បេឡារុស កាត់ទោសមេដឹកនាំចលនាប្រឆាំងដាក់ពន្ធនាគារ១១ឆ្នាំ
នៅថ្ងៃចន្ទទី ៦កញ្ញា២០២១នេះ តុលាការបេឡារុស បានដាក់ទោស អ្នកស្រី ម៉ារីយ៉ា កូឡេស្នីកូវ៉ា Maria Kolesnikova មេដឹកនាំចលនាបាតុកម្មម្នាក់ ឱ្យជាប់ពន្ធនាគារចំនួន១១ឆ្នាំ។ ជាទោសដ៏ធ្ងន់ដែលបញ្ជាក់ថារបបសឹកនាំរបស់លោកអាឡិចសង់លូកាឆេនកូ បង្ក្រាបមិនរើសមុខ រាល់គ្រប់ទម្រង់នៃការបះបោរប្រឆាំងនឹងរដ្ឋាភិបាល។ សហភាពអឺរ៉ុបបានបរិហារក្រុង Minsk ថាម៉ាក់ងាយ សិទ្ធិមនុស្ស ដោយឥតលាក់លៀម។
ចុះផ្សាយនៅថ្ងៃ៖
ស្តាប់ - ០២:១៣
មានអាយុ៣៩ឆ្នាំ អ្នកស្រី ម៉ារីយ៉ា កូឡេស្នីកូវ៉ា ត្រូវតុលាការបេឡារុសដែលបានបើកសវនាការដោយបិទទ្វារតាំងពីដើមសីហាមក រកឃើញថាមានទោសពីបទផ្សំគំនិតក្បត់ចង់ផ្តួលរដ្ឋអំណាច នាំគេធ្វើសកម្មភាពដែលប៉ះពាល់ដល់សន្តិសុខជាតិ និងបានបង្កើតក្រុមជ្រុលនិយម។ ដោយសារទោសកំហុសនេះ អ្នកស្រីត្រូវជាប់ពន្ធនាគារចំនួន១១ឆ្នាំ ចំណែកតំណាងបក្សប្រឆាំងម្នាក់ទៀត ដែលអ្នកស្រី កូឡេស្នីកូវ៉ា ធ្វើការជាមួយ ត្រូវជាប់ពន្ធនាគារចំនួន១០ឆ្នាំ។
ដៃជាប់ខ្នោះ បបូរមាត់លាបក្រែមក្រហមឆ្អៅ កាត់សក់ខ្លី អ្នកស្រី កូឡេស្នីកូវ៉ា មានទឹកមុខញញឹមស្រស់ និងដើម្បីបង្ហាញពីភាពមិនទុកចិត្តលើរដ្ឋាភិបាល អ្នកស្រីរាំ ក្នុងទ្រុងក្រចកសេះសម្រាប់ដាក់អ្នកជាប់ចោទ ផង មុននឹងសវនាការប្រកាសសាលក្រម។ នេះបើតាមរូបភាពវីដេអូ បង្ហោះតាមប្រព័ន្ធតេឡេក្រាម។
ការកាត់ទោសដាក់ពន្ធនាគារអ្នកស្រី កូឡេស្នីកូវ៉ា រងការរិះគន់និងបរិហារពីគ្រប់ទិសទី។ សហភាពអឺរ៉ុបបានចាត់ទុកទង្វើរបស់បេឡារុសថាបានប្រមាថ “សិទ្ធិមនុស្ស” យ៉ាងងងើល។ ចំណែកបែរឡាំងវិញបានបរិហារថាជាការកាត់ទោសយ៉ាងអយុត្តិធម៌។ ត្រូវតែបញ្ឈប់ទង្វើបង្ក្រាបនេះភ្លាម ! នេះជាការទាមទាររបស់អង់គ្លេស។ គេមិនអាចបំភ្លេចសេចក្តីក្លាហានរបស់អ្នកកូឡេស្នីកូវ៉ា ដែលសម្រេចចិត្តមិនចាកចេញពីប្រទេស ទោះបីមានការគំរាមកំហែងជាប់ពន្ធនាគារយ៉ាងធ្ងន់ធ្ងរបានទេ។ នេះជាសេចក្តីថ្លែងការណ៍របស់អង្គការAmnesty International។
សូមបញ្ជាក់ថាអ្នកស្រី ម៉ារីយ៉ា កូឡេស្នីកូវ៉ា ជាមេដឹកនាំចលនាប៉ះបោរម្នាក់ក្នុងចំណោមមេដឹកនាំចលនាបីនាក់ ដែលបាននាំគ្នាធ្វើបាតុកម្ម កាលពីរដូវក្តៅឆ្នាំ២០២០ ដើម្បីបរិហារប្រឆាំងនឹងការជាប់ឆ្នោតជាថ្មីរបស់លោកប្រធានាធិបតី លូកាឆេនកូ។ ប្រធានាធិបតី ដែលកាន់អំណាចនៅបេឡារុសតាំងពីឆ្នាំ១៩៩៤មក។ ជាការបាតុកម្មតវ៉ាទ្រង់ទ្រាយធំមិនធ្លាប់មាន ដែលអាជ្ញាធរបានបង្ក្រាបនិងចាប់ខ្លួនបាតុករជាច្រើនរយនាក់។ អ្នកស្រីបានជាប់ឃុំឃាំងក្នុងពន្ធនាគារតាំងពីខែកញ្ញា២០២០មក។ ចំណែកមេដឹកនាំចលនាពីរនាក់ផ្សេងទៀត បានរត់ភៀសខ្លួនចេញប្រទេសក្រោមសម្ពាធរបស់អាជ្ញាធរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ