ជនសង្ស័យសម្លាប់អ្នកកាសែត Jamal Khashoggi ត្រូវបានចាប់ខ្លួននៅបារាំង
ជនសង្ស័យក្នុងសំណុំរឿងសម្លាប់អ្នកកាសែត ហ្សាម៉ាល់ ខាស្ហូហ្ស៊ី Jamal Khashoggi នៅប្រទេសតួកគីកាលពីឆ្នាំ២០១៨ ត្រូវបានចាប់ខ្លួន កាលពីថ្ងៃអង្គារទី ៧ ធ្នូ ២០២១នេះ នៅអាកាសយានដ្ឋានក្រុងប៉ារីស ប្រទេសបារាំង។ ជនសង្ស័យកំពុងត្រៀមឡើងយន្តហោះធ្វើដំណើរទៅក្រុងរីយ៉ាដប្រទេសអារ៉ាប៊ីសាអូឌីត។ ការចាប់ខ្លួននេះធ្វើឡើងតែបីថ្ងៃក្រោយទស្សនកិច្ចរបស់ប្រធានាធិបតីបារាំង នៅអារ៉ាប៊ីសាអូឌីត។ ហើយបើតាមអារ៉ាប៊ីសាអូឌីត ជនសង្ស័យនេះគ្មានពាក់ព័ន្ធនឹងសំណុំរឿងឃាតកម្មលើអ្នកកាសែតឡើយ។ ស្ថានទូតអារ៉ាប៊ីសាអូឌីតប្រចាំ ទីក្រុងប៉ារីសបានស្នើសុំឱ្យបារាំងដោះលែងជននេះវិញ។ តើជនសង្ស័យនេះ ជានរណា ?
ចុះផ្សាយនៅថ្ងៃ៖
ស្តាប់ - ០២:០៣
ក្នុងលិខិតឆ្លងដែន ជនសង្ស័យមានឈ្មោះ ខាលីដ អាឡូតៃប៊ី Khalid Alotaibi អាយុ៣៣ឆ្នាំ។ បើតាមប្រភពស្និទ្ធនឹងសំណុំរឿង ជនសង្ស័យនេះមានជាប់ឈ្មោះក្នុងដីកាតាមចាប់ខ្លួន របស់ប៉ូលិសអន្តរជាតិ ដែលស្នើឡើងដោយតួកគី។ ហេតុដូច្នេះហើយបានជានៅពេលឆ្លងព្រំដែន ប៉ូលិសអាចសម្គាល់និងចាប់ខ្លួនបាន។ ពេលនេះ ប៉ូលិសបានឃាត់ខ្លួនជនសង្ស័យទុក ៤៨ម៉ោងសិន ដើម្បីធ្វើការផ្ទៀងផ្ទាត់អត្តសញ្ញាណ។ បើពិតជាមានអត្តសញ្ញាណដូចក្នុងដីកាអន្តរជាតិ នោះជនសង្ស័យនឹងត្រូវបញ្ជួនទៅតុលាការ តែអាចសុំបដិសេធមិនឱ្យបារាំងធ្វើបត្យាប័នទៅឱ្យតួកគីបាន។
ភ្លាមមួយរំពេច ស្ថានទូតអារ៉ាប៊ីសាអូឌីត ប្រចាំទីក្រុងប៉ារីស បានប្រកាសថា ជនសង្ស័យចាប់ខ្លួនបាននេះ គ្មានពាក់ព័ន្ធនឹងសំណុំរឿងឃាតកម្មលើរូបអ្នកកាសែតខាស្ហូហ្ស៊ីទេ និងបានស្នើសុំឱ្យបារាំងផ្តល់សេរីភាពដល់ពលរដ្ឋអារ៉ាប៊ីសាអូឌីតរូបនេះវិញ ព្រោះជនជាប់ចោទត្រូវបានតុលាការកាត់ទោសរួចអស់ហើយ។
ខាលីដ អាឡូតៃប៊ី ត្រូវជាប់សង្ស័យថាជាកងកម្មង់ដូរម្នាក់ក្នុងចំណោមកងកម្មង់ដូរជាង១០នាក់ ដែលបានចូលទៅក្នុងស្ថានកុងស៊ុលអារ៉ាប៊ីសាអូឌីត ប្រចាំទីក្រុងអ៊ីស្តង់ប៊ូល កាលពីថ្ងៃទី ២តុលាឆ្នាំ ២០១៨ ដើម្បីធ្វើឃាតរូបអ្នកកាសែត ឈ្មោះ ហ្សាម៉ាល់ ខាស្ហូហ្ស៊ី ដែលជាសកម្មជនបក្សប្រឆាំងអារ៉ាប៊ីសាអូឌីតផង។ ក្រោយពីបានបដិសេធពុំទទួលស្គាល់ថាមានហេតុការណ៍ឃាតកម្មក្នុងស្ថានកុងស៊ុល និងក្រោមសម្ពាធអន្តរជាតិ អារ៉ាប៊ីសាអូឌីត បានទទួលស្គាល់ថាឃាតកម្មនោះជាសកម្មភាពរបស់ភ្នាក់ងារអារ៉ាប៊ីសាអូឌីត ផ្ទាល់ទេ។ តុលាការអារ៉ាប៊ីសាអូឌីត បានកាត់ទោសជន៨នាក់ ក្នុងសំណុំរឿងឃាតកម្ម ដែលផ្អើលពេញពិភពលោក។ តែសម្រាប់អាមេរិក ជាអ្នកនៅក្រោយអំពើឃាតកម្មនោះគឺរាជបុត្រស្នងរាជ បេន សាល់ម៉ាន។ រងការរិះគន់និងខូចឈ្មោះ បុរសខ្លាំងអារ៉ាប៊ីសាអូឌីត ទើបមានកត្តិយសទទួលស្វាគមន៍ប្រធានាធិបតីបារាំង លោកអេម៉ាណុយអែល ម៉ាក្រុង ក្នុងក្របខ័ណ្ឌទស្សនកិច្ចផ្លូវការរបស់មេដឹកនាំលោកខាងលិច នៅអារ៉ាប៊ីសាអូឌីត ជាលើកទីមួយ កាលពីបីថ្ងៃមុននេះតែប៉ុណ្ណោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ