យូណេស្កូចេញសេចក្តីប្រកាសអំពាវនាវឲ្យរដ្ឋសមាជិកបង្កើនថវិកាសម្រាប់ការអប់រំ
អង្គការអប់រំវិទ្យាសាស្រ្តនិងវប្បធម៌របស់អង្គការសហប្រជាជាតិ ហៅកាត់ថា យូណេស្កូត្រូវប្រារព្ធខួប៧៥ឆ្នាំរបស់ខ្លួន នៅថ្ងៃសុក្រទី១២វិច្ឆិកា នៅទីក្រុងប៉ារីស ជាមួយនឹងការចូលរួមពីប្រមុខរដ្ឋ និងរដ្ឋាភិបាល មកពីប្រទេសចំនួន២០ ដែលនៅក្នុងនោះមានផងដែរ ព្រះមហាក្សត្រ នៃព្រះរាជាណាចក្រកម្ពុជា ព្រះករុណា ព្រះបាទសម្តេចព្រះបរមនាថនរោត្តម សីហមុនី។ ការប្រារព្ធខួប៧៥ឆ្នាំនៃការបង្កើតអង្គការយូណេស្កូ រៀបចំឡើង នៅក្នុងអំឡុងមហាសន្និបាតលើកទី៤១របស់យូណេស្កូ ដែលបានចាប់ផ្តើមតាំងពីថ្ងៃទី៩រហូតដល់ថ្ងៃទី២៤វិច្ឆិកា។
ចុះផ្សាយនៅថ្ងៃ៖
ស្តាប់ - ០២:៤២
បង្កើតឡើងនៅឆ្នាំ១៩៤៦ នៅក្រោយចប់សង្រ្គាមលោកលើកទី២ យូណេស្កូ អង្គការអប់រំវិទ្យាសាស្រ្តនិងវប្បធម៌របស់អង្គការសហប្រជាជាតិត្រូវប្រារព្ធខួប៧៥ឆ្នាំរបស់ខ្លួននៅថ្ងៃសុក្រនេះ នៅក្នុងឱកាសមហាសន្និបាតលើកទី៤១របស់អង្គការយូណេស្កូ នៅទីក្រុងប៉ារីស។
ការអប់រំ នៅតែជាសកម្មភាពយកចិត្តទុកដាក់ខ្លាំងរបស់យូណេស្កូ ជាពិសេសនៅក្នុងកាលៈទេសៈ កើតមានវិបត្តិកូវីដ ដែលបានធ្វើឲ្យកុមារក្នុងពិភពលោកជាង ១៦០០លាននាក់ ខកខានមិនបានទៅសាលារៀន កាលពីឆ្នាំ២០២០។
ប្រឈមនឹងការខ្វះខាតខ្លាំងក្នុងវិស័យអប់រំ ដែលស្តែងឡើងយ៉ាងច្បាស់ នៅក្នុងអំឡុងវិបត្តិកូវីដ ប្រទេសសមាជិកជាង៤០ របស់អង្គការយូណេស្កូ កាលពីថ្ងៃពុធ បានសម្រេចបោះឆ្នោតលើសេចក្តីប្រកាសក្រុងប៉ារីស ដែលបានអំពាវនាវឲ្យរដ្ឋសមាជិកបង្កើនការវិនិយោគបន្ថែមលើវិស័យអប់រំ និងចូលរួមពង្រឹងជំនួយអន្តរជាតិសម្រាប់ការអប់រំក្នុងពិភពលោក។
ចាប់តាំងពីឆ្នាំ ២០១៥ ប្រទេសសមាជិករបស់អង្គការយូណេស្កូបានយល់ព្រមព្រៀងថា នឹងបង្កើនថវិកាសម្រាប់វិស័យអប់រំឲ្យស្មើនឹង៤ ឬ៦%នៃផលិតផលក្នុងស្រុកសរុប ឬ ឲ្យស្មើនឹង១៥ ទៅ២០%នៃការចំណាយសាធារណៈ។ ប៉ុន្តែ ក្នុងការពិតជាក់ស្តែង ថវិកាដែលរដ្ឋចំណាយទៅលើវិស័យអប់រំជាតិ នៅតែមានចំនួចតិចតួច។ ជាក់ស្តែង នៅក្នុងបណ្តាប្រទេសកំពុងអភិវឌ្ឍ ថវិកាសម្រាប់វិស័យអប់រំ តំណាងឲ្យតែ ១%នៃកញ្ចប់ថវិកាសម្រាប់ផែនការជំរុញសេដ្ឋកិច្ចនៅក្រោយវិបត្តិកូវីដ។ ចំណែកនៅប្រទេសអ្នកមាន ខ្ទង់ចំណាយសម្រាប់ការអប់រំ មានប្រមាណតែ ២,៦%ប៉ុណ្ណោះ។
សម្រាប់អគ្គនាយិការអង្គការយូណេស្កូ លោកស្រី អូដ្រេយ អាហ្សូឡេយ វិបត្តិកូវីដបានរំលេចឲ្យគេឃើញថា ការសិក្សាអប់រំសារៈសំខាន់ខ្លាំងណាស់។ នៅក្នុងអំឡុងវិបត្តិកូវីដ អង្គការយូណេស្កូ ធ្លាប់បានផ្តល់ជំនួយបន្ទាន់ សម្រាប់ជួយក្មេងសាលាជាង ៤០០លាននាក់ និងគ្រូបង្រៀន ១២លាននាក់ នៅក្នុងប្រទេសចំនួន ១១២។ ទោះបីមានការប្រឹងប្រែង គាំទ្រគ្រប់មធ្យោបាយ អង្គការយូណេស្កូ មិនបានឃើញស្ថានភាពល្អប្រសើរច្រើននោះទេ។ នៅក្នុងប្រទេសចំនួន៦៥ សាលារៀននៅតែបន្តបិទទ្វារ ដែលនឹងធ្វើឲ្យប៉ះពាល់ដល់ការសិក្សារបស់កេ្មង ចំនួន៧៥០លាននាក់ ក្នុងពិភពលោក។ អ្វីដែលគេបារម្ភខ្លាំង គឺក្មេងស្រី ជាង ១១លាននាក់ក្នុងពិភពលោកដែលអាចនឹងបោះបង់ចោលការសិក្សា លែងត្រលប់ចូលសាលារៀន នៅក្រោយ ចប់វិបត្តិកូវីដ។
នៅក្នុងពិធីបើកសម័យប្រជុំជាផ្លូវការនៃមហាសន្និបាតលើកទី៤១របស់អង្គការយូណេស្កូនៅថ្ងៃសុក្រនេះ ព្រះករុណា ព្រះបាទសម្តេចព្រះបរមនាថនរោត្តម សីហមុនី ជាមួយនឹងវត្តមានរបស់ប្រមុខរដ្ឋ និងរដ្ឋាភិបាលពីប្រទេសចំនួន ២០នឹងឡើងថ្លែងព្រះរាជសុន្ទរកថា ដោយផ្តោតទៅលើសមិទ្ធផលសំខាន់ៗនៃអង្គការយូណេស្កូ នៅក្នុងព្រះរាជាណាចក្រកម្ពុជា។ សូមរំលឹកដែរថា ព្រះករុណា ព្រះបាទសម្តេចព្រះបរមនាថនរោត្តមសីហមុនី ធ្លាប់ ជាឯកអគ្គរាជទូត តំណាងព្រះរាជាណាចក្រកម្ពុជានៅអង្គការយូណេស្កូ ពីឆ្នាំ ១៩៩៣ ដល់ឆ្នាំ ២០០៣។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ