អេហ្ស៊ីបទិញយន្តហោះចម្បាំង និងគ្រឿងសព្វាវុធបារាំងក្នុងទឹកប្រាក់សរុប ៣ ៩៥០លានអឺរ៉ូ
ប្រទេសអេហ្ស៊ីបបានបញ្ជាក់ពីការទិញយន្តហោះចម្បាំង និងគ្រឿងសព្វាវុធបារាំងដែលមានតម្លៃសរុប ៣ ៩៥០លានដុល្លារ ក្នុងនោះ មានយន្តហោះចម្បាំង Rafale ចំនួន ៣០គ្រឿង។ នៅក្នុងកិច្ចព្រមព្រៀង បារាំងបានយល់ព្រមឲ្យអេហ្ស៊ីបអាចបង់រំលួសជាដំណាក់ការ ហើយកិច្ចសន្យាបង់រំលួសជាដំណាក់ការនេះចុះហត្ថលេខាក្នុងទីក្រុងប៉ារីសនាថ្ងៃអង្គារ ទី៤ ឧសភាជាមួយនឹងគណៈប្រតិភូអេហ្ស៊ីប។ គួររម្លឹកថា អេហ្ស៊ីបជាប្រទេសទី១ ដែលបានបំពាក់យន្តហោះចម្បាំងបារាំងរ៉ាហ្វាល់ ហើយនេះជាការទិញលើកទី២ របស់អេហ្ស៊ីប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
កុងត្រាទិញយន្តហោះចម្បាំងរ៉ាហ្វាល់របស់បារាំងចំនួន ៣០គ្រឿងបន្ថែមទៀតពីអេហ្ស៊ីបត្រូវបានបញ្ជាក់ដោយអ្នកនាំពាក្យក្រសួងការពារជាតិអេហ្ស៊ីបនាយប់ថ្ងៃចន្ទឆ្លងចូលថ្ងៃអង្គារ ទី៤ ឧសភាតាមរយៈសេចក្តីប្រកាសព័ត៌មានមួយ។ តាមអ្នកនាំពាក្យក្រសួងការពារជាតិអេហ្ស៊ីបរូបនេះដដែល កុងត្រាទិញយន្តហោះចម្បាំង និងគ្រឿងសព្វាវុធបារាំងដែលមានទឹកប្រាក់ចំនួន ៣ ៩៥០លានអឺរ៉ូត្រូវបានបារាំងជួយសម្រួលឲ្យមានការបង់រំលួសជាដំណាក់ការសម្រាប់រយៈពេល ១០ឆ្នាំ។ សូមរម្លឹកថា អេហ្ស៊ីបដែលជាប្រទេសដំបូងគេបំពាក់យន្តហោះចម្បាំងបារាំងរ៉ាហ្វាល់ធ្លាប់បានទិញលើកទី១ ចំនួន ២៤គ្រឿងកាលពីឆ្នាំ ២០១៥។
តែគេមិនត្រូវភ្លេចនិយាយទេថា ទំនាក់ទំនងរវាងក្រុងប៉ារីស និងក្រុងគែរដែលធ្លាប់ល្អប្រសើរហាក់បានធ្លាក់ចុះនៅក្រោយដំណើរទស្សនកិច្ចរបស់ប្រធានាធិបតីបារាំងលោកម៉ាក្រុងក្នុងប្រទេសអេហ្ស៊ីបកាលពីខែមករា ឆ្នាំ ២០១៩។ កាលណោះ លោកម៉ាក្រុងបានធ្វើការរិះគន់ ទិតៀនជាសាធារណៈនៅចំពោះមុខសមភាគីអេហ្ស៊ីបលោកអាល់ស៊ីស៊ីពីការរំលោភសិទ្ធិមនុស្សនៅអេហ្ស៊ីប។ តែភាពរកាំរកូសមួយនេះបានបិទបញ្ចប់វិញហើយ ព្រោះជិត ២ឆ្នាំក្រោយមក ពោលក្នុងខែធ្នូ ឆ្នាំ ២០២០ លោកម៉ាក្រុងបានថ្លែងថា លោកនឹងមិនភ្ជាប់លក្ខខណ្ឌនយោបាយការពាររបស់បារាំងទៅនឹងភាពមិនចុះសម្រុងគ្នាលើរឿងផ្សេងទេ។
នៅពេលនោះ លោកម៉ាក្រុងបានទទួលដំណើរទស្សនកិច្ចរយៈពេល ២ថ្ងៃរបស់ប្រធានាធិបតីអេហ្ស៊ីបលោកអាល់ស៊ីស៊ីក្នុងប្រទេសបារាំង និងដែលនាឱកាសនោះ លោកម៉ាក្រុងបានបំពាក់មេដាយកិតិ្តយសឲ្យលោកអាល់ស៊ីស៊ី។ សម្រាប់ក្រុងប៉ារីស ក្រៅពីជាអតិថិជនទី៤ ដែលបានទិញយន្តហោះចម្បាំងរ៉ាហ្វាល់បារាំង អេហ្ស៊ីបក៏ជាសម្ព័ន្ធមិត្តសំខាន់នៅក្នុងយុទ្ធនាការប្រឆាំងភេរវនិយមដែរ។ ក្រៅពីអេហ្ស៊ីប ប្រទេសក្រិកបានកម្មង់ទិញយន្តហោះចម្បាំងរ៉ាហ្វាល់បារាំងចំនួន ១៨គ្រឿង ក្នុងនោះមានជំនំ ១២គ្រឿង ប្រទេសហ្វាំងឡង់កំពុងចរចាទិញ ៦៤គ្រឿង ហើយប្រទេសក្រូអាស៊ី និងប្រទេសស៊្វីសកំពុងប្រៀបធៀបរវាងយន្តហោះចម្បាំងរ៉ាហ្វាល់បារាំង និងយន្តហោះចម្បាំងរបស់ប្រទេសផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ