស៊ី បានប្រកាសថានឹងធ្វើបាតុកម្មធំនៅថ្ងៃទី២១មេសា ទាមទារឲ្យដោះលែងលោកណាវ៉ាល់នី។
ចុះផ្សាយនៅថ្ងៃ៖
ស្តាប់ - ០២:២៤
លោកអាឡិចសី ណាវ៉ាល់នី ដែលបច្ចុប្បន្នកំពុងជាប់ឃុំនៅមន្ទីរឃុំឃាំង Pokrov ចំងាយ១០០គីឡូម៉ែត្រ ខាងកើតក្រុងម៉ូស្គូ បានធ្វើកូដកម្មបង្អត់អាហារខ្លួនឯង តាំងតែពីថ្ងៃទី៣១មីនា ដើម្បីជាការតវ៉ាចំពោះអាជ្ញាធរគ្រប់គ្រងមន្ទីរឃុំឃាំងនេះ ដែលមិនឲ្យលោកជួបគ្រូពេទ្យ និងទទួលបានថ្នាំព្យាបាលជំងឺឆ្អឹងខ្នង។ ភរិយារបស់លោក រួមទាំងក្រុមអ្នកគាំទ្រសកម្មជននយោបាយប្រឆាំងរុស្ស៊ីរូបនេះ បានទាញសញ្ញាអាសន្ន ថាសុខភាពលោកណាវ៉ាល់នី កំពុងស្ថិតក្នុងដំណាក់កាលគ្រោះថ្នាក់បំផុត។ ដោយសារតែកម្រិតជាតិប៉ូតាស្យូម ឡើងខ្ពស់ខ្លាំងនៅក្នុងឈាម វាអាចបណ្តាលឲ្យលោកណាវ៉ាល់នី អាចគាំងបេះដូងស្លាប់ បានគ្រប់ពេល។
ក្រុមសកម្មជនប្រឆាំង ដែលគាំទ្រលោកណាវ៉ាល់នី បានទាមទារឲ្យ ដោះលែងរូបលោក និងបញ្ជូនលោកយកទៅព្យាបាលជាបន្ទាន់។ លោក Léonid Volkov ដែលសកម្មជនជំនិតនឹងលោកណាវ៉ាល់នី បានលើកឡើងថា នេះមិនមែនត្រឹមតែជារឿងសេរីភាពទេ តែវាជារឿងស្លាប់រស់ របស់លោកណាវ៉ាល់នី។ សកម្មជនរូបនេះ បានអំពាវនាវ ឲ្យប្រជាជនរុស្ស៊ីទាំងអស់ ចុះផ្លូវធ្វើបាតុកម្មធំ នៅថ្ងៃទី២១មេសា ដើម្បីទាមទារ ឲ្យលោកពូទីន ដោះលែងលោកណាវ៉ាល់នី។
យោងតាមតួលេខ ស្រង់ដោយវែបសាយមួយ បង្កើតដោយក្រុមសកម្មជនប្រឆាំង បានឲ្យដឹងថាគិតត្រឹមថ្ងៃអាទិត្យទី១៨មេសា មានមនុស្សយ៉ាងហោច៤៦ម៉ឺននាក់ បានប្រកាសថានឹងចូលរួមបាតុកម្ម នៅថ្ងៃទី២១មេសា។ ថ្ងៃទី២១មេសា គឺជាថ្ងៃដែលលោកពូទីន ត្រូវចូលទៅថ្លែងសន្ទរកថានៅចំពោះមុខសភារុស្ស៊ី ដើម្បីបង្ហាញពីផែនការនយោបាយដឹកនាំប្រទេស។
នៅថ្ងៃអាទិត្យទី១៨មេសាដែរ ថ្នាក់ដឹកនាំនៅប្រទេសលោកខាងលិច បានចេញសេចក្តីថ្លែងការបន្តបន្ទាប់គ្នា អំពាវនាវ ឲ្យអាជ្ញាធររុស្ស៊ី បញ្ជូនលោកអាឡិចសី ណាវ៉ាល់នី យកទៅព្យាបាលជាបន្ទាន់។ តាមការគ្រោងទុក ក្នុងកិច្ចប្រជុំរដ្ឋមន្ត្រីការបរទេសសហភាពអឺរ៉ុប នៅថ្ងៃចន្ទនេះ គឺគេនឹងជជែកគ្នា ដើម្បីរកវិធីដាក់សំពាធទៅលើរុស្ស៊ី ឲ្យសង្គ្រោះជីវិតលោកអាឡិចសី ណាវ៉ាល់នី។ ដោយឡែក ក្រសួងការបរទេសអាមេរិកវិញ បានប្រកាសថា បើសិនជាលោកអាឡិចសី ណាវ៉ាល់នីស្លាប់ នោះរុស្ស៊ីពិតជាមិនអាចគេចផុតពីទណ្ឌកម្មរបស់អាមេរិកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ