អឺរ៉ុបត្រូវចំណាយ៥០០ពាន់លានអឺរ៉ូ ដើម្បីវិនិយោគមជ្ឈមណ្ឌលនុយក្លេអ៊ែរជំនាន់ថ្មី
ដើម្បីធ្វើអន្តរកាលថាមពល និងអាចផ្តល់ចំណាត់ថ្នាក់ឱ្យនុយក្លេអ៊ែរជាថាមពលបៃតងបាន អឺរ៉ុបត្រូវការធ្វើវិនិយោគមជ្ឈមណ្ឌលនុយក្លេអ៊ែរជំនាន់ថ្មី ចំនួន ៥០០ពាន់លានអឺរ៉ូ ពីពេលនេះដល់ឆ្នាំ២០៥០។ នេះបើតាមការអះអាងរបស់លោកស្នងការទីផ្សារផ្ទៃក្នុងអឺរ៉ុប ជេរី ប្រឺតុង Thierry Breton។
ចុះផ្សាយនៅថ្ងៃ៖
ស្តាប់ - ០១:៥៧
ធ្វើអន្តរកាលថាមពលដើម្បីបរិស្ថាន តម្រូវឱ្យមានការធ្វើបដិវត្តន៍ឧស្សាហកម្មទ្រង់ទ្រាយធំខ្លាំង។ ដូច្នេះ ការប្រកួតប្រជែងរកទុនមកអភិវឌ្ឍថាមពលក៏ត្រូវតែខ្លាំងដែរ។ ដើម្បីសម្រួលការផ្តល់ហិរញ្ញវត្ថុសម្រាប់វិនិយោគវិស័យថាមពល ក្នុងក្របខ័ណ្ឌនៃការប្រយុទ្ធប្រឆាំងនឹងការប្រែប្រួលអាកាសធាតុ អឺរ៉ុបចង់រាប់បញ្ចូលថាមពលនុយក្លេអ៊ែរមួយដែរ។ គណៈកម្មការអឺរ៉ុបបានបង្ហើបបង្ហាញគម្រោងផ្តល់ចំណាត់ថ្នាក់ “បៃតង” ដល់មជ្ឈមណ្ឌលនុយក្លេអ៊ែរ និងមជ្ឈមណ្ឌលថាមពលដើរដោយឧស្ម័ន កាលពីថ្ងៃទី ៣១ធ្នូ២០២១។ តាមរយៈគម្រោងនេះ អឺរ៉ុបអាចសាងសង់មជ្ឈមណ្ឌលនុយក្លេអ៊ែរជំនាន់ថ្មី ឱ្យបានមុនឆ្នាំ២០៤៥។
នៅថ្ងៃអាទិត្យទី ៩មករា២០២២នេះ ស្នងការអឺរ៉ុបបានលម្អិតថា មជ្ឈមណ្ឌលនុយក្លេអ៊ែរដែលអឺរ៉ុបមានស្រាប់ ត្រូវការថវិកាវិនិយោគចំនួន ៥០ពាន់លានអឺរ៉ូ ពីពេលនេះដល់ឆ្នាំ២០៣០ និង៥០០ពាន់លានអឺរ៉ូ សម្រាប់សាងសង់មជ្ឈមណ្ឌលនុយក្លេអ៊ែរជំនាន់ថ្មី ពីពេលនេះ ដល់ឆ្នាំ២០៥០។ បើតាមលោកស្នងការ បច្ចុប្បន្ននេះ ថាមពលអគ្គីសនីប្រើនៅអឺរ៉ុបចំនួន២៦%បានមកពីថាមពលនុយក្លេអ៊ែរ ហើយត្រូវចុះថយនៅត្រឹមយ៉ាងហោចក៏១៥% នៅឆ្នាំ២០៥០។
ចំណែកថាមពលកើតឡើងវិញ ត្រូវការថវិកាវិនិយោគចំនួន៦៥ពាន់លានអឺរ៉ូក្នុងមួយឆ្នាំៗ និងត្រូវបូកបន្ថែមនូវប្រាក់វិនិយោគប្រចាំឆ្នាំលើបណ្តាញរចនាសម្ព័ន្ធ ៤៥ពាន់លានអឺរ៉ូទៀត។ នេះបើតាមការគូសបញ្ជាក់របស់លោកស្នងការទីផ្សារផ្ទៃក្នុងអឺរ៉ុបដដែល។
គំនិតផ្តួចផ្តើមផ្តល់ចំណាត់ថ្នាក់ដល់ថាមពលនុយក្លេអ៊ែរ បានក្លាយជាប្រធានបទតស៊ូមតិយ៉ាងខ្លាំងក្លា ក្នុងរង្វង់សមាជិកសហភាពអឺរ៉ុប ម្ខាងនាំមុខដោយបារាំង ជាអ្នកគាំទ្រការប្រើថាមពលអគ្គីសនីនុយក្លេអ៊ែរ ឯអាល្លឺម៉ង់និងអូទ្រីសប្រឆាំង និងចង់នាំអឺរ៉ុប ឱ្យសម្រេចអព្យាក្រិត្យកាបោន នៅឆ្នាំ២០៥០ ដោយគ្មានថាមពលបរមាណូស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ