លោក ពូទីន និង លោក ស៊ី ប្រកាសទំនាក់ទំនងខ្លួនថាជា”គម្រូ"
ប្រធានាធិបតីរុស្ស៊ីនិងចិន ពេលសន្ទនាគ្នា តាម អនឡាញ ថ្ងៃពុធទី ១៥ ធ្នូ បានប្រកាស ទំនាក់ទំនងខ្លួនថាជា” គម្រូ“ ហើយនឹងជួបគ្នាផ្ទាល់ នាការប្រកួតកីឡាអូឡាំពិក នៅ ក្រុង ប៉េកាំង ខណៈដែលប្រទេសទាំងពីរ មានភាពតានតឹងដល់កម្រិតទៅហើយ ជាមួយ បស្ចិមលោក។ ពេលសន្ទនានោះ លោក វ៉្លាឌីមៀរ ពូទីន បានជម្រាបលោក ស៊ី ជីនពីង ថា គាត់នឹងទៅ ចូលរួមក្នុង ពិធីសម្ពោធ កីឡាអូឡាំពិករដូវរងា នៅក្រុងប៉េកាំង ក្នុងខែ កុម្ភៈខាងមុខ។
ចុះផ្សាយនៅថ្ងៃ៖
ស្តាប់ - ០៣:០០
សូរស័ព្ទជាមិត្តនឹងគ្នា នៃកិច្ចសន្ទនា ដែលភាគខ្លះផ្សាយបន្តផ្ទាល់ដោយទូរទស្សន៍រុស្ស៊ី ច្រៀកជាមួយ នឹងសម្លេងទិតៀនបស្ចិមលោក ដែលចោទម៉ូស្គូថា កំពុងគ្រោងលុកលុយចូលដែនដីអ៊ុយក្រែន ក៏ដូចជា ទិតៀនប៉េកាំង ក្នុងរឿងបង្ក្រាបប្រជាពលរដ្ឋចិន នៅ ហុងកុង និង ស៊ីនជាំង។
លោក វ៉្លាឌីមៀរ ពូទីន បានសាទរយ៉ាងក្លៀវក្លា គុណភាពនៃទំនាក់ទំនងឧបតោភាគី ដែលឈរលើ “ ការមិនលូកដៃជ្រៀតជ្រែក" , “ ការគោរពផលប្រយោជន៍ម្ខាងៗ” និង “ ភាពប្តេជ្ញាប្រែព្រំប្រទល់រួម ឲ្យទៅជា ខ្សែ ក្រវាត់នៃសន្តិភាពជារៀងរហូត និង រួមរស់ភូមិផងរបងល្អនឹងគ្នា”។
“ ខ្ញុំចាត់ទុកទំនាក់ទំនងនេះថាជា គម្រូមែនពិត នៃសហប្រតិបត្តិការ រវាងរដ្ឋនិងរដ្ឋ ក្នុងសតវត្សរ៍ទី ២១ “ -លោកប្រធានាធិបតីរុស្ស៊ី បានថ្លែងទៅកាន់ “ ប្រិយមិត្តគាត់ “ លោក ស៊ី ជីនពីង ។
ដោយគូសបញ្ជាក់ពី “ ឋិរភាពជីវិត” នៃ ទំនាក់ទំនងរុស្ស៊ី-ចិន លោកប្រធានាធិបតីចិន ស៊ី ជីនពីងបានប្រមាណថា ប្រទេស ទាំងពីរ បានក្លាយទៅហើយជា តំណាងនៃ ពហុប៉ូលពិតប្រាកដ និង នៃការការពារ សមធម៌អន្តរជាតិ និង សេចក្តីយុត្តិធម៌។ នេះបើតាមការផ្សាយដោយទីភ្នាក់ងារព័ត៌មានចិន Xinhua។
តាមសំដី ទីប្រឹក្សាការទូតវិមានក្រេមឡាំង លោក Yuri Ushakov ការពិភាក្សា រវាង លោក ពូទីន និង លោក ស៊ី គឺជា ការពិភាក្សា រវាង សហសេវិកពីរនាក់ និង រវាង មិត្តពីរនាក់។
ភាពជិតស្និទ្ធនឹងគ្នានេះ គឺខុសស្រឡះពី ការសន្ទនាមិនសូវរាក់ទាក់ ដែលមេដឹកនាំរុស្ស៊ី និង ចិន បានធ្វើ នាប៉ុន្មានសប្តាហ៍ចុងក្រោយ ជាមួយ មេដឹកនាំអាមេរិក លោក ចូ បៃដិន។
ប៉េកាំង និង ម៉ូស្គូ ក៏មានលទ្ធភាព បញ្ចេញមតិ អំពី ការចាត់ចែងដោយ លោកប្រធានាធិបតីអាមេរិកាំង ក្នុង សប្តាហ៍មុន ជា ជំនួបកំពូល តាមអនឡាញ នៃប្រជាធិបតេយ្យ ក្នុងឋានៈជា ប្រតិបត្តិការ ប្រឆាំងរុស្ស៊ី និង ចិន តែម្តង។
ចៅហ្វាយវិមានក្រេមឡាំង បានបញ្ជាក់ នៅថ្ងៃពុធ ថា ប្រមុខរដ្ឋទាំងពីរ នឹងជួបគ្នាដោយផ្ទាល់ នៅក្រុងប៉េកាំង ក្នុងឱកាសសម្ពោធ កីឡាអូឡាំពិករដូវរងា ដែលនឹងប្រព្រឹត្តទៅ ពីថ្ងៃ ទី៤ ដល់ទី ២០ ខែ កុម្ភៈ ។ មេដឹកនាំចិន ពីចំណែកខ្លួន មានប្រសាសន៍ថា គាត់នៅរង់ចាំជំនួបនេះ ដោយ” ច្រាស់ច្រាល់”។
មេដឹកនាំទាំងពីរ ខានជួបគ្នាដោយផ្ទាល់ សឹងពីរឆ្នាំហើយ តាំងពីមានផ្ទុះឡើងជាជំងឺឆ្លងសកល កូវីដ។ លោកប្រធានាធិបតីរុស្ស៊ី ក៏បានរំលឹកថា លោក ស៊ី ជីនពីង និង រូបគាត់ផ្ទាល់ សុទ្ធតែជំទាស់នឹង ការប៉ុនប៉ង ប្រែកីឡា និង ចលនាអូឡាំពិក ទៅជារឿងនយោបាយ ។
ចិន បានបរិហារទៅហើយ សេចក្តីសម្រេចពេលថ្មីៗ របស់ សហរដ្ឋអាមេរិក កាណាដា និង អូស្ត្រាលី ដែល មិនបញ្ជូនពួក អ្នកនយោបាយ ជាតំណាងខ្លួន ទៅចូលរួមក្នុងពិធីសម្ពោធនេះ ដោយប្រតិកម្មទល់នឹង ការរំលោភបំពានលើ សិទ្ធិមនុស្ស ជាពិសេសនៅខេត្ត ស៊ីនជាំង ប៉ែកពាយ័ព្យ ប្រទេសចិន ដែលរស់នៅភាគច្រើន គឺ ដោយ បណ្តាជនកាន់សាសនាអ៊ីស្លាម អ៊ុយហ្គួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ