ម៉ូស្គូថាគ្មានទេ ចលនាទ័ពរុស្ស៊ី នៅក្បែរព្រំដែនអ៊ុយក្រែន
ម៉ូស្គូ ថ្ងៃសុក្រទី ១២ វិច្ឆិកា បានបដិសេធ ព័ត៏មាននៃប្រព័ន្ធផ្សព្វផ្សាយ ដែលប្រមាណថា រុស្ស៊ី អាចត្រៀម លុកលុយចូលដែនដីអ៊ុយក្រែន។ ទន្ទឹមនេះ រុស្ស៊ីក៏ចោទ សហរដ្ឋអាមេរិកថា ចេះតែធ្វើសមយុទ្ធ មានលក្ខណៈឈ្លានពាន នៅតំបន់សមុទ្រខ្មៅ
ចុះផ្សាយនៅថ្ងៃ៖
ស្តាប់ - ០២:៤៤
ទីភ្នាក់ងារព័ត៏មាន Bloomberg ថ្ងៃព្រហស្បតិ៍ បានឲ្យដឹងថា សហរដ្ឋអាមេរិក ប្រាប់ទៅពួកសម្ព័ន្ធមិត្តខ្លួន នៅអឺរ៉ុប អំពីក្តីព្រួយបារម្ភរបស់ខ្លួន ចំពោះការចល័តទ័ពដែលត្រូវសង្ស័យថា កំពុងរៀបចំជា យថាហេតុ ដើម្បី វាយលុកទៅលើអ៊ុយក្រែន។
ប្រភពពីរ នៅអឺរ៉ុប កាលពីថ្ងៃសុក្រ បានបញ្ជាក់ទៅ ទីភ្នាក់ងារព័ត៏មាន Reuters ថា ក្រុងវ៉ាស៊ីនតោន ពេលថ្មីៗ បាន ឲ្សសញ្ញាទៅពួកសម្ព័ន្ធមិត្តនៅអឺរ៉ុប អំពីចលនាទ័ពរុស្ស៊ី នៅត្រង់ព្រំដែនខាងកើតអ៊ុយក្រែន និង ចែករំលែក ការភិតភ័យរបស់គេ ខ្លាចក្រែង ភាពតានតឹងនៅតំបន់ រឹតតែកើនឡើងទៅទៀត។
ថ្លែងថ្ងៃសុក្រ ក្នុងសន្និសីទកាសែតតាមទូរស័ព្ទ អ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ លើកឡើង ជាអាទិ៍ ៖ ចំណងជើងប្រភេទបែបនេះ នៃកាសែតបស្ចិមលោក អាចតែជា ប្រេងបញ្ឆេះភាពតានតឹង ដោយឥតប្រយោជន៍ និង គ្មានអ្វីជាមូលដ្ឋានសោះ។ ដ្បិតរុស្ស៊ី ឥតគំរាមនរណាឡើយ។ លោក ពេស្កូវ រំលឹកថា រុស្ស៊ីជាអ្នកអារកាត់តែ ដោយខ្លួនឯងសុទ្ធសាធ ពីការពង្រាយទ័ពខ្លួន នៅទីណា ដែលស្ថិតលើដែនដីខ្លួនផ្ទាល់។
ចំណែក សហរដ្ឋអាមេរិក បានបង្ហាញជាសាធារណៈក្តី ព្រួយកង្វល់របស់ខ្លួន ចំពោះភាពសកម្មយោធារុស្ស៊ី ខុសពី ធម្មតា នៅក្បែរព្រំដែនអ៊ុយក្រែន។ ប៉ុន្តែ ក្តីព្រួយកង្វល់នេះ ត្រូវ អ្នកនាំពាក្យវិមានក្រេមឡាំង រំសាយទៅ ដោយចាត់ទុកថា គ្មានអ្វីជាមូលដ្ឋាន ទាំងគូសបញ្ជាក់ថា ៖ ម៉ូស្គូ រមែងនិយាយជាច្រើនលើកថា ចលនាទ័ព ខ្លួន នៅផ្ទៃក្នុងប្រទេស មិនត្រូវញ៉ាំងនរណាឲ្យព្រួយបារម្ភសោះឡើយ។
នៅក្រុង Bruxelles អ្នកនាំពាក្យរបស់ គណៈកម្មការអឺរ៉ុប កាលពីថ្ងៃសុក្រ បានបំភ្លឺទៅពួកអ្នកកាសែតថា អឺរ៉ុប បន្ត តាមដាន ដំណើរវិវឌ្ឍន៍នៃស្ថានការណ៍ ទាំងលំអិតថា ព័ត៏មានដែលប្រមែប្រមូលបានមកទល់ឥឡូវ គឺនាំឲ្យ កាន់តែព្រួយបារម្ភ។
ពីចំណែកខ្លួន រដ្ឋមន្ត្រីការពារជាតិរុស្ស៊ី បានថ្លែងអំពី ការកត់ត្រាឃើញចំនួន ៦ លើក ការហោះហើរជា ចារកិច្ច នៃ យន្ដហោះអូតង់ ក្នុងលំហស្ថិតនៅចំពីលើសមុទ្រខ្មៅ ដែលជាសក្ខីកម្មនៃ ការបង្កើន ការហោះ ឈ្លបយកការណ៍ តាមផ្លូវអាកាសពីខាង កងកម្លាំងបស្ចិមលោក។
កងទ័ពរុស្ស៊ី ក៏តាមដានអំពី ការចល័តនៃ ក្រុមនាវាចម្បាំងអាមេរិកាំង នៅសមុទ្រខ្មៅ។ ក្នុងសេចក្តីជូន ដំណឹងខ្លួន ក្រសួងការពារជាតិ លំអិតថា កងទ័ពរុស្ស៊ី ចាត់ទុកភាពសកម្មយោធារបស់ សរអា ដែលមាន លក្ខណៈឈ្លានពាន នៅសមុទ្រខ្មៅ ថាជា ការគំរាមដល់ សន្តិសុខតំបន់ និងដល់ ស្ថិរភាពយុទ្ធសាស្ត្រ។
រុស្ស៊ី បានភ្ជាប់យកទៀបកោះ គ្រីមេ ក្នុងឆ្នាំ ២០១៤ ហើយចាប់ពីពេលនោះមក ប្រកាសតាំងការគ្រប់គ្រង លើ ដែនទឹកនៃ តំបន់ទៀបកោះនេះ - ទៀបកោះដែលនៅតែទទួលស្គាល់ជានិច្ច ថា ជារបស់អ៊ុយក្រែន ដោយ ប្រទេសភាគច្រើន ក្នុងលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ