បក្សប្រឆាំងបេឡារុសទាមទារឱ្យដោះលែងអ្នកទោសមនសិការ ក្នុងទិវាសាមគ្គីភាពជាមួយអ្នកទោសនយោបាយ
ថ្ងៃសៅរ៍ទី ២៧វិច្ឆិកា នេះ លោកស្រី ទីខាណូវស្កាយ៉ា អ្នកនយោបាយបក្សប្រឆាំងបេឡារុសបានអំពាវនាវឱ្យមានការដោះលែងអ្នកទោសនយោបាយ នាឱកាសទិវាសាមគ្គីភាពជាមួយអ្នកទោសនយោបាយ នៅបេឡារុស។ បើតាមអង្គការក្រៅរដ្ឋាភិបាល បេឡារុសមានឃុំឃាំងអ្នកទោសមនសិការជិត៩០០នាក់។ លីទុយអានី ជិតខាងក៏បានចេញសេចក្តីអំពាវនាវដូចគ្នា ដោយគំរាមនាំមេដឹកនាំបេឡារុសទៅតុលាការយុត្តិធម៌អន្តរជាតិផង។
ចុះផ្សាយនៅថ្ងៃ៖
ស្តាប់ - ០១:៤៧
តើត្រូវបង្ហាញសាមគ្គីភាពជាមួយអ្នកទោសនយោបាយយ៉ាងដូចម្តេច ? បើតាមក្រុមការងាររបស់គណបក្សប្រឆាំងបេឡារុស លោកស្រី ទីខាណូវស្កាយ៉ា គេត្រូវសរសេរលិខិតគាំទ្រមួយផ្ញើទៅអ្នកទោសម្នាក់មួយៗ ដែលនៅជាប់ឃុំឃាំង មានសរុបចំនួន៨៨៨នាក់។ ក្នុងរយៈពេលមិនដល់មួយឆ្នាំផង ចំនួនអ្នកទោសមនសិការនៅបេឡារុស បានកើនឡើងមួយជា ៩។ នេះសបញ្ជាក់ថា បេឡារុសបន្តគាបសង្កត់ ពលរដ្ឋដោយគ្មានសំចៃ និងដោយគ្មានកំណត់ទេ។
បើតាមអ្នករៀបចំកម្មវិធីទិវាសាមគ្គីភាពជាមួយអ្នកទោសនយោបាយ គ្រាន់តែពាក់ស្រោមជើងមានពណ៌ទង់ជាតិ ក៏អាចត្រូវអាជ្ញាធរចាប់ខ្លួនដាក់ពន្ធនាគារពីបទប្រឆាំងបានដែរ។
ទិវាសាមគ្គីភាពជាមួយអ្នកទោសនយោបាយបេឡារុស បានទទួលការគាំទ្រពីប្រទេសលីទុយអានី ដែលជាអតីតរដ្ឋសហភាពសូវៀតដូចគ្នា។ នៅក្នុងការិយាល័យក្រសួងការបរទេសលីទុយអានី អង្គការការពារសិទ្ធិមនុស្ស Viasna បានតាំងស្តង់មួយចាំទទួលសំបុត្រសម្រាប់ផ្ញើទៅអ្នកនយោបាយដែលកំពុងជាប់ទោស។ ប្រមុខការទូតលីទុយអានី បានជ្រើសរើសសរសេរលិខិតមួយផ្ញើជូនអ្នកទោសវ័យ១៩ឆ្នាំ ដែលតុលាការបេឡារុសបានកាត់ទោសឱ្យជាប់ពន្ធនាគារបួនឆ្នាំ ពីបទបានចូលរួមធ្វើបាតុកម្ម។
“លូកាឆេនកូ មិនត្រឹមតែបានបង្កបញ្ហាអន្តោប្រវេសន៍មួយទេ តែមានចាប់ឃុំឃាំងអ្នកទោសនយោបាយជិត៩០០នាក់ទៀត។ ជាមួយនឹងការសម្តែងសាមគ្គីភាពជាមួយបេឡារុស លីទុយអានីចង់បង្ហាញប្រាប់ពិភពលោក អំពីអ្វីដែលលោក លូកាឆេនកូ បានធ្វើ និងធ្វើក្នុងរយៈពេលមួយឆ្នាំ កន្លងមកនេះ” នេះបើតាមសំណេររបស់លោកប្រមុខការទូតលីទុយអានី ដោយអះអាងទៀតថា រដ្ឋាភិបាលលីទុយអានីកំពុងតែសិក្សាអំពីលទ្ធភាពយក មេដឹកនាំបេឡារុស ទៅកាត់ទៅនៅតុលាការយុត្តិធម៌អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ