មេរោគកូវីដបំប្លែងខ្លួនមកពីឥណ្ឌា "ដែលតា"មានអំណាចចម្លងខ្លាំងជាងមេរោគអាល់ហ្វា ៦០%
អង់គ្លេសកំពុងតាមដានជាប់ជានិច្ច ការវិវឌ្ឍនៃមេរោគកូវីដបំប្លែងខ្លួន មកពីឥណ្ឌា ដែលអង្គការសុខភាពពិភពលោកទើបដាក់ឈ្មោះថ្មីថា Delta “ដែលតា”។ នៅមួយសប្តាហ៍ក្រោយ ក្រសួងសុខាភិបាលអង់គ្លេសប្រកាសថា មេរោគកូវីដបំប្លែងខ្លួនថ្មី "ដែលតា" មានសមត្ថភាពចម្លងលឿនជាង មេរោគអាល់ហ្វា ៤០% ការសិក្សាថ្មីមួយទៀតរបស់អង់គ្លេសចុះផ្សាយនៅថ្ងៃ សុក្រទី ១១ មិថុនា បានបង្ហាញថា មេរោគកូវីដបំប្លែងខ្លួនថ្មី Delta មានអំណាចចម្លងខ្លាំង ជាងមេរោគអាល់ហ្វា ដែលមានប្រភព មកពីអង់គ្លេស ដល់ទៅ ៦០%។
ចុះផ្សាយនៅថ្ងៃ៖
អាជ្ញាធរអង់គ្លេសមានការព្រួយបារម្ភខ្លាំង ពីមេរោគកូវីដ ”ដែលតា” ដែលមានអំណាចចម្លងលឿនខ្លាំងជាងមេរោគបំប្លែងខ្លួនផ្សេងៗទៀត។ នៅពេល មេរោគកូវីដអាល់ហ្វា មានប្រភពចេញពីអង់គ្លេស មានសមត្ថភាព ចម្លងលឿនជាងមេរោគដើម មកពីប្រទេសចិន រួចហើយនោះ អាជ្ញាធរសុខភាពអង់គ្លេសទើបរកឃើញថ្មីថា មេរោគកូវីដបំប្លែងខ្លួនថ្មី ដែលតា ដែលមានប្រភពមកពីឥណ្ឌា មានអំណាចចម្លងលឿន ជាង អាល់ហ្វា ដល់ទៅ ៦០%។ នៅសប្តាហ៍មុន អាជ្ញាធរអង់គ្លេសទើបបានប្រកាសថា “ដែលតា”មានអំណាចចម្លងលឿនជាង អាល់ហ្វា មេរោគកូវីដបំប្លែងខ្លួនអង់គ្លេស ប្រមាណ តែ៤០% ប៉ុណ្ណោះ។ ដំណឹងនេះធ្លាក់មក នៅតែ៣ថ្ងៃមុនដែលរដ្ឋាភិបាលអង់គ្លេស ត្រូវប្រកាសវិធានការ ស្តីពីការបើកប្រទេសឡើងវិញ។
អំណាចចម្លងលឿនខ្លាំង បានធ្វើឲ្យ“ដែលតា” វ៉ានាំមុខគេ ក្នុងចំណោមមេរោគកូវីដ ដែលកំពុងចរាចរ នៅអង់គ្លេស។ តាមអាជ្ញាធរអង់គ្លេស ៩០%នៃអ្នកឆ្លងថ្មី នៅសប្តាហ៍នេះ មានផ្ទុកមេរោគកូវីដបំប្លែងខ្លួន “ដែលតា”។ អាចនិយាយបានថា ក្នុងចំណោមអ្នកឆ្លងថ្មី ជាង ៤ម៉ឺន២ពាន់នាក់ ក្នុងមួយសប្តាហ៍ មាន ជាង ៣ម៉ឺន ៣ពាន់នាក់ (៣៣២០៦នាក់) ដែលបានឆ្លង មេរោគកូវីដ”ដែលតា”។ នៅក្នុងចំណោមនោះ មានទាំងអ្នកដែលមិនទាន់បានចាក់វ៉ាក់សាំង ទាល់តែសោះ និងអ្នកចាក់វ៉ាក់សាំង រួចហើយ ( អ្នកមិនទាន់បានចាក់វ៉ាក់សាំងសោះចំនួន ១៩៥៧៣នាក់ អ្នកចាក់វ៉ាក់សាំង បាន១ដូស ចំនួន ៧៧៧៩ និងអ្នកដែលបានចាក់វ៉ាក់សាំង១ដូស ចំនួន ១៧៨៥នាក់)។
មេរោគបំប្លែងខ្លួនថ្មី “ដែលតា” បានធ្វើឲ្យករណីឆ្លងថ្មី នៃជំងឺកូវីដកើនឡើងច្រើន ប៉ុន្តែ ចំនួនអ្នកធ្លាក់ខ្លួនឈឺ ចូលព្យាបាល នៅមន្ទីរពេទ្យ នៅថេរដដែល ប្រមាណ ១ពាន់នាក់ ប៉ុណ្ណោះ។ សម្រាប់លោកស្រី Jenny Harries ប្រធានទីភ្នាក់ងារសន្តិសុខសុខភាព អង់គ្លេស ដែលដកស្រង់សំដី ដោយកាសែតThe Guardian វ៉ាក់សាំងអាចជួយកាត់បន្ថយ មិនឲ្យគេធ្លាក់ខ្លួនឈឺ ប៉ុន្តែ មិនជួយឲ្យគេជៀសរួចផុត ពីការឆ្លងជំងឺកូវីដនោះទេ។ ប្រឈមនឹងការកើនឡើងនៃករណីឆ្លងថ្មី វ៉ាក់សាំង នៅតែ ជាអាវុធការពារខ្លួន ដ៏ប្រសើរជាងគេ។ បើគេចាក់បាន២ដូស គេនឹងទទួលបានការការពារខ្លាំងជាង ទទួលបានវ៉ាក់សាំង ១ដូស។
អង្គការសុខភាពពិភពលោកធ្លាប់ព្រមានពីគ្រោះថ្នាក់នៃមេរោគកូវីដ “ដែលតា” ដែលឆ្លងលឿន និងអាចមានឥទ្ធិពលធ្វើឲ្យប្រសិទ្ធិភាពរបស់ វ៉ាក់សាំងបង្ការកូវីដ ធ្លាក់ចុះខ្សោយ។ ជាក់ស្តែង នៅក្នុងករណីរបស់ប្រទេសអង់គ្លេស ក្នុងចំណោមអ្នកជំងឺ ដែលមានមេរោគ “ដែលតា” ៣៨៣ នាក់ដែលធ្លាក់ខ្លួនឈឺ ចូលព្យាបាល នៅមន្ទីរពេទ្យ មាន ៤២នាក់ ដែលធ្លាប់បានទទួលចាក់វ៉ាក់សាំង ២ដូស រួចហើយ ចំណែក ៨៦នាក់ ដែលមានចាក់វ៉ាក់សាំង ១ដូស និង ២៥១នាក់ ដែលមិនបានចាក់វ៉ាក់សាំង ទាល់តែសោះ។ នៅក្នុងចំណោមអ្នកស្លាប់ដោយសារមេរោគបំប្លែងខ្លួនថ្មី “ដែលតា” ចំនួន ៤២នាក់ នៅក្នុងរយៈពេល ២៨ថ្ងៃចុងក្រោយនេះ មាន ១២នាក់ ដែលធ្លាប់ចាក់វ៉ាក់សាំងបង្ការកូវីដ ២ដូស និង ៧នាក់ ដែលបានចាក់ ១ដូស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ