វិបត្តិអន្តោប្រវេសន៍៖សហភាពអឺរ៉ុបព្រមព្រៀងគ្នាដើម្បីដាក់ទណ្ឌកម្មថ្មីប្រឆាំងប្រទេសបេឡារុស
នៅថ្ងៃចន្ទ ទី១៥ វិច្ឆិកា សហភាពអឺរ៉ុបបានព្រមព្រៀងគ្នាដើម្បីដាក់ទណ្ឌកម្មថ្មីប្រឆាំងប្រទេសបេឡារុសនៅក្នុងសំណុំរឿងអន្តោប្រវេសន៍ជាមួយប្រទេសប៉ូឡូញ។ នៅក្នុងទណ្ឌកម្មថ្មីនេះ សហភាពអឺរ៉ុបគ្រោងដាក់ទណ្ឌកម្មប្រឆាំងបុគ្គល និងអង្គការ ឬស្ថាប័នដែលបានរួមចំណែកនៅក្នុងការបញ្ជូនជនអន្តោប្រវេសន៍ជាច្រើនពាន់នាក់ទៅកាន់ព្រំដែនរវាងប្រទេសបេឡារុស និងប្រទេសប៉ូឡូញ។ គោលដៅចុងក្រោយរបស់ជនអន្តោប្រវេសន៍ទាំងនោះ គឺឆ្លងចូលក្នុងទឹកដីអឺរ៉ុបតាមរយៈប៉ូឡូញដែលជាប្រទេសសមាជិកមួយរបស់សហភាពអឺរ៉ុប។
ចុះផ្សាយនៅថ្ងៃ៖
ប្រមុខការទូតសហភាពអឺរ៉ុបលោក Josep Borrell បានប្រកាសក្នុងថ្ងៃចន្ទ ទី១៥ វិច្ឆិកាថា សហភាពអឺរ៉ុបនឹងអនុម័តនាប៉ុន្មានថ្ងៃខាងមុខនូវទណ្ឌកម្មថ្មីប្រឆាំងបុគ្គល និងអង្គការ ឬស្ថាប័នដែលបានចូលរួមរៀបចំឲ្យមានលំហូរជនអន្តោប្រវេសន៍ទៅកាន់ព្រំដែនរវាងប្រទេសបេឡារុស និងប្រទេសប៉ូឡូញ។ ការប្រកាសរបស់លោក Josep Borrell បានធ្វើឡើងនៅក្រោយកិច្ចប្រជុំថ្នាក់រដ្ឋមន្រ្តីកាបរទេសអឺរ៉ុបក្នុងទីក្រុងព្រុចសែល ប្រទេសបែលហ្ស៊ិក។ តាមប្រមុខការទូតអឺរ៉ុបរូបនេះដដែល ទណ្ឌកម្មថ្មីនឹងដាក់ទៅលើមនុស្សសំខាន់ៗជាច្រើននាក់ និងអង្គការ ឬស្ថាប័នមួយចំនួន។
តែលោក Josep Borrell មិនបានបញ្ជាក់ និងមិនបានបង្ហើបពីចំនួនមនុស្សពិតប្រាកដ និងអត្តសញ្ញាណរបស់មនុស្ស និងអង្គការ ឬស្ថានប័នទាំងនោះទេ។ អ្វីដែលគេដឹង បញ្ជីឈ្មោះមនុស្សដែលជាប់ពាក់ព័ន្ធជាក្រុមមន្រ្តីក្នុងរបបបេឡារុស ហើយអង្គការ ឬស្ថាប័នដែលជាប់ពាក់ព័ន្ធច្រើនជាទីភ្នាក់ងារទេសចរណ៍ និងក្រុមហ៊ុនអាកាសចរណ៍ ពោលអ្នកដែលបានរៀបចំដឹកជញ្ជូនជនអន្តោប្រវេសន៍ទៅកាន់ប្រទេសបេឡារុសដើម្បីឲ្យពួកគេឆ្លងចូលទឹកដីអឺរ៉ុបតាមប្រទេសប៉ូឡូញ។ ដោយឡែកក្នុងថ្ងៃចន្ទ ទី១៥ វិច្ឆិកា ប្រធានាធិបតីបារាំងលោកម៉ាក្រុង និងសមភាគីរុស្ស៊ីលោកពូទីនបានជួបសន្ទនាគ្នាតាមទូរស័ព្ទ។ នៅក្នុងកិច្ចសន្ទនា លោកម៉ាក្រុង និងលោកពូទីនក៏បានលើកយកវិបត្តិអន្តោប្រវេសន៍ទៅជជែកគ្នាដែរ។
តាមវិមានប្រធានាធិបតីបារាំងអេលីហ្សេ ក្រុងប៉ារីស និងក្រុងមូស្គូចង់ឲ្យមានការចូលរួមពីឧត្តមស្នងការអន្តរជាតិទទួលបន្ទុកជនភៀសខ្លួននៅក្នុងវិបត្តិជនអន្តោប្រវេសន៍នៅតាមព្រំដែនរវាងប្រទេសបេឡារុស និងប្រទេសប៉ូឡូញពេលនេះ។ គួររម្លឹកថា តាំងពីប៉ុន្មានខែកន្លងមកដែលមានជនអន្តោប្រវេសន៍ជាច្រើនពាន់នាក់បានទៅប្រមូលផ្តុំគ្នានៅបេឡារុសត្រង់តំបន់ព្រំដែនជាមួយប្រទេសប៉ូឡូញដើម្បីរង់ចាំឱកាសឆ្លងចូលទឹកដីអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ