វិបត្តិអន្តោប្រវេសន៍៖រដ្ឋាភិបាលអ៊ីរ៉ាក់បញ្ជូនយន្តហោះទៅដឹកជនជាតិរបស់ខ្លួនពីប្រទេសបេឡារុស
តើគេអាចរកច្រកចេញពីវិបត្តិអន្តោប្រវេសន៍នៅព្រំដែនបេឡារុស និងប៉ូឡូញ ដែរឬទេ? នៅថ្ងៃ ព្រហស្បតិ៍ ទី១៨វិច្ឆិកា រដ្ឋមន្រ្តីការបរទេសរបស់ក្រុមប្រទេសអ្នកមាន G7បានទាមទារឲ្យបេឡារុសបិទបញ្ចប់ជាបន្ទាន់ វិបត្តិអន្តោប្រវេសន៍ ដែលសហភាពអឺរ៉ុបចោទប្រកាន់ថា ជាផែនការរៀបចំឡើងដោយបេឡារុស សើម្បីសងសឹកសហភាពអឺរ៉ុប។ អ្នកនាំពាក្យប្រធានាធិបតីបេឡារុស បាននិយាយប្រាប់អ្នកកាសែតកាលពីថ្ងៃព្រហស្បតិ៍ថា នៅក្នុងជំនួបលើកទី២ជាមួយប្រធានាធិបតីបេឡារុស មេដឹកនាំអាល្លឺម៉ង់បានឯកភាពថា សហភាពអឺរ៉ុប និងបេឡារុសត្រូវដោះស្រាយរួមគ្នា វិបត្តិអន្តោប្រវេសន៍ នៅព្រំដែនប៉ូឡូញ បេឡារុស។
ចុះផ្សាយនៅថ្ងៃ៖
នៅក្នុងវិបត្តិអន្តោប្រវេសន៍ នៅព្រំដែនបេឡារុស និងប៉ូឡូញ សហភាពអឺរ៉ុប និងបេឡារុសបានធ្វើសេចក្តីថ្លែងការណ៍ពីរខុសគ្នា។ បេឡារុសបាននិយាយថា ខ្លួនបានចរចាជាមួយសហភាពអឺរ៉ុប ដើម្បីដោះស្រាយវិបត្តិអន្តោប្រវេសន៍នៅព្រំដែនប៉ូឡូញ និងបេឡារុស។ ប៉ុន្តែ ភាគីអឺរ៉ុប ឯណោះវិញបានលើកឡើងពីការពិភាក្សាផ្នែកបច្ចេកទេស ជាមួយរដ្ឋាភិបាលបេឡារុស ដើម្បី ការវិលត្រលប់ ធ្វើមាតុភូមិនិវត្តន៍ជនអន្តោប្រវេសន៍ ទៅកាន់ប្រទេសកំណើត។
រដ្ឋាភិបាលបេឡារុសបានបង្ហាញថា មានជនអន្តោប្រវេសន៍៧០០០នាក់ ដែលកំពុងស្ថិតនៅប្រទេសបេឡារុស ក្នុងបំណងធ្វើដំណើរឆ្លងកាត់ទៅកាន់ទឹកដីអឺរ៉ុប។ តាម អ្នកនាំពាក្យរបស់ប្រធានាធិបតីបេឡារុស នៅក្នុងកិច្ចសន្ទនាតាមទូរស័ព្ទ ជាមួយ លោកស្រីនាយករដ្ឋមន្រ្តីអាល្លឺម៉ង់ អង់ហ្គេឡា មែរគែល ប្រធានាធិបតីបេឡារុស លោកលូកាឆិនកូ បានបញ្ជាក់ថា បេឡារុសនឹងបញ្ជូន ជនអន្តោប្រវេសន៍ ៥០០០នាក់ ឲ្យត្រលប់ទៅប្រទេសកំណើតវិញ ប៉ុន្តែ ជាមួយគ្នានោះ លោកស្រីមែរកិលនឹងពិភាក្សា ដើម្បីឲ្យសហភាពអឺរ៉ុប បើកផ្លូវ ឲ្យជនអន្តោប្រវេសន៍២០០០នាក់ ដែលកំពុងប្រមូលផ្តុំនៅព្រំដែន អាចធ្វើដំណើរប្រទេសអាល្លឺម៉ង់។
អ្នកនាំពាក្យរបស់លោកស្រីនាយករដ្ឋមន្រ្តីអាល្លឺម៉ង់ បានបំភ្លឺថា លោកស្រីមែរគែលមិនបាននិយាយអ្វីច្រើន ក្រៅតែ ពីការសហការរវាងបេឡារុស និងសហភាពអឺរ៉ុប ដើម្បីនាំជំនួយមនុស្សធម៌ របស់អង្គការសហប្រជាជាតិ ទៅកាន់ជនអន្តោប្រវេសន៍ នៅព្រំដែនបេឡារុស និងប៉ូឡូញ។
នៅក្នុងវិបត្តិអន្តោប្រវេសន៍ ភាគីអឺរ៉ុបបានថ្លែងអំណរគុណ តួកគី និងអ៊ីរ៉ាក់ដែលបានជួយសម្រាលវិបត្តិអន្តោប្រវេសន៍ នៅព្រំដែនប៉ូឡូញ និងបេឡារុស ដែលជាមាត់ទ្វារច្រកចូលអឺរ៉ុប។ នៅថ្ងៃព្រហស្បតិ៍ តួកគីនៅបន្តហាមឃាត់មិនឲ្យជនជាតិអ៊ីរ៉ាក់ ស៊ីរី និងយេម៉ែន ឡើងជិះយន្តហោះសំដៅបេឡារុស។ ចំណែករដ្ឋាភិបាលអ៊ីរ៉ាក់បានបញ្ជូនយន្តហោះ ទៅដឹកជនជាតិអ៊ីរ៉ាក់ជាង៥០០នាក់ ពីប្រទេសបេឡារុសមកវិញ។
នៅព្រំដែនបេឡារុស និងប៉ូឡូញ ស្ថានការណ៍ នៅតែពុះកញ្ជ្រោល។ រដ្ឋមន្រ្តីការពារជាតិប៉ូឡូញ ព្រមានកាលពីថ្ងៃពុធថា វិបត្តិអន្តោប្រវេសន៍នៅព្រំដែនបេឡារុស នឹងបន្តរាប់ខែ រាប់ឆ្នាំទៅមុខទៀត។ ដោយនិយាយយោងទៅដល់ការពិភាក្សារវាងសហភាពអឺរ៉ុប និងបេឡារុស ប៉ូឡូញបានបញ្ជាក់ថា គេមិនត្រូវសម្រេចអ្វី ដោយរំលងប៉ូឡូញនោះទេ។ តាមក្រសួងការពារជាតិប៉ូឡូញ នៅយប់អង្គារ ឆ្មាំព្រំដែនប៉ូឡូញ បានបាញ់ទឹក និងឧស្ម័នបង្ហូរទឹកភ្នែក ទៅលើជនអន្តោប្រវេសន៍ដែលបានបើកការវាយប្រហារ វាយបំផ្លាញ របងលួសបន្លា ក្នុងចេតនាឆ្លងចូលព្រំដែនប៉ូឡូញ។
ទាហានប៉ូឡូញបានចោទប្រកាន់ទាហានបេឡារុសថា ជាអ្នកលួចកាត់របងលួសបន្លា និងញុះញង់ឲ្យជនអន្តោប្រវេសន៍គប់ដុំថ្ម ដើម្បីបង្វែរចំណាប់អារម្មណ៍ទាហានប៉ូឡូញ។ តាមក្រសួងការពារជាតិប៉ូឡូញ នៅក្នុងពេលប៉ះទង្គិចគ្នា ជនអន្តោប្រវេសន៍ ជាង ៥០០នាក់ បានសម្រេចឆ្លងចូលទាល់តែបាន ក្នុងទឹកដីប៉ូឡូញ ប៉ុន្តែ ក្នុងចំណោមនោះ មាន២០០នាក់ដែលត្រូវទាហានប៉ូឡូញចាប់ឃុំខ្លួនមកវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ