អ៊ុយក្រែនរម្លឹកខួប ៣៥ឆ្នាំនៃគ្រោះមហន្តរាយនុយក្លេអ៊ែរនៅឈែរណូប៊ីល
នៅថ្ងៃទី២៦ មេសា ឆ្នាំ ២០២១ នេះ ប្រទេសអ៊ុយក្រែនរម្លឹកខួប ៣៥ឆ្នាំនៃគ្រោះមហន្តរាយនុយក្លេអ៊ែរនៅឈែរណូប៊ីលកាលពីថ្ងៃទី២៦ មេសា ឆ្នាំ ១៩៨៦។ គួររម្លឹកថា គ្រោះមហន្តរាយនុយក្លេអ៊ែរនៅឈែរណូប៊ីលកាលពី ៣៥ឆ្នាំមុនមិនត្រឹមបង្កផលវិបាកតែនៅក្នុងប្រទេសអ៊ុយក្រែនប៉ុណ្ណោះទេ តែបានធ្វើឲ្យប្រទេសអឺរ៉ុបមួយភាគរងគ្រោះដោយសារធាតុវិទ្យុសកម្ម។ ៣៥ឆ្នាំក្រោយមក ទីតាំងគ្រោះថ្នាក់ដែលស្ថិតចម្ងាយប្រមាណ ១០០គីឡូម៉ែត្រពីទីក្រុងគៀវមួយនេះកំពុងក្លាយជាកន្លែងទាក់ទាញអ្នកទេសចរណ៍ និងដែលអ៊ុយក្រែងចង់ស្នើសុំចុះទីតាំងនោះទៅក្នុងបញ្ជីបេតិកភ័ណ្ឌពិភពលោករបស់អង្គការយូណេស្កូ។ តើដំណើររឿងគ្រោះថ្នាក់បានកើតឡើងយ៉ាងដូចម្តេចខ្លះ?
ចុះផ្សាយនៅថ្ងៃ៖
ស្តាប់ - ០២:៤៧
នៅថ្ងៃទី២៦ មេសា ឆ្នាំ ១៩៨៦ នាវេលាម៉ោង ១ និង២៣នាទីព្រឹកម៉ោងក្នុងប្រទេសអ៊ុយក្រែន ម៉ាស៊ីនប្រតិកម្មលេខ ៤ នៃមជ្ឈមណ្ឌលនុយក្លេអ៊ែរឈែរណូប៊ីលបានផ្ទុះឡើងក្នុងពេលដែលក្រុមបុគ្គលិកកំពុងធ្វើតេស្តិ៍ពីសុវត្ថិភាព។ ក្នុងរយៈពេល ១០ថ្ងៃក្រោយការផ្ទុះ គ្រឿងបញ្ឆេះនុយក្លេអ៊ែរបន្តឆេះដោយបានបញ្ចេញទៅក្នុងបរិយាកាសនូវសារធាតុវិទ្យុសកម្មយ៉ាងសម្បើម។ ព័ត៌មានខ្លះបានឲ្យដឹងថា សារធាតុវិទ្យុសកម្មបានគ្របដណ្តប់ដែនដីអឺរ៉ុប ១ភាគ៤ ពិសេសប្រទេសអ៊ុយក្រែន បេឡារុស និងប្រទេសរុស្ស៊ីដែលកាលណោះនៅជាសហភាពសូវៀតនៅឡើយ។ ក្នុងឆ្នាំ ១៩៨៦ មានមនុស្សចំនួន ១១៦ ០០០នាក់ត្រូវបានជម្លៀសចេញពីតំបន់ជុំវិញទីតាំងគ្រោះថ្នាក់ ហើយនៅឆ្នាំបន្តបន្ទាប់ មានចំនួន ២៣០ ០០០នាក់ផ្សេងទៀតត្រូវបានជម្លៀសចេញពីទីនោះ។ សព្វថ្ងៃនេះ តំបន់ស្ថិតជុំវិញមជ្ឈមណ្ឌលនុយក្លេអ៊ែរនៅឈែរណូប៊ីលសឹងគ្មានមនុស្សរស់នៅ។
តែសំណួរកំពុងបន្តចោទជុំវិញចំនួនមនុស្សស្លាប់នៅក្នុងគ្រោះថ្នាក់នោះ។ គណៈកម្មាធិការវិទ្យាសាស្រ្តអង្គការសហប្រជាជាតិបានទទួលស្គាល់ពីចំនួនមនុស្សស្លាប់ផ្លូវការប្រមាណ ៣០នាក់ដែលជាអ្នកធ្វើការនៅមជ្ឈមណ្ឌល និងក្រុមអ្នកពន្លត់អគ្គីភ័យដោយសារធាតុវិទ្យុសកម្ម។ តែអង្គការក្រៅរដ្ឋាភិបាល Greenpeace បានលើកឡើងក្នុងឆ្នាំ ២០០៦ ពីចំនួនអ្នកស្លាប់ដល់ទៅ ១០០ ០០០នាក់។ នៅដំណាច់ឆ្នាំ ២០១៦ និងដោយមានជំនួយពីសហគមន៍អន្តរជាតិ ដំបូលអាចបត់បែនមានជញ្ជាំងដ៏ធំមួយធ្វើពីដែកថែកក្នុងតម្លៃ ២ ១០០លានអឺរ៉ូបានសាងសង់ឡើងដើម្បីគ្របលើម៉ាស៊ីនប្រតិកម្មគ្រោះថ្នាក់។ ដំបូលនេះមានគោលដៅធានាសុវត្ថិភាពនៅទីតាំងគ្រោះថ្នាក់សម្រាប់រយៈពេល ១០០ឆ្នាំ ពិសេសខ្ទប់ការសាយភាយសារធាតុវិទ្យុសកម្ម។
រដ្ឋអំណាចអ៊ុយក្រែនយល់ឃើញថា គេត្រូវរង់ចាំ ២៤ ០០០ឆ្នាំទៀតទើបមនុស្សអាចចូលទៅរស់នៅដោយសុវត្ថិភាពនៅក្បែរតំបន់ស្ថិតជុំវិញមជ្ឈមណ្ឌលនុយក្លេអ៊ែរឈែនូប៊ីល។ តែអ្វីជាការកត់សម្គាល់ពេលនេះ ទីតាំងគ្រោះថ្នាក់កាលពី ៣៥ឆ្នាំមុនមួយនេះកំពុងក្លាយជាទីកន្លែងទាក់ទាញអ្នកទេសចរណ៍ និងដែលអ៊ុយក្រែងចង់ស្នើសុំចុះទីតាំងនោះទៅក្នុងបញ្ជីបេតិកភ័ណ្ឌពិភពលោករបស់អង្គការយូណេស្កូ។ មួយវិញទៀត អវត្តមានមនុស្សរស់នៅលើទីតាំងមួយនេះបានអនុញ្ញាតឲ្យព្រៃប្រឹក្សារីកលូតលាស់ និងវត្តមានសត្វ ដូចយ៉ាងឥន្ទ្រីមានកន្ទុយពណ៌ ស សត្វខ្លាឃ្មុំ ឬមួយឆ្កែចចកជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ