សមាជដើម្បីស្រោចស្រង់ធម្មជាតិដែលកំពុងជិតផុតរលត់ពីលើផែនដី
សហភាពអន្តរជាតិដើម្បីអភិរក្សធម្មជាតិ ដែលជាអង្គការការពារធម្មជាតិ របស់អង្គការសហប្រជាជាតិបានបើកសមាជពិភពលោក កាលពីថ្ងៃសុក្រទី ៣កញ្ញា ក្នុងគោលដៅជំរុញ ឲ្យគេចូលរួមការពារ ផែនដី ដែលកាន់តែ ទុ្រឌទ្រោម ដោយសារស្នាដៃរបស់មនុស្ស។ ជាសញ្ញាទាញអាសន្ន ដើម្បីឲ្យគេចាត់វិធានការបន្ទាន់ អង្គការការពារធម្មជាតិរបស់អង្គការសហប្រជាជាតិ នឹងបញ្ចេញ នៅថ្ងៃសៅរ៍នេះ នូវតារាងសត្វ និងរុក្ខជាតិ ដែលកំពុងប្រឈមខ្លាំងនឹងការរលាយផុតពូជពីលើផែនដី។
ចុះផ្សាយនៅថ្ងៃ៖
ស្តាប់ - ០២:២៣
ជីវចម្រុះធ្លាក់ថយចុះ គួរឲ្យកត់សំគាល់។ សត្វ និងរុក្ខជាតិជិត១លានប្រភេទ កំពុងប្រឈមនឹងការរលាយផុតពូជពីលើផែនដី។ អ្នកជំនាញខាងជីវចម្រុះរបស់អង្គការសហប្រជាតិធ្លាប់បានព្រមានតាំងពីឆ្នាំ២០១៩ មកម្ល៉េះថា ធម្មជាតិបានចាប់រិចរិល ថយចុះយ៉ាងលឿនរហ័ស មិនធ្លាប់មាន ក្នុងប្រវត្តិមនុស្សជាតិ។
ការធ្លាក់ថយចុះនៃចំនួនជីវចម្រុះ ដែលគេវាយតម្លៃថា អាចជាការលាយផុតពូជក្នុងទ្រង់ទ្រាយធំ កំពុងចោទជាបញ្ហា ដល់ ការរស់រាន មានជីវិតរបស់មនុស្សនៅលើផែនដី។ នេះគេនៅមិនទាន់និយាយដល់គ្រោះមហន្តរាយធម្មជាតិ ដូចជា ខ្យល់ព្យុះ ទឹកជំនន់ ភ្លើងឆេះព្រៃ ភាពរាំងស្ងួត ដែលជាលទ្ធផលនៃការប្រែប្រួលអាកាសធាតុ ដែលមនុស្សជាអ្នកបង្កឡើង។
សម្រាប់អគ្គលេខាធិការសហភាពអន្តរជាតិដើម្បីអភិរក្សធម្មជាតិ មនុស្សជាតិកំពុងប្រឈមនឹងវិញ្ញាសារដ៏ធំ។ “យើងឃើញការប្រែប្រួលអាកាសធាតុបង្កផលប៉ះពាល់ប៉ុណ្ណាដល់សង្គមរស់នៅ។ យើងឃើញ ជីវចម្រុះរលាយបាត់ខ្លួន ចំណែក ជំងឺរាតត្បាតកំពុងវាយបំផ្លាញ សេដ្ឋកិច្ចរបស់យើង គ្រួសារយើង និងសុខភាពយើង។ ជាមួយគ្នានោះ យើងក៏ដឹងដែរថា បញ្ហាទាំងនោះ មានជាប់ទាក់ទងនឹងសកម្មភាពរបស់មនុស្សយើងនេះដែរ។” នេះជាប្រសាសន៍របស់លោក Bruno Oberle នៅប៉ុន្មានម៉ោងមុនបើកសមាជ កាលពីថ្ងៃសុក្រ ទី ៣ខែកញ្ញា។
ស្ថានភាពទឹកសមុទ្រដែលប៉ះពាល់ដោយសារការប្រែប្រួលអាកាសធាតុ ការបំពុល ជាពិសេស កាកសំណល់ប្លាស្ទិក ជាប្រធានបទសំខាន់មួយរបស់សមាជ ដែលមានមនុស្សចុះឈ្មោះ ចូលរួមជាង ៥ពាន់នាក់។ នៅក្នុងពិធីបើកសម្ពោធ សមាជកាលពីថ្ងៃសុក្រទី ៣កញ្ញា លោកប្រធានាធិបតីបារាំង អេម៉ានុយអែល ម៉ាក្រុងបានប្រកាសថា បារាំងនឹងរៀបចំជំនួបកំពូលស្តីពីមហាសមុទ្រ នៅចុងឆ្នាំ ២០២១ ឬដើមឆ្នាំ ២០២២។
សមាជស្តីពីការពារធម្មជាតិដែលត្រូវប្រព្រឹត្តទៅរហូតដល់ថ្ងៃទី ១១កញ្ញា ត្រូវបោះឆ្នោតផងដែរ លើញត្តិ ដែលទាមទារឲ្យរដ្ឋាភិបាលដាក់បញ្ចូល ការការពារធម្មជាតិ ក្នុងផែនការ ជំរុញសេដ្ឋកិច្ច នៅក្រោយ សម័យកូវីដ។ ដើម្បីបញ្ចុះបញ្ចូល ឲ្យគេយល់ច្បាស់ ពីគ្រោះថ្នាក់ពិតៗ នៃការធ្លាក់ចុះ ជីវចម្រុះ សហភាព ដើម្បីការពារធម្មជាតិ នឹងបង្ហាញ ឈ្មោះ សត្វ និងរុក្ខជាតិ ដែលស្ថិតក្នុងបញ្ជីក្រហម ប្រឈមនឹងការរលាយផុតពូជ ដោយសារសកម្មភាពបំផ្លាញ មិនឈប់ឈរ របស់មនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ