២០២១ ស្ថិតក្នុងចង្កោម៧ឆ្នាំចុងក្រោយ ដែលមានអាកាសធាតុក្តៅខ្លាំងជាងគេ
តាមទិន្នន័យផ្កាយរណប ភ្នាក់ងារអឺរ៉ុបខាងសង្កេតមើលផែនដី កូពែរនីគូស៍ Copernicus បានចេញរបាយការណ៍ នៅថ្ងៃចន្ទទី ១០មករា២០២២ បង្ហាញអំពីតុល្យការអាកាសធាតុគួរឱ្យព្រួយបារម្ភ។ ៧ឆ្នាំចុងក្រោយនេះ ពោលគឺពីឆ្នាំ២០១៥ដល់ឆ្នាំ២០២១ ជារយៈពេលដែលមានអាកាសធាតក្តៅខ្លាំងជាងគេបំផុត មិនធ្លាប់ជួបប្រទះទេនៅលើភពផែនដី។ នេះសបញ្ជាក់ឱ្យឃើញថា ជាមួយនឹងបរិមាណឧស្ម័នផ្ទះកញ្ចក់ឡើងដល់កំរិតកំពូល ផែនដីឡើងកម្តៅជានិច្ច។
ចុះផ្សាយនៅថ្ងៃ៖
ស្តាប់ - ០២:០៦
៧ឆ្នាំចុងក្រោយនេះ ជារយៈពេលដែលក្តៅជាងគេបំផុត នៅលើភពផែនដី។ ឯ២០២១ ជាប់ចំណាត់ថ្នាក់ជាឆ្នាំក្តៅជាងគេបំផុតមិនធ្លាប់មាន លំដាប់លេខ៥ទេ ប៉ុន្តែជាឆ្នាំដែលបានបំបែកឯតទគ្គកម្មអឺរ៉ុប នៅរដូវក្តៅ ជាឆ្នាំដែលមានគ្រោះមហន្តរាយបណ្តាលមកការប្រែប្រួលអាកាសធាតុ យ៉ាងសាហាវនិងអាក្រក់បំផុត ៖ ក្តៅហួតហែងមរណៈនៅអាមេរិកខាងជើង នៅអឺរ៉ុបខាងត្បូង ភ្លើងឆេះព្រៃនៅកាណាដា ស៊ីបេរី ភ្លៀងធ្លាក់ខ្លាំងហួសហេតុនៅចិន នៅអឺរ៉ុបខាងលិច។
បើតាមភ្នាក់ងារអឺរ៉ុប Copernicus សីតុណ្ហភាពជាមធ្យមប្រចាំឆ្នាំ២០២១ ខ្ពស់ជាងសម័យមុនឧស្សាហកម្ម (១៨៥០-១៩០០) ប្រមាណពី ១,១អង្សាទៅ ១,២អង្សា។ បានន័យថាជិតស្មើនឹងកម្មវត្ថុដែលមានចែងក្នុងកិច្ចព្រមព្រៀងអាកាសធាតុក្រុងប៉ារីសទៅហើយ។ កាលពីឆ្នាំ ២០១៥ ពិភពលោកបានព្រមព្រៀងកំរិតការឡើងកម្តៅអាកាសធាតុឱ្យបានក្រោម២អង្សា និងក្រោម១អង្សាកន្លះផងបើអាច នៅដំណាច់សតវត្សរ៍ទី២១។
មិនតែប៉ុណ្ណោះ ភ្នាក់ងារកូពែរនីគូស៍ បានវាស់ឃើញទៀតថា ឆ្នាំ ២០២១ ជាឆ្នាំដែលមានកំហាប់ឧស្ម័នកាបូនិក ផលិតដោយស្នាដៃមនុស្សមកបំពុលបរិយាកាស ខ្ពស់ដល់កំរិតកំពូល គឺ ៤១៤,៣PPM។ កាលពីឆ្នាំ២០២០ ទោះសកម្មភាពឧស្សាហកម្មបានបន្ថយល្បឿន ក៏កំហាប់ឧស្ម័នកាបូនិកបានឡើងខ្ពស់ខ្លាំងដែរ ដល់ទៅ ៤១៣,២PPM ពោលគឺ១៤៩%លើសសម័យមុនឧស្សាហកម្ម។ ចំណែកឧស្ម័នមេតាន ដែលជាប្រភេទឧស្ម័នផ្ទះកញ្ចក់ដ៏កំណាចជាងCO2ទៅទៀតនោះ ក៏ឡើងដល់អតិបរិមាតែម្តងដែរ។ នេះបើតាមទិន្នន័យបឋមរបស់ភ្នាក់ងារអឺរ៉ុបដដែល។ នៅក្នុងសន្និសីទអាកាសធាតុ COP26 កាលពីខែវិច្ឆិកា២០២១ ប្រទេសជាងមួយរយបានផ្តួចផ្តើមគំនិតថាត្រូវកាត់បន្ថយឧស្ម័នមេតានចំនួន៣០% ដើម្បីសម្រេចកម្មវត្ថុទប់កម្តៅផែនដីឱ្យឡើងត្រឹម១អង្សាកន្លះបាន។ ប៉ុន្តែបើយោលតាមពាក្យប្តេជ្ញារបស់រដ្ឋាភិបាលនីមួយៗ ក្រោយ Glasgow កម្តៅសីតុណ្ហភាពនៃភពផែននឹងបោះពួយឡើងដល់២,៧អង្សាឯណោះ នៅឆ្នាំ២១០០។
នាយកទីភ្នាក់ងារបានអះអាងថា នេះជាសារព្រមានថ្មី និងជារបាយការណ៍ពញ្ញាក់រំលឹកអំពីភាពចាំបាច់ដែលត្រូវប្តូរផ្លាស់ ដែលត្រូវចាត់វិធានការជាក់ស្តែង និងផ្តាច់ព្រ័ត្រហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ