ហេតុអ្វីបានជាតុលាការព្រហ្មទណ្ឌអន្តរជាតិព្យួរការស៊ើបអង្កេតលើសង្រ្គាមប្រឆាំងគ្រឿងញៀននៅហ្វីលីពីន?
រដ្ឋអាជ្ញានៃតុលាការព្រហ្មទណ្ឌអន្តរជាតិក្រុងឡាអេ ICC លោកការីម ខាន់បានប្រកាសពីការព្យួរលើការស៊ើបអង្កេតស្តីពីការរំលោភសិទ្ធិមនុស្សជាយថាហេតុនៅក្នុងក្របខ័ណ្ឌនៃសង្រ្គាមប្រឆាំងនឹងគ្រឿងញៀននៅហ្វីលីពីន។ គឺជាការព្យួរបណ្តោះអាសន្នតាមសំណើរបស់រដ្ឋាភិបាលហ្វីលីពីនរបស់លោកប្រធានាធិបតីឌុយទែរតេ។ គួររម្លឹកថា គឺទើបក្នុងខែកញ្ញាកន្លងទៅដែលចៅក្រម ICC បានអនុញ្ញាតឲ្យបើកការស៊ើបអង្កេតនៅក្នុងសំណុំរឿងនេះ។
ចុះផ្សាយនៅថ្ងៃ៖
ស្តាប់ - ០២:២៧
ជម្រើសនៃការព្យួរការស៊ើបអង្កេតបណ្តោះអាសន្នត្រូវបានរដ្ឋអាជ្ញានៃតុលាការព្រហ្មទណ្ឌអន្តរជាតិក្រុងឡាអេ ICC លោកការីម ខាន់បញ្ជាក់នៅក្នុងលិខិតរបស់លោកថា គឺដើម្បីវាយតម្លៃពីសមត្ថភាព និងប្រសិទ្ធិភាពនៃការសុំពន្យារពេលរបស់រដ្ឋាភិបាលហ្វីលីពីន។ យោងតាមឯកសាររបស់តុលាការ រដ្ឋាភិបាលហ្វីលីពីនតាមរយៈឯកអគ្គរដ្ឋទូតប្រចាំប្រទេសហូឡង់បានទាមទារឲ្យ ICC លើកពេលស៊ើបអង្កេតក្រោមហេតុផលថា រដ្ឋាភិបាលហ្វីលីពីនកំពុងស៊ើបអង្កេតលើឧក្រិដ្ឋកម្មប្រឆាំងមនុស្សជាតិជាយថាហេតុដែលអាចបានកើតមាននៅក្នុងសង្រ្គាមប្រឆាំងគ្រឿងញៀន។
តាមឯកអគ្គរដ្ឋទូតហ្វីលីពីនប្រចាំប្រទេសហូឡង់រូបនេះដដែល រដ្ឋាភិបាលរបស់លោកប្រធានាធិបតីឌុយទែរតេបានអនុវត្ត និងកំពុងបន្តធ្វើការស៊ើបអង្កេតស៊ីជម្រៅលើក្រុមមនុស្សដែលបានស្លាប់នៅក្នុងប្រតិបត្តិការប្រឆាំងគ្រឿងញៀន។ គួររម្លឹកថា ចៅក្រម ICC បានអនុញ្ញាតឲ្យបើកការស៊ើបអង្កេតកាលពីខែកញ្ញា ហើយរដ្ឋាភិបាលហ្វីលីពីនបានទាមទារឲ្យលើកពេលស៊ើបអង្កេតកាលពីថ្ងៃទី១០ វិច្ឆិកា។ ដោយគ្មានបង្អង់ រដ្ឋាភិបាលហ្វីលីពីនតាមរយៈអ្នកនាំពាក្យស្តីទីបានថ្លែងសាទរចំពោះការសម្រេចព្យួរការស៊ើបអង្កេតបណ្តោះអាសន្នរបស់ ICC។
លោកប្រេដ អាដាម នាយកអង្គការក្រៅរដ្ឋាភិបាលប្រចាំតំបន់អាស៊ីបានបញ្ចេញប្រតិកម្មលើទំព័របណ្តាញសង្គម Twitter ក្នុងថ្ងៃសៅរ៍ ទី២០ វិច្ឆិកាថា ICC ត្រូវតែបន្តការស៊ើបអង្កេត និងសង្ឃឹមថា ICC មើលឃើញច្បាស់ពីល្បិចកលដែលមានបង្កប់នៅក្នុងសង្រ្គាមប្រឆាំងគ្រឿងញៀនរបស់លោកប្រធានាធិបតីហ្វីលីពីនឌុយទែរតេ។ គួររម្លឹកថា តាមតួលេខផ្លូវការរបស់រដ្ឋាភិបាលហ្វីលីពីន សង្រ្គាមប្រឆាំងគ្រឿងញៀនតាំងពីខែកក្កដាឆ្នាំ ២០១៦ បានបណ្តាលឲ្យមានមនុស្សស្លាប់យ៉ាងតិច ៦ ១៨១នាក់។ តែតុលាការព្រហ្មទណ្ឌអន្តរជាតិបានប៉ាន់ប្រមាណពីចំនួនមនុស្សស្លាប់ចន្លោះ ១២ ០០០ និង ៣០ ០០០នាក់។
លោកឌុយទែរតេដែលបានបញ្ជាក់ច្រើនដងពីការមិនរួមសហការជាមួយ ICC បានដកហ្វីលីពីនចេញពីសមាជិក ICC ក្នុងឆ្នាំ ២០១៩។ តែនៅក្នុងខែតុលាកន្លងទៅថ្មីៗនេះ លោកឌុយទែរតេបានថយក្រោយមួយជំហានដោយបានប្រកាសត្រៀមការពារខ្លួនត ទល់នឹងតុលាការព្រហ្មទណ្ឌអន្តរជាតិក្រុងឡាអេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ