អូណូដា ទាហានជប៉ុនដែលធ្វើបន្តធ្វើសង្រ្គាមលោកលើកទី២ អស់៣០ឆ្នាំនៅហ្វីលីពីន
មហោស្រពភាពយន្តអន្តរជាតិលើកទី៧៤នៅទីក្រុងកាន ប្រទេសបារាំង ដោយផ្តោតអារម្មណ៍ជាពិសេសការចាក់បញ្ចាំងខ្សែភាពយន្តខ្នាតវែងរឿង អូណូដា ដែលត្រូវបានជ្រើសរើសសម្រាប់ការប្រកួតប្រជែងរង្វាន់ផ្នែកCertains regards របស់មហោស្រព។ រឿងអូណូដាត្រូវបានថតមួយផ្នែកធំ នៅប្រទេសកម្ពុជា កាលពីឆ្នាំ ២០១៩។ ដឹកនាំរឿងដោយសមិទ្ធិករបារាំង លោក Arthur Harari រឿងអូណូដា ដកស្រង់ចេញពី ខែ្សរឿងជីវិតពិតរបស់ទាហានជប៉ុនម្នាក់ ឈ្មោះអូណូដា ដែលមិនព្រមចុះចាញ់ ដាក់អាវុធនៅក្រោយចប់សង្រ្គាមលោកលើកទី២ ហើយនៅតែបន្តធ្វើសង្រ្គាមតែម្នាក់ឯង អស់៣០ឆ្នាំ នៅកោះ លូបង់ ប្រទេសហ្វីលីពីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៤០
នៅក្រោយការបណ្តុះបណ្តាលក្នុងកងកម្លាំងពិសេស នាយទាហាន Hiroo Honoda ត្រូវបានបញ្ជូនទៅកាន់កោះលូបង់ ប្រទេសហ្វីលីពីន នៅតែប៉ុន្មានថ្ងៃមុន ជប៉ុនចុះចាញ់សង្រ្គាមលោកលើកទី២។ ប៉ុន្តែ នៅពេលអធិរាជជប៉ុនសុខចិត្តចុះចាញ់សង្រ្គាមក្រោមអំណាចគ្រាប់បែកនុយក្លេអ៊ែររបស់អាមេរិក នាយទាហានអូណូដា មិនព្រមទទួលស្គាល់ និងស្តាប់ថា សង្រ្គាមលោកចប់នោះទេ។ ដោយរើសទាហានស្ម័គ្រចិត្ត ៣នាក់ផ្សេងទៀត នៅលើកោះហ្វីលីពីន អូណូដា នៅបន្តធ្វើសង្រ្គាមសម្ងាត់ អស់៣០ឆ្នាំ។ នៅពេលសង្រ្គាមលោកលើកទី២ចប់ទាំងស្រុងនៅឆ្នាំ ១៩៤៥ សង្រ្គាមតស៊ូរស់នៅក្នុងព្រៃរបស់អូណាដា ដែលមានរយៈពេល ១ម៉ឺនយប់ បានចប់នៅ ឆ្នាំ ១៩៧៤។ អូណូដាអាចយល់ព្រមដាក់អាវុធ លុះត្រាតែ អតីតមេបញ្ជាការរបស់ខ្លួនចេញមុខផ្ទាល់ ទៅអានព្រះរាជលិខិតចុះចាញ់របស់អធិរាជជប៉ុន។ សម្រាប់អ្នកដឹកនាំរឿង លោកArthur Harari រឿងប្រវត្តិរបស់ទាហានជប៉ុនអូណូដា គួរចាប់អារម្មណ៍ ព្រោះវាជារឿងដែលមិនគួរឲ្យជឿ។ អូណូដាដែលបានជឿងប់ងុលថា សង្រ្គាមនៅមិនទាន់ចប់ នៅតែជឿជាក់ថា ជប៉ុននឹងអាចឈ្នះសង្រ្គាមតាមរយៈសង្រ្គាមតស៊ូក្នុងព្រៃ ក្នុងរយៈពេលវែង ដល់ទៅ ៣០ឆ្នាំ។
"ខ្ញុំមិនជឿថា ខ្ញុំបានលើកតម្កើងតួអង្គទាហានអូណូដា ជាវីរជននោះទេ។ នៅក្នុងកុន យើងឃើញទាហានអូណូដា ធ្វើរឿងដ៏អាក្រក់ ឃោឃៅ ដូចជាសម្លាប់មនុស្ស រើសអើងពូជសាសន៍ ហើយពេលខ្លះគឺហិង្សាមែនទែនសូម្បីជាមួយទាហានជប៉ុន គ្នារបស់គាត់ ឬក៏ក្បាលរឹងមិនពិភាក្សាអ្វីទាំងអស់ នៅពេលមានអ្នកមិនជឿទុកចិត្តគាត់។
សម្រាប់ខ្ញុំ បើនិយាយពីអូណូដា គេមិនអាចនិយាយតែរូបភាពវីរជននោះទេ។ ប៉ុន្តែ វាមានអ្វីលើសពីហ្នឹងទៀត។ អូណូដាបានធ្វើអ្វីមួយ ដែលគ្មាន ឬកម្រមានអ្នកណាធ្វើដូច។ អូណូដាបានយល់ខុសអស់ ៣០ឆ្នាំ។ គាត់បានធ្វើកំហុសដ៏ធំ។ គេបានប្រាប់គាត់ថា សង្រ្គាមបានចប់ហើយ ប៉ុន្តែ គាត់មិនព្រមស្តាប់ជឿនោះទេ។ បើនិយាយពីចំណុចនេះ គេពិបាកនឹងចូលចិត្តតួអង្គអូណូដានេះណាស់។
ចំណែកខ្ញុំវិញ ខ្ញុំមិនចង់ផ្តោតសំខាន់លើវីរជន ឬមិនវីរជនរបស់អូណូដានោះទេ។ ខ្ញុំចាប់អារម្មណ៍ ចង់ស្វែងយល់ភាគច្រើនថា តើគាត់ភូតកុហកខ្លួនឯង អស់ជាច្រើនឆ្នាំបានយ៉ាងម៉េច និងហេតុអ្វីបានជាគាត់ធ្វើដូច្នេះ? ខ្ញុំមិនចង់ធ្វើកុនមួយដែលគ្រាន់តែបង្ហាញថា តួអង្គអូណូដាជាវីរជន ព្រោះគាត់បានធ្វើរឿងដ៏អស្ចារ្យកម្រនឹងមាន នោះទេ។ ប៉ុន្តែ គំនិតធ្វើកុនរបស់ខ្ញុំគឺចង់ឲ្យគេឃើញពីអត្តចរឹតដ៏ពិបាកយល់របស់តួទាហានអូណូដា។"
ធ្វើសង្រ្គាមតស៊ូក្នុងព្រៃ តាំងពីមានគ្នីគ្នា ៤នាក់ រហូតនៅសល់តែម្នាក់ឯង អូណូដា ត្រូវគេចាត់ទុកជាទាហានជប៉ុនចុងក្រោយគេដែលបានចុះចាញ់ដាក់អាវុធ នៅក្នុងសង្រ្គាមលោកលើកទី២។ អូណូដាបានចំណាយពេលអស់៣០ឆ្នាំនៅក្នុងព្រៃកោះហ្វីលីពីន។ ប៉ុន្តែ សមិទ្ធិករភាពយន្តបារាំង លោកArthur Harari បានសង្ខេបនៅតែ៣ម៉ោង។ ខ្ញុំសុំមិនលម្អិតបន្ថែមសាច់រឿងនេះទេ ដោយទុកឲ្យលោកអ្នកនាងស្វែងតាមដានដោយខ្លួនឯង នៅក្នុងខ្សែរឿង អូណូដា ដែលនឹងចាក់ផ្សាយនៅប្រទេសបារាំង ចាប់ពីថ្ងៃទី ២១កក្កដា។ សម្រាប់ការចាក់បញ្ចាំងនៅប្រទេសកម្ពុជា លោក Arthur Harari សង្ឃឹមថា នឹងអាចកើតមាននៅពេលឆាប់ៗខាងមុខ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ