បារាំង និងអាមេរិកសាទរលើកិច្ចព្រមព្រៀងរបស់ G៧ ស្តីពីការយកពន្ធអប្បបរមាលើក្រុមហ៊ុនពហុជាតិ
កិច្ចប្រជុំថ្នាក់រដ្ឋមន្រ្តីហិរញ្ញវត្ថុនៃក្រុមប្រទេស G៧ រយៈពេល ២ថ្ងៃក្នុងទីក្រុងឡុងដ៏ ប្រទេសអង់គ្លេសបានបិទបញ្ចប់នារសៀលថ្ងៃសៅរ៍ ទី៥ មិថុនា។ នៅក្នុងសេចក្តីថ្លែងការណ៍រួម G៧ បានអនុម័តលើកិច្ចព្រមព្រៀងមួយស្តីពីការយកពន្ធក្នុងអត្រាអប្បបរមាចំនួន ១៥% ពីក្រុមហ៊ុនពហុជាតិ និងការបែងចែកលុយពន្ធដែលប្រមូលបានពីក្រុមហ៊ុនពហុជាតិ ពិសេសក្រុមហ៊ុនឌីជីថលពហុជាតិគ្រាក់ៗ។ អាមេរិកតាមរយៈរដ្ឋមន្រ្តីសេដ្ឋកិច្ចបានសាទរលើកិច្ចព្រមព្រៀងរបស់ G៧ ដោយចាត់ទុកជាកិច្ចព្រមព្រៀងមិនធ្លាប់មាន។ ចំណែករដ្ឋមន្រ្តីសេដ្ឋកិច្ច និងហិរញ្ញវត្ថុបារាំងលោកប៊្រុយណូ ឡឺមែរក៏បានសាទរ និងចាត់ទុកជាកិច្ចព្រមព្រៀងមួយជាប្រវត្តិសាស្រ្តដែលបារាំងបានធ្វើការតស៊ូ និងទាមទារអស់ពេល ៤ឆ្នាំមកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
« គឺជាកិច្ចព្រមព្រៀងមួយជាប្រវត្តិសាស្រ្ត។ អស់ពេលជាច្រើនឆ្នាំកន្លងមក នេះជាលើកទី១ ដែលប្រទេសសមាជិកក្នុងក្រុម G៧ បានឯកភាពគ្នាក្នុងការកំណត់ចេញនូវច្បាប់សម្រាប់ប្រព័ន្ធអន្តរជាតិនៃសតវត្សរ៍ទី២១។ គឺជាកិច្ចព្រមព្រៀងមួយដែលបារាំងមិនអាចលាក់បាំងពីមោទនភាពរបស់ខ្លួនបានឡើយ។
បារាំងមានមោទនភាព ព្រោះអស់រយៈពេល ៤ឆ្នាំមកហើយដែលបារាំងបានធ្វើការតស៊ូ និងទាមទារនៅក្នុងគ្រប់វេទិកាទាំងអស់ ទាំងនៅក្នុងវេទិកាអឺរ៉ុប និងវេទិកាអន្តរជាតិ ដូចជានៅ G៧ ពេលនេះ ឬមួយក៏នៅ G ២០ ដើម្បីឲ្យម្ចាស់ក្រុមហ៊ុនឌីជីថលពហុជាតិបង់ពន្ធត្រឹមត្រូវ និងដើម្បីឲ្យមានការបង់ពន្ធអប្បបរមាពីក្រុមហ៊ុនពហុជាតិ។ ឥឡូវនេះ ការតស៊ូ និងការទាមទាររបស់យើងបានសម្រេចហើយ។
ក្រោយការតស៊ូ ទាមទារអស់រយៈពេល ៤ឆ្នាំ ប្រទេសបារាំងទទួលបានជោគជ័យ។ ពិតជានឹងមានការបង់ពន្ធរបស់ម្ចាស់ក្រុមហ៊ុនឌីជីថលពហុជាតិ ហើយពិតជានឹងមានការបង់ពន្ធអប្បបរមារបស់ក្រុមហ៊ុនពហុជាតិ។ កម្មវត្ថុនៃការបង្កើតឲ្យមានពន្ធនេះឡើង គឺដើម្បីបញ្ជៀសការគេចពន្ធ និងដើម្បីបង្កើនប្រសិទ្ធិភាពក្នុងវិស័យសារពើពន្ធ។
កិច្ចព្រមព្រៀងដែលក្រុមប្រទេស G៧ បានសម្រេចពេលនេះជាកិច្ចព្រមព្រៀងមួយប្រកបដោយមហិច្ឆតា។ អត្រាពន្ធអប្បបរមាដែលយើងបានកំណត់ឲ្យក្រុមហ៊ុនពហុជាតិបង់មានចំនួន ១៥%។ ខ្ញុំចង់បញ្ជាក់ថា តិចបំផុតត្រូវបង់ ១៥% ហើយនេះគ្រាន់ជាចំណុចចាប់ផ្តើមប៉ុណ្ណោះ។ នៅប៉ុន្មានខែខាងមុខ យើងនឹងធ្វើការតស៊ូបន្ថែមទៀតដើម្បីឲ្យអត្រាពន្ធអប្បបរមានេះនឹងកើនឡើងខ្ពស់បំផុតដែលអាចធ្វើទៅបាន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ