អនុប្រធានាធិបតីអាមេរិកទៅប៉ារីសដើម្បីបន្ធូរបន្ថយភាពតានតឹងជាមួយបារាំង
អនុប្រធានាធិបតីអាមេរិកអ្នកស្រី ខាម៉ាឡា ហារីស បានទៅដល់ទីក្រុងប៉ារីសនៅថ្ងៃអង្គារ ទី៩ វិច្ឆិកា ក្នុងបេសកកម្មស្តារទំនាក់ទំនងជាមួយប្រទេសបារាំង។ ទំនាក់ទំនងដែលបានប្រែជាតានតឹង នៅក្រោយពេលដែលអូស្ត្រាលីបោះបង់ចោលកិច្ចសន្យាជាមួយបារាំង និងបែរងាកទៅទិញនាវាមុជទឹកពីអាមេរិកវិញ។
ចុះផ្សាយនៅថ្ងៃ៖
ស្តាប់ - ០២:៣១
ក្នុងដំណើរទស្សនកិច្ចក្រៅប្រទេសរយៈពេល៤ថ្ងៃ អ្នកស្រីអនុប្រធានាធិបតីអាមេរិកមានភារកិច្ចជាច្រើនដែលត្រូវបំពេញ។ ភារកិច្ចទាំងនោះរួមមានចូលរួមវេទិកាសន្តិភាពជាមួយមេដឹកនាំពិភពលោកផ្សេងទៀត ចូលរួមក្នុងសន្និសីទស្តីពីប្រទេសលីប៊ី និងចូលរួមពិធីរំលឹកខួបនៃការបញ្ចប់សង្រ្គាមលោកលើកទី១។ ចំណែកភារកិច្ចដ៏សំខាន់មួយទៀតនោះគឺការជួបពិភាក្សាជាមួយលោកប្រមុខរដ្ឋបារាំងម៉ាក្រុង។
នៅពេលទៅដល់ទីក្រុងប៉ារីស អ្នកស្រីអនុប្រធានាធិបតីហារីសបានមានប្រសាស៍ថាអ្នកស្រីមានអារម្មណ៍រីករាយដែលបានទៅដល់ជាន់ដីបារាំង ហើយអ្នកស្រីសង្ឃឹមថានឹងអាចពិភាក្សាការងារប្រកបដោយផ្លែផ្កាដើម្បីពង្រឹងភាពរឹងមាំនៃទំនាក់ទំនងរវាងអាមេរិក និងបារាំង។
គួរបញ្ជាក់ថា ដំណើរទៅកាន់ទីក្រុងប៉ារីសរបស់អ្នកស្រី ហារីស បានកើតឡើងបន្ទាប់ពីជម្លោះអាមេរិក-បារាំងបានផ្ទុះឡើងក្នុងខែកញ្ញា នៅពេលអូស្ត្រាលីប្រកាសលុបចោលកិច្ចសន្យាទិញនាវាមុជទឹកពីបារាំង និងបែរងាកទៅចុះកិច្ចព្រមព្រៀងសន្តិសុខថ្មីជាមួយសហរដ្ឋអាមេរិក និងអង់គ្លេសដែលហៅកាត់ថា Aukus។
បារាំងមានការខឹងសម្បាជាខ្លាំងចំពោះការដែលអាមេរិកបានទៅចរចាដោយសម្ងាត់ជាមួយអូស្ត្រាលីនៅពីក្រោយខ្នងបារាំង និងបានធ្វើឲ្យបារាំងខាតបង់ប្រាក់អស់ប្រមាណ ៥៦ ពាន់លានអឺរ៉ូ។
គេរំពឹងថា អ្នកស្រីអនុប្រធានាធិបតីអាមេរិកដែលត្រូវជួបជាមួយលោកម៉ាក្រុងនៅថ្ងៃពុធ ទី១០ វិច្ឆិកានេះ នឹងបញ្ជាក់ពីគោលជំហររបស់លោកបៃដិន រួមទាំងការពិភាក្សាអំពីការគាំទ្រពីអាមេរិក ចំពោះបេសកកម្មយោធារបស់ប្រទេសបារាំងប្រឆាំងនឹងក្រុមជីហាតនៅតំបន់សាហែល និងផែនការពង្រឹងសមត្ថភាពការពាររបស់អឺរ៉ុប។
គួរកត់សម្គាល់ថា ក្រោយពីផ្ទុះវិបត្តិនាវាមុជទឹក សហរដ្ឋអាមេរិកបានបន្ទន់ជំហរជាខ្លាំងនៅចំពោះមុខបារាំងដោយបានបញ្ជូនមន្ត្រីជាន់ខ្ពស់ទៅចរចាជួលជុលទំនាក់ទំនងជាមួយក្រុងប៉ារីស។ ជាក់ស្តែង នៅមុនដំណើរទស្សនកិច្ចរបស់អ្នកស្រីអនុប្រធានាធិបតីហារីស រដ្ឋមន្ត្រីការបរទេសអាមេរិកលោក អង់តូនី ប្ល៊ីងកិន ត្រូវបានបញ្ជូនទៅជួបចរចារដើម្បីដោះស្រាវិបត្តិជាមួយបារាំងដែរកាលពីដើមខែតុលា។
ក្រៅពីនេះ ក្នុងជំនួបដោយផ្ទាល់ជាមួយប្រមុខរដ្ឋបារាំងក្នុងទីក្រុងរ៉ូមកាលពីចុងខែតុលាកន្លងទៅ លោកប្រធានាធិបតីអាមេរិក ចូ បៃដិន ក៏បានទទួលស្គាល់ដែរថាសហរដ្ឋអាមេរិកបានធ្វើរឿងឆ្គាំឆ្គងចំពោះបារាំងពាក់ព័ន្ធសំណុំរឿងនាវាមុជទឹកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ