ប៉ូលិសប៉ូឡូញរកឃើញសាកសពជនអន្តោប្រវេសន៍ជាតិស៊ីរីម្នាក់ នៅព្រំដែនបេឡារុស
វិបត្តិអន្តោប្រវេសន៍នៅព្រំដែនប៉ូឡូញ និងបេឡារុស នៅតែបន្តជាប់គាំង គ្មានច្រកចេញ។ នៅថ្ងៃសៅរ៍នេះ ប៉ូឡូញបានចេញសេចក្តីប្រកាសព័ត៌មានថា គេបានរកឃើញ សាកសពជនអន្តោប្រវេសន៍ជាតិស៊ីរីម្នាក់ នៅក្បែរព្រំដែន ប៉ូឡូញ បេឡារុស។ នៅក្រោយសហភាពអឺរ៉ុបគំរាមដាក់ទណ្ឌកម្មបន្ថែម លើបេឡារុស ដែលអឺរ៉ុបចោទថា អ្នកបង្កើតឲ្យមានវិបត្តិអន្តោប្រវេសន៍ នៅព្រំដែនអឺរ៉ុប ប្រធានាធិបតីបេឡារុសបានបង្ហាញសាច់ដុំ កាលពីថ្ងៃសុក្រ តាមរយៈសមយុទ្ធយោធារួមជាមួយកងទ័ពរុស្ស៊ី នៅក្បែរព្រំដែនប៉ូឡូញ។ នៅក្នុងបទសម្ភាសន៍ ចុះផ្សាយនៅថ្ងៃសៅរ៍នេះ ប្រធានាធិបតីរុស្ស៊ី លោកវ្លាឌីមៀរពូទីន បាននិយាយថា រុស្ស៊ី គ្មានជាប់ពាក់ព័ន្ធនឹងវិបត្តិអន្តោប្រវេសន៍នៅព្រំដែនប៉ូឡូញ បេឡារុសនោះទេ។
ចុះផ្សាយនៅថ្ងៃ៖
ស្តាប់ - ០២:៤៦
ប្រមុខដឹកនាំ រុស្ស៊ី លោកវ្លាឌីមៀរពូទីនបានចេញមុខ បដិសេធមិនទទួលខុសត្រូវលើវិបត្តិអន្តោប្រវេសន៍ នៅព្រំដែនបេឡារុស និងប៉ូឡូញ បន្ទាប់ពីប្រទេសលោកខាងលិចមួយចំនួន បានចោទប្រកាន់ថា រុស្ស៊ីបានរួមដៃជាមួយបេឡារុស ដើម្បីបង្កើតបញ្ហាជនអន្តោប្រវេសន៍នៅព្រំដែនអឺរ៉ុប។ សហភាពអឺរ៉ុប និងប៉ូឡូញផ្ទាល់បានចោទប្រកាន់បេឡារុស ថាបានដឹកនាំយកជនអន្តោប្រវេសន៍ពីតំបន់ដើមបូព៌ា មកដាក់នៅព្រំដែនប៉ូឡូញ ដើម្បីជាសងសឹកនឹងការដាក់ទណ្ឌកម្មរបស់អឺរ៉ុបទៅលើបេឡារុស។
តាមលោកពូទីន រុស្ស៊ីគ្មានចំណែកពាក់ព័ន្ធក្នុងវិបត្តិលើកនេះទេ និងថា ដើម្បីដោះស្រាយវិបត្តិអន្តោប្រវេសន៍លើកនេះ ភាគីអឺរ៉ុបគួរតែនិយាយដោះស្រាយ ផ្ទាល់ជាមួយប្រធានាធិបតីបេឡារុស លោកលូកាឆិនកូ។ ប្រធានាធិបតីរុស្ស៊ី បានបញ្ជាក់ដែរថា លោកសង្ឃឹមនឹងឃើញ លោកស្រីនាយករដ្ឋមន្រ្តីអាល្លឺម៉ង់ និងប្រធានាធិបតីបេឡារុស ជួបគ្នាក្នុងពេលឆាប់ៗ ព្រោះអ្នកទាំងពីរ បានត្រៀមខ្លួន ដើម្បី ចរចាដោះស្រាយវិបត្តិលើកនេះ។
ប្រតិកម្មនឹងគម្រោងការដាក់ទណ្ឌកម្មពីសហភាពអឺរ៉ុប ប្រធានាធិបតីបេឡារុស នៅសប្តាហ៍នេះបានប្រកាស គំរាមបិទខ្ទប់បំពង់បង្ហូរហ្គាសទៅកាន់ទឹកដីអឺរ៉ុប។ នៅថ្ងៃសុក្រម្សិលមិញ កងទ័ពបេឡារុសនៅបានធ្វើសមយុទ្ធយោធា ជាមួយកងទ័ពជើងអាកាសរុស្ស៊ី នៅក្បែរព្រំដែនជាមួយប្រទេសប៉ូឡូញ។
ប្រធានាធិបតីអាមេរិកលោកចូ បៃដិនបានសំដែងក្តីបារម្ភខ្លាំងពីស្ថានការណ៍នៅព្រំដែនបេឡារុស និងប៉ូឡូញ។ នៅថ្ងៃសុក្រ ប្រធានាធិបតីអាមេរិកបាននិយាយថា លោកបានបញ្ជាក់ក្តីបារម្ភរបស់អាមេរិកទៅកាន់ភាគីបេឡារុស និងរុស្ស៊ី រួចហើយ។
នៅលើទីតាំង ជាក់ស្តែង នៅព្រំដែនបេឡារុស និងប៉ូឡូញ ជនអន្តោប្រវេសន៍រាប់ពាន់នាក់ នៅតែបន្តប្រមូលផ្តុំ ក្នុងជំរំតង់តូចៗ នៅទឹកដីបេឡារុស ក្បែររបងលួសបន្លា ដែលយាមតាមដានជាប់ជានិច្ចពីប៉ូលិស ឆ្មាំព្រំដែនប៉ូឡូញ។ នៅព្រឹកថ្ងៃសៅរ៍នេះ ប៉ូលិសប៉ូឡូញ បាននិយាយថា គេបានរកឃើញ សាកសពជនជាតិស៊ីរីម្នាក់ នៅព្រំដែនបេឡារុស។ គេមិនទាន់ដឹងពីមូលហេតុដែលធ្វើឲ្យជនជាតិស៊ីរីស្លាប់នោះទេ។ ប៉ុន្តែ តាមទាហានប៉ូឡូញ ជនអន្តោប្រវេសន៍ជាង១០០នាក់បានប៉ុនប៉ង លួចឆ្លងចូលទឹកដីប៉ូឡូញ នៅយប់ថ្ងៃសុក្រម្សិលមិញ។ ពួកគេបានរត់ចូលព្រៃបេឡារុសវិញ នៅក្រោយ ទាហានប៉ូឡូញបើកប្រតិបត្តិការវាយទប់ស្កាត់។
នៅក្នុងវិបត្តិអន្តោប្រវេសន៍នៅព្រំដែនបេឡារុស និងប៉ូឡូញនេះ សហភាពអឺរ៉ុបបានសម្រុកនយោបាយការទូត ដើម្បីបញ្ចុះបញ្ចូលរដ្ឋាភិបាលរបស់ប្រទេសដើមកំណើតរបស់ជនអន្តោប្រវេសន៍។ នៅថ្ងៃសុក្រ រដ្ឋាភិបាលអ៊ីរ៉ាក់បានអះអាងថា នឹងចុះឈ្មោះ ជនអន្តោប្រវេសន៍អ៊ីរ៉ាក់ ដែលកំពុងជាប់គាំងនៅព្រំដែនបេឡារុស និងដែលចង់វិលត្រលប់ទៅអ៊ីរ៉ាក់វិញ។ តួកគីឯណោះវិញ ដែលជាច្រកចេញចូលសំខាន់រវាងអឺរ៉ុប និងតំបន់ដើមបូព៌ា បានប្រកាសថា រាល់ជាតិស៊ីរី អ៊ីរ៉ាក់ និងយេម៉ែន នឹងមិនអនុញ្ញាតឲ្យឡើងជិះយន្តហោះចេញពីទឹកដីតួកគី សំដៅប្រទេសបេឡារុស រហូតដល់មានបទបញ្ជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ