ប្រមុខការទូតអាមេរិកបំពេញទស្សនកិច្ចនៅបារាំង ខណៈដែលបារាំងមិនទាន់បាត់ខឹងអាមេរិក
នៅថ្ងៃអង្គារ ទី៥ តុលា ប្រមុខការទូតអាមេរិកលោកអង់តូនី ប៊្លីនកិនបានបំពេញទស្សនកិច្ចក្នុងប្រទេសបារាំង។ នៅក្នុងទីក្រុងប៉ារីស លោកប៊្លីនកិនត្រូវបានទទួលជួបដោយសមភាគីបារាំងលោកហ្សង់អ៊ីវ ឡឺឌ្រីយ៉ង់ និងប្រធានាធិបតីបារាំងលោកអេម៉ានុយអែល ម៉ាក្រុង។ នេះមិនមែនជាលើកទី១ ទេដែលលោកប៊្លីនកិនបានធ្វើដំណើរទៅកាន់ប្រទេសបារាំង។ តែវត្តមានរបស់លោកក្នុងទឹកដីបារាំងលើកនេះបានធ្វើឡើង ក្រោយពីប្រទេសសម្ព័ន្ធមិត្តទាំងពីរបានស្គាល់ភាពរកាំរកូសខ្លាំងដោយសារវិបត្តិនាវាមុជទឹកកាលពីពាក់កណ្តាលខែកញ្ញា។
ចុះផ្សាយនៅថ្ងៃ៖
ស្តាប់ - ០២:០៩
បើតាមការប្រកាសរបស់វិមានប្រធានាធិបតីបារាំងអេលីហ្សេ ជំនួបទល់មុខគ្នារវាងប្រមុខការទូតអាមេរិកលោកប៊្លីនកិន និងប្រធានាធិបតីបារាំងលោកម៉ាក្រុងចូលរួមស្តារឡើងវិញនូវទំនុកចិត្តបារាំង អាមេរិក និងថា ប្រទេសសម្ព័ន្ធមិត្តទាំងពីរបន្តការងារសម្របសម្រួលដើម្បីផលប្រយោជន៍រួម ទោះក្នុងកិច្ចសហប្រតិបត្តិការរវាងអឺរ៉ុប អង្គការអូតង់ នៅតំបន់សាហ៊ែល ឬមួយក៏នៅលំហឥណ្ឌូប៉ាហ្វិកក៏ដោយ។ ចំណែកអ្នកទទួលខុសត្រូវអាមេរិកម្នាក់បានសាទរពីកិច្ចសន្ទនាប្រកបដោយវិជ្ជមាន ការស្ថាបនា និងថា មានកិច្ចព្រមព្រៀងរួមដែលភាគីទាំងពីរមានឱកាសធ្វើឱ្យបានស៊ីជម្រៅ និងពង្រឹងបន្ថែមទៀត។
តែអ្នកទទួលខុសត្រូវអាមេរិករូបនេះដដែលបានទទួលស្គាល់ថា មានការងារជាច្រើនទៀតដែលត្រូវធ្វើក្នុងការស្វែងរកសេចក្តីសម្រេចជាក់ច្បាស់ដើម្បីដាក់ជូនប្រធានាធិបតីអាមេរិកលោកបៃដិន និងសមភាគីបារាំងលោកម៉ាក្រុងដែលគ្រោងជួបគ្នានាដំណាច់ខែតុលាខាងមុខលើទឹកដីអឺរ៉ុប។ គួររម្លឹកថា វត្តមានរបស់លោកប៊្លីនកិនក្នុងប្រទេសបារាំងពេលនេះបានធ្វើឡើង នៅក្រោយវិបត្តិនាវាមុជទឹករវាងបារាំង និងអាមេរិក។ វិបត្តិមួយនេះបានផ្ទុះឡើងកាលពីពាក់កណ្តាលខែកញ្ញានៅពេលដែលប្រធានាធិបតីអាមេរិកលោកបៃដិនបានប្រកាសពីសម្ព័ន្ធមិត្តថ្មីត្រីភាគីជាមួយប្រទេសអូស្រា្តលី និងអង់គ្លេសសម្រាប់តំបន់ឥណ្ឌូប៉ាស៊ីហ្វិក។
តាមរយៈសម្ព័ន្ធមិត្តថ្មីត្រីភាគីដែលហៅ AUKUS អូស្រ្តាលីបានលុបកិច្ចសន្យាទិញនាវាមុជទឹកបារាំងចំនួន ១២គ្រឿងដោយងាកទៅទិញនាវាមុជទឹកអាមេរិកវិញ។ ទង្វើរបស់អាមេរិកបានធ្វើឲ្យបារាំងខឹងសម្បារយ៉ាងខ្លាំង។ គឺទើបនៅក្រោយការហៅទូរស័ព្ទរបស់លោកបៃដិនទៅកាន់លោកម៉ាក្រុងទេដែលភាពតានតឹងមានការធ្លាក់ចុះបន្តិច។ តែយ៉ាងណាក៏ដោយ អ្វីៗហាក់នៅមិនទាន់អាចត្រឡប់ទៅរកភាពប្រក្រតីដូចមុនឡើងវិញទេ។ គ្មានសន្និសីទកាសែតរួមត្រូវបានគ្រោងទុក ហើយជំនួបរវាងលោកប៊ីនក្លិនជាមួយលោកម៉ាក្រុង និងលោកឡឺឌ្រីយ៉ង់ ពិសេសជាមួយលោកឡឺឌ្រីយ៉ង់ក៏មិនសូវរាក់ទាក់ ស្និទស្នាលដូចជំនួបលើកមុនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ