អង់គ្លេស-កូវីដ១៩៖រដ្ឋាភិបាលបង្កើនយុទ្ធនាការចាក់វ៉ាក់សាំងដូសទី៣ ដើម្បីទប់នឹងរលកឆ្លងដោយអូមីក្រុង
នៅក្នុងប្រទេសអង់គ្លេស នាយករដ្ឋមន្រ្តីលោកបូរីស ចនសុនបានប្រកាសឲ្យដឹងនាយប់ថ្ងៃអាទិត្យ ទី១២ ធ្នូថា រលកឆ្លងដោយមេរោគបំប្លែងខ្លួនអូមីក្រុងកំពុងមកដល់បណ្តើរៗ និងថា ដើម្បីការពារទប់នឹងរលកឆ្លងដោយអូមីក្រុង ការចាក់វ៉ាក់សាំងដូសទី៣ ឬដូសជំរុញជារឿងចាំបាច់។ លោកចនសុនបានសម្រេចឲ្យមានការចាក់ដូសទី៣ ចាប់ពីអាយុ ១៨ឆ្នាំឡើងទៅនៅទូទាំងប្រទេស។ គួរបញ្ជាក់ថា អូមីក្រុងដែលទើបឆ្លងចូលអង់គ្លេសជាង ២សប្តាហ៍កំពុងមានល្បឿនឆ្លងខ្លាំង។ គិតត្រឹមថ្ងៃអាទិត្យ ទី១២ ធ្នូ អង់គ្លេសមានករណីឆ្លងអូមីក្រុងសរុប ៣ ១៣៧ករណី ពោលកើន ៦៥% បើធៀបនឹងថ្ងៃសៅរ៍ ទី១១ ធ្នូដែលមានសរុបតែ ១ ៨៩៨ករណី។ គួររម្លឹកថា ជាង ១ឆ្នាំដែលអង់គ្លេសបានផ្តើមចាក់វ៉ាក់សាំងក្រោមទ្រង់ទ្រាយធំ។ ចុះហេតុអ្វីបានជាអង់គ្លេសបែរជាកំពុងប្រឈមនឹងរលកឆ្លងខ្លាំងជាថ្មីនៅពេលនេះ?។ យើងស្តាប់ការពន្យល់របស់លោកអូលីវីយេ ប៊ូឆូ គ្រូពេទ្យបារាំងឯកទេសជំងឺឆ្លង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៤
« ប្រទេសអង់គ្លេសមានលក្ខណៈពិសេស ព្រោះជាប្រទេសមួយដែលបានចាក់វ៉ាក់សាំងច្រើន។ តែវ៉ាក់សាំងភាគច្រើនដែលអង់គ្លេសបានប្រើជាវ៉ាក់សាំងAstraZeneca។ បើគេប្រដូចនឹងវ៉ាក់សាំងផ្សេង ពិសេសវ៉ាក់សាំង ARN Messager វ៉ាក់សាំង AstraZenecaមិនសូវមានឥទ្ធិពលធំធេង និងមិនសូវមានប្រសិទ្ធិភាពប៉ុន្មានទេ។
ដូច្នេះគេអាចគិតថា រដ្ឋាភិបាលអង់គ្លេសកំពុងមានក្តីបារម្ភចំពោះប្រសិទ្ធិភាពរបស់វ៉ាក់សាំង AstraZenecaនៅចំពោះមុខមេរោគបំប្លែងទូទៅ ពិសេសមេរោគបំប្លែងខ្លួនអូមីក្រុង។ អ៊ីចឹងហើយបានជារដ្ឋាភិបាលអង់គ្លេសខ្លាចខ្លាំងនៅចំពោះសន្ទុះកំណើនករណីឆ្លងរបស់អូមីក្រុងពេលនេះ។
ខ្ញុំគិតថា លោកបូរីស ចនសុនដែលធ្លាប់តែមានជំហរផ្ទុយនឹងការលើកឡើងរបស់ក្រុមគ្រូពេទ្យឯកទេសជំងឺឆ្លងតាំងពីថ្ងៃផ្ទុះកូវីដ១៩ ដំបូង និងធ្លាប់ទទួលរងការរិះគន់ពីប្រជាជនហាក់មានការប្រយ័ត្នប្រយែងខ្លាំងនៅពេលនេះ។ ខ្ញុំគិតថា លោកបូរីស ចនសុនមិនចង់ធ្វើខុសម្តងទៀតដូចដែលលោកធ្លាប់បានធ្វើពីពេលដំបូង »។
ចាប់ពីថ្ងៃចន្ទ ទី១៣ ធ្នូ អង់គ្លេសចាប់ផ្តើមបង្កើនយុទ្ធនាការចាក់វ៉ាក់សាំងដូសទី៣ នៅទូទាំងប្រទេស។ បន្ទាប់មកចាប់ពីថ្ងៃអង្គារ ទី១៤ ធ្នូ អ្នកដែលមានទំនាក់ទំនងជាមួយអ្នកចាក់វ៉ាក់សាំងឆ្លងកូវី១៩ នឹងត្រូវធ្វើតេស្តិ៍រកកូវីដ១៩ នៅរៀងរាល់ថ្ងៃក្នុងរយៈពេល ៧ថ្ងៃ។ ចំណែកអ្នកដែលមានទំនាក់ទំនងជាមួយអ្នកឆ្លងកូវី១៩ ដែលមិនបានចាក់វ៉ាក់សាំងនឹងត្រូវធ្វើចត្តាឡីស័កចំនួន ១០ថ្ងៃ។ ក្រៅពីវិធានការចុងក្រោយនេះ រដ្ឋាភិបាលអង់គ្លេសបានដាក់ឲ្យអនុវត្តឡើងវិញនូវវិធានការដែលធ្លាប់មានកន្លងមក ដូចជាតម្រូវឲ្យធ្វើការពីផ្ទះ និងតម្រូវឲ្យមានលិខិតចាក់វ៉ាក់សាំងសម្រាប់ចូលកន្លែងមួយចំនួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ