វិបត្តិអន្តោប្រវេសន៍ ៖ ប៉ូឡូញសុំឱ្យអូតង់ចាត់វិធានការជាក់ស្តែង
មានអន្តោប្រវេសន៍មួយក្រុមថ្មីទៀត ប្រមាណ៥០នាក់ បានឆ្លងចូលដល់ទឹកដីប៉ូឡូញតាមច្រកព្រំដែនបេឡារុស។ នេះបើតាមសេចក្តីជូនដំណឹងរបស់ប៉ូលិសប៉ូឡូញ នៅថ្ងៃអាទិត្យទី ១៤វិច្ឆិកា២០២១។ ប្រឈមនឹងប៉ុនប៉ងឆ្លងព្រំដែនដោយខុសច្បាប់ ឥតដាច់យ៉ាងដូច្នេះ ក្រុងវ៉ាសូវី បានទាមទារឱ្យអូតង់ចាត់វិធានការជាក់ស្តែងជាមួយបេឡារុស និងបានព្រមានដាក់ពាក្យប្តឹងស្របតាមមាត្រា៤នៃសន្ធិសញ្ញាអាត្លង់ទិកខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
មាត្រា៤នៃសន្ធិសញ្ញាអាត្លង់ទិកខាងជើង ឬហៅកាត់ជាភាសាបារាំងថាអូតង់ បានចែងថា គ្រប់ប្រទេសជាសមាជិករបស់អង្គការទាំងអស់អាចសុំបើកការពិគ្រោះមួយបាន នៅពេលណា ដែនដី ឯករាជភាពនយោបាយ និងសន្តិសុខនៃប្រទេសជាសមាជិកនោះ រងការគំរាមកំហែង។ នៅខណៈនេះ ប៉ូឡូញ កំពុងពិភាក្សាជាមួយលីទុយអានី និងឡេតូនី ដើម្បីបើកសំណុំរឿងស្របតាមមាត្រា៤ហើយ។ នេះជាការគូសបញ្ជាក់របស់លោកនាយករដ្ឋមន្ត្រីប៉ូឡូញ ទៅកាន់ភ្នាក់ងារសារព័ត៌មានផ្លូវការ។
សម្រាប់ប៉ូឡូញ ការសម្តែងក្តីព្រួយបារម្ភជាសាធារណៈលែងគ្រប់គ្រាន់ហើយ អូតង់ត្រូវតែចាត់វិធានការជាក់ស្តែង និងធ្វើការប្តេជ្ញារួមឱ្យច្បាស់លាស់។
តាំងពីប៉ុន្មានខែចុងក្រោយមកនេះ មានអន្តោប្រវេសន៍ជាច្រើនពាន់នាក់បានមកផ្តុំកកនៅបេឡារុស ត្រង់តំបន់ព្រំដែនជាមួយប្រទេសប៉ូឡូញ ដើម្បីរង់ចាំឱកាសជ្រៀតចូលអឺរ៉ុប ជាមួយនឹងស្ថានភាពយ៉ាបយឺនបំផុត សឹងចាត់ទុកបានជាវិបត្តិមនុស្សធម៌ដ៏ធ្ងន់ធ្ងរមួយផង។ ដោយចោទបេឡារុសថាធ្វើជំនួញអន្តោប្រវេសន៍ លើកទឹកចិត្តឱ្យអន្តោប្រវេសន៍រត់ឆ្លងព្រំដែនចូលទឹកដីប៉ូឡូញ ដើម្បីសំឡុតអឺរ៉ុប ពេលនេះ សហភាពអឺរ៉ុបត្រូវអនុម័តនៅថ្ងៃចន្ទទី១៥វិច្ឆិកា ទណ្ឌកម្មថ្មីបន្ថែមទៀតដាក់ប្រឆាំងនឹងអ្នកទទួលខុសត្រូវបេឡារុសផង ក្រុមហ៊ុនអាកាសចរណ៍និងភ្នាក់ងារទេសចរណ៍ដែលមានពាក់ព័ន្ធនឹងការដឹកអន្តោប្រវេសន៍ឆ្លងមកអឺរ៉ុប។ នេះបើតាមប្រសាសន៍របស់លោក Josep Borrell អ្នកទទួលត្រូវការបរទេសសហភាពអឺរ៉ុប។ បើតាមនាយករដ្ឋមន្ត្រីប៉ូឡូញ ដែលទទូចឱ្យសហភាពអឺរ៉ុបត្រូវតែចូលរួមផ្តល់ថវិកាសាងសង់ជញ្ជាំងនៅតាមព្រំប្រទល់ជាមួយបេឡារុស ទណ្ឌកម្មអឺរ៉ុបថ្មី អាចនឹងឈានដល់ការបិទព្រំដែនទាំងស្រុងជាមួយបេឡារុសផង។
វិបត្តិអន្តោប្រវេសន៍នេះ បានរីករាលដាលក្លាយជាវិបត្តិរវាងអឺរ៉ុបនិងបេឡារុសផងនិងកំពុងក្លាយជំងឺមហារីក ដែលអាចមានហានិភ័យក្លាយជាការប៉ះទង្គិចយោធា។ ប្រធានាធិបតីរុស្ស៊ី លោក ពូទីន ដែលជាសម្ព័ន្ធមិត្តនិងជាអ្នកគាំទ្រប្រធានាធិបតីបេឡារុសលោក អាឡិចសង់ ឡូកាឆេនកូ ដ៏ចំបងបំផុតនោះ ទើបបានប្រកាសនៅថ្ងៃអាទិត្យទី ១៤វិច្ឆិកានេះថា រុស្ស៊ីត្រៀមជាស្រេចនឹងចូលរួមដោះស្រាយវិបត្តិអន្តោប្រវេសន៍ ដោយប្រើគ្រប់មធ្យោបាយទាំងអស់។
ក្នុងពេលរង់ចាំ ប៉ូលិសប៉ូឡូញបន្តការពារព្រំដែន ទល់នឹងការប៉ុនប៉ងឆ្លងដែនរបស់អន្តោប្រវេសន៍ ដែលកាលពីថ្ងៃសៅរ៍ មានជនអន្តោប្រវេសន៍មួយក្រុមជាង៥០នាក់បានជ្រៀតចូល តែត្រូវបានចាប់ខ្លួនហើយបញ្ជូនទៅព្រំដែនវិញទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ