ការសិក្សា៖វ៉ាក់សាំង Pfizer និង AstraZeneca មានប្រសិទ្ធិភាពប្រឆាំងនឹងវីរុសកូវីដ១៩ បំប្លែងខ្លួនឥណ្ឌា
នៅក្នុងប្រទេសអង់គ្លេស លទ្ធផលនៃការសិក្សាមួយធ្វើឡើងនៅចន្លោះថ្ងៃទី៥ មេសា និងថ្ងៃទី១៦ ឧសភាដោយរដ្ឋអំណាចសុខាភិបាលឈ្មោះ Public Health England បានបង្ហាញនាថ្ងៃសៅរ៍ ទី២២ ឧសភាថា វ៉ាក់សាំង Pfizer និង AstraZeneca ដែលមានប្រសិទ្ធិភាពប្រឆាំងនឹងវីរុសកូវីដ១៩ បំប្លែងខ្លួនអង់គ្លេសក៏មានប្រសិទ្ធិភាពប្រឆាំងទប់នឹងវីរុសកូវីដ១៩ បំប្លែងខ្លួនឥណ្ឌាដែរ។ គ្រាន់តែថា ប្រសិទ្ធិភាពប្រឆាំងនឹងវីរុសកូវីដ១៩ បំប្លែងខ្លួនអង់គ្លេសមានអត្រាខ្ពស់ជាងប្រសិទ្ធិភាពប្រឆាំងនឹងវីរុសកូវីដ១៩ បំប្លែងខ្លួនឥណ្ឌានៅក្រោយការចាក់ដូសទី២ បានពីរសប្តាហ៍ដូចគ្នា។
ចុះផ្សាយនៅថ្ងៃ៖
ស្តាប់ - ០២:៣៩
សម្រាប់វ៉ាក់សាំង Pfizer ប្រសិទ្ធិភាពប្រឆាំងនឹងវីរុសកូវីដ១៩ បំប្លែងខ្លួនឥណ្ឌាមានអត្រា ៨៨% ទល់នឹងវីរុសកូវីដ១៩ បំប្លែងខ្លួនអង់គ្លេសដែលមានអត្រាប្រសិទ្ធិភាព ៩៣%។ ចំណែកវ៉ាក់សាំង AstraZeneca ប្រសិទ្ធិភាពប្រឆាំងនឹងវីរុសកូវីដ១៩ បំប្លែងខ្លួនឥណ្ឌាមានអត្រា ៦០% ទល់នឹងវីរុសកូវីដ១៩ បំប្លែងខ្លួនអង់គ្លេសដែលមានអត្រាប្រសិទ្ធិភាព ៦៦%។ លទ្ធផលនៃការសិក្សានេះបានមកពីការវិភាគលើករណីវីរុសកូវីដ១៩ បំប្លែងខ្លួនចំនួន ១២ ៦៧៥ករណីដែលក្នុងនោះមានវីរុសកូវីដ១៩បំប្លែងខ្លួនឥណ្ឌាចំនួន ១ ០៥៤ករណីដែលគេស្គាល់តាមរយៈអត្តសញ្ញាណ B.1.617.2។
ទន្ទឹមគ្នានេះ លទ្ធផលនៃការសិក្សារបស់ Public Health England ដដែលក៏បានបញ្ជាក់ថា វ៉ាក់សាំង Pfizer និង AstraZeneca មានប្រសិទ្ធិភាព ៣៣% ប្រឆាំងនឹងរោគសញ្ញាដែលបង្កឡើងដោយវីរុសកូវីដ១៩ បំប្លែងខ្លួនឥណ្ឌានៅក្រោយការចាក់ដូសទី១ បានចំនួន ៣សប្តាហ៍ និងប្រមាណជា ៥០% ប្រឆាំងនឹងរោគសញ្ញាដែលបង្កឡើងដោយវីរុសកូវីដ១៩ បំប្លែងខ្លួនអង់គ្លេស។ រដ្ឋមន្រ្តីក្រសួងសុខាភិបាលអង់គ្លេសលោក Matt Hancock បានសាទរដោយបានចាត់ទុកលទ្ធផលនៃការសិក្សាជាដំណឹងល្អ ខណៈដែលរដ្ឋាភិបាលកំពុងរំពឹងលើយុទ្ធនាការចាក់វ៉ាក់សាំងឲ្យពលរដ្ឋដើម្បីប្រឆាំងនឹងវីរុសកូវីដ១៩ បំប្លែងខ្លួនឥណ្ឌា។
នៅក្នុងន័យនេះ និងដើម្បីទប់ស្កាត់វីរុសកូវីដ១៩ បំប្លែងខ្លួនឥណ្ឌាឲ្យកាន់តែមានប្រសិទ្ធិភាព រដ្ឋអំណាចសុខាភិបាលបានកាត់បន្ថយរយៈពេលនៃការចាក់ដូសទី១ និងដូសទី២ ដែលមានគម្លាតដល់ទៅ ៣ខៃមកនៅត្រឹម ២ខែសម្រាប់មនុស្សវ័យជាង ៥០ឆ្នាំ និងមនុស្សងាយរងគ្រោះខ្លាំង។ តាមទិន្នន័យផ្តល់ដោយ Public Health England អង់គ្លេសបានរកឃើញវីរុសកូវីដ១៩ បំប្លែងខ្លួនឥណ្ឌាយ៉ាងតិច ២ ៨៨៩ករណីក្នុងចន្លោះថ្ងៃទី១ កុម្ភៈ និងថ្ងៃទី១៨ ឧសភា។ គួររម្លឹកថា អង់គ្លេសជាប្រទេសអឺរ៉ុបដែលរងគ្រោះខ្លាំងជាងគេដោយកូវីដ១៩ មានស្លាប់ជាង ១២៧ ០០០នាក់។ បច្ចុប្បន្ន មានមនុស្សធំជាង ៧នាក់ក្នុងចំណោម ១០នាក់បានចាក់វ៉ាក់សាំងដូសទី១ និងមានជាង ៤នាក់ក្នុងចំណោម ១០នាក់បានចាក់ចំនួន ២ដូស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ