អ៊ីតាលី៖កិច្ចប្រជុំ G២០ ផ្តោតសំខាន់លើបញ្ហាសេដ្ឋកិច្ច អាកាសធាតុ និងការយកពន្ធពីក្រុមហ៊ុនពហុជាតិ
ថ្ងៃសៅរ៍ ទី១០ កក្កដាជាថ្ងៃទី២ នៃកិច្ចប្រជុំថ្នាក់រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុនៃក្រុមប្រទេស G២០ ដែលរៀបចំនៅក្នុងទីក្រុងវឺនី ប្រទេសអ៊ីតាលី។ បញ្ហាសេដ្ឋកិច្ច អាកាសធាតុ និងការយកពន្ធពីក្រុមហ៊ុនពហុជាតិជាប្រធានបទសំខាន់នៃកិច្ចប្រជុំ G២០ ពេលនេះ។ ថ្លែងនាថ្ងៃសុក្រ ទី៩ កក្កដា រដ្ឋមន្រ្តីក្រសួងហិរញ្ញវត្ថុអាមេរិកលោកស្រីចានែត យេលែនបានអំពាវនាវឲ្យសមភាគី G២០ ចាត់វិធានការជាបន្ទាន់ក្នុងការប្រយុទ្ធប្រឆាំងនឹងការឡើងកម្តៅនៅក្នុងបរិយាកាស។ តាមលោកស្រីយេលែន ក្រុមប្រទេស G២០ ជាអ្នកទទួលខុសត្រូវនៃការបញ្ចេញឧស្ម័នកាបូនិកចំនួន ៨០% ទៅក្នុងបរិយកាស។ ការអំពាវនាវដូចគ្នានេះក៏មានពីរដ្ឋមន្រ្តីក្រសួងសេដ្ឋកិច្ចបារាំងលោកប៊្រុយណូ ឡឺមែរដែរ។ តែទន្ទឹមគ្នានេះ លោកប៊្រុយណូក៏មិនភ្លេចនិយាយពីកិច្ចព្រមព្រៀងនៃការយកពន្ធអប្បបរមាចំនួន ១៥% លើប្រាក់ចំណេញរបស់ក្រុមហ៊ុនពហុជាតិដែល G៧ បានឯកភាពកាលពីដើមខែមិថុនាកន្លងទៅ។ លោកប៊្រុយណូសង្ឃឹមថា កិច្ចព្រមព្រៀងមួយនេះនឹងអាចអនុម័តនៅក្នុងក្របខណ្ឌ G២០ និងថា បារាំងនឹងធ្វើការតស៊ូបន្តទៀតដើម្បីឲ្យអត្រាអប្បបរមាមានលើសពី ១៥%។
ចុះផ្សាយនៅថ្ងៃ៖
ស្តាប់ - ០១:៣៨
« អ្វីដែលយើងត្រូវសម្រេចឲ្យបានពេលនេះ គឺកិច្ចព្រមព្រៀងមួយនៅក្នុងក្របខ័ណ្ឌនៃក្រុមប្រទេស G២០ ស្តីពីការយកពន្ធក្នុងអត្រាអប្បបរមាលើប្រាក់ចំណេញរបស់ក្រុមហ៊ុនពហុជាតិ។ ប្រទេសទាំង ២០ នៅក្នុង G២០ តំណាងឲ្យ ៨៥% នៃផលិតផលសរុបក្នុងស្រុករបស់ពិភពលោក។ យើងមានលទ្ធភាពដែលថា ប្រទេសសមាជិក G២០ និយាយចុះសម្រុងគ្នាលើកិច្ចព្រមព្រៀងមួយស្តីពីពន្ធអាករអន្តរជាតិសម្រាប់សតវត្សទី២១។
កិច្ចព្រមព្រៀងមួយនេះនឹងអនុញ្ញាតឲ្យយើងយកពន្ធលើក្រុមហ៊ុនឌីជីថលពហុជាតិគ្រាក់ៗដែលកំពុងរួចខ្លួនពីការបង់ពន្ធ។ ការរួចខ្លួនពីការបង់ពន្ធនេះជារឿងមួយដែលគ្មានអ្នកណាអាចយល់បាន និងក៏គ្មានអ្នកណាអាចទទួលបានដែរ។ យើងមានលទ្ធភាពឈានទៅសម្រេចឲ្យបាននូវកិច្ចព្រមព្រៀងមួយស្តីពីការយកពន្ធក្នុងអត្រាអប្បបរមាលើក្រុមហ៊ុនឌីជីថលពហុជាតិគ្រាក់ៗ។
ការធ្វើយ៉ាងនេះគឺដើម្បីបញ្ចៀសពីការគេចពន្ធផង និងដើម្បីបង្កើនប្រសិទ្ធភាពក្នុងវិស័យសារពើពន្ធផង។ ប្រទេសបារាំងនឹងធ្វើការតស៊ូដើម្បីឲ្យកិច្ចព្រមព្រៀងមួយនេះសម្រេចបាននៅក្នុងកិច្ចប្រជុំ G២០ ក្នុងទីក្រុងវឺនី។ ទន្ទឹមគ្នានេះ បារាំងក៏នឹងធ្វើការតស៊ូប្រកបដោយសេចក្តីក្លាហានដើម្បីឲ្យការយកពន្ធអប្បបរមាមានអត្រាលើសពី ១៥%។ នេះជាជំហររបស់បារាំងដែលខ្ញុំនឹងការពារនៅក្នុងកិច្ចប្រជុំ G២០ ថ្ងៃនេះ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ