អង្គការសុខភាពពិភពលោកចង់បំបាត់ជំងឺរលាកស្រោមខួរឲ្យអស់នៅឆ្នាំ ២០៣០
នៅថ្ងៃអង្គារ ទី២៨ កញ្ញា អង្គការសុខភាពពិភពលោក WHO បានបង្ហាញចេញនូវយុទ្ធសាស្រ្តសកល ឬផែនទីចង្អុលផ្លូវសកលមួយក្នុងការប្រឆាំងនឹងជំងឺរលាកស្រោមខួរ។ តាមរយៈយុទ្ធសាស្រ្តសកលមួយនេះ WHO ចង់លុបបំបាត់ឲ្យអស់ពីពេលនេះទៅឆ្នាំ ២០៣០ នូវការរីករាលដាលនៃជំងឺរលាកស្រោមខួរដោយបាក់តេរីដែលបានសម្លាប់មនុស្សប្រមាណជា ២៥០.០០០នាក់ក្នុងមួយឆ្នាំនៅទូទាំងពិភពលោក។
ចុះផ្សាយនៅថ្ងៃ៖
ស្តាប់ - ០១:៥៨
តាមរយៈយុទ្ធសាស្រ្តសកល ឬផែនទីចង្អុលផ្លូវសកលនៃការប្រឆាំងនឹងជំងឺរលាកស្រោមខួរពេលនេះ អង្គការសុខភាពពិភពលោកសង្ឃឹមអាចជួយសង្រ្គោះជីវិតមនុស្សបានជាង ២០០ ០០០នាក់ក្នុងមួយឆ្នាំ និងចូលរួមកាត់បន្ថយនូវបន្ទុកពិការភាពបានយ៉ាងច្រើ់ន។ លោកទេដ្រូស អគ្គនាយកអង្គការសុខភាពពិភពលោកបានថ្លែងនៅក្នុងសេចក្តីប្រកាសព័ត៌មានមួយថា ទីណាដែលមានវត្តមានជំងឺរលាកស្រោមខួរ ជំងឺមួយនេះអាចបង្កដល់ស្លាប់ និងធ្វើឲ្យអ្នកជំងឺចុះខ្សោយ។ ជាជំងឺឆ្លងកាចសាហាវ ឆាប់រហ័ស រួចបង្កចេញនូវផលវិបាកធ្ងន់ធ្ងរដល់សុខភាព សេដ្ឋកិច្ច និងសង្គម។
តាមលោកទេដ្រូស វាល្មមដល់ពេលដែលគេត្រូវកំចាត់ជំងឺរលាកស្រោមខួរឲ្យដល់ឫសគល់នៅទូទាំងពិភពលោក។ ដើម្បីអាចឈានដល់គោលដៅនេះបាន ប្រមុខអង្គការសុខភាពពិភពលោកស្នើឲ្យពង្រីកបន្ថែមជាបន្ទាន់នូវលទ្ធភាពនៃការទទួលបាននូវវិធីសាស្រ្តព្យាបាលដែលមានស្រាប់ ពិសេសទទួលបានវ៉ាក់សាំង ធ្វើការស្រាវជ្រាវ និងការបង្កើតថ្មីដើម្បីបង្ការ និងទប់ស្កាត់លើដើមចមនៃជំងឺ រួមទាំងធ្វើឲ្យប្រសើរឡើងនូវសេវាស្តារកាយសម្បទា។ គួររម្លឹកថា ជំងឺរលាកស្រោមខួរដោយបាក់តេរីបានសម្លាប់អ្នកជំងឺម្នាក់ក្នុងចំណោមអ្នកជំងឺ ១០នាក់ ពិសេសកូនក្មេង និងយុវជន។
មួយវិញទៀត ជំងឺដដែលមួយនេះបានធ្វើអ្នកជំងឺម្នាក់ក្នុងចំណោម ៥នាក់ធ្លាក់ខ្លួនពិការរយៈពេលយូរដោយមានបញ្ហាត្រចៀកស្តាប់មិនសូវឮ ភ្នែកមើលមិនសូវឃើញ ឬមួយក៏មានវិបត្តិបញ្ញាញាណ។ តាមអង្គការសុខភាពពិភពលោក ការរាតត្បាតនៃជំងឺរលាកស្រោមខួរជារឿងមិនអាចទាយទុកមុនបាន និងបានធ្វើឲ្យរំខានខ្លាំងដល់សហគមន៍ រួមទាំងប្រព័ន្ធសុខាភិបាល។ ក្នុងរយៈពេល ១០ឆ្នាំចុងក្រោយនេះ ការរាតត្បាតនៃជំងឺរលាកស្រោមខួរបានកើតមាននៅគ្រប់តំបន់ក្នុងលោក ពិសេសនៅក្នុង ២៦ប្រទេសអាហ្រ្វិកសាហារ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ