WHO៖នៅ២ខែខាងមុខ ជាងពាក់កណ្តាលប្រជាជនអឺរ៉ុបនឹងអាចឆ្លងមេរោគកូវីដ អូមីក្រុង
ជាមួយសន្ទុះឆ្លងលឿននៃមេរោគកូវីដអូមីក្រុង នៅដើមឆ្នាំនេះ អង្គការសុខភាពពិភពលោក បានវាយតម្លៃថា ជាងពាក់កណ្តាលនៃប្រជាជនអឺរ៉ុបនឹងអាចឆ្លង មេរោគកូវីដបំប្លែងខ្លួន អូមីក្រុង ក្នុងរយៈពេល២ខែខាងមុខ។ នៅក្នុងសន្និសីទកាសែតកាលពីថ្ងៃអង្គារ ទី ១១មករា ២០២២ ប្រធានអង្គការពិភពលោកប្រចាំអឺរ៉ុបបានព្រមានថា អូមីក្រុងនឹងធ្វើឲ្យរលកឆ្លងជំងឺ កូវីដបោកបក់ពីលិចទៅកើត ពេញផ្ទៃទ្វីបអឺរ៉ុប ពីពេលនេះ ទៅ៦ ឬ៨សប្តាហ៍។
ចុះផ្សាយនៅថ្ងៃ៖
ស្តាប់ - ០២:៤២
អឺរ៉ុបកំពុងបោកខ្ទប់ដោយមហារលកចម្លងថ្មីនៃជំងឺកូវីដ១៩។ តាមអង្គការសុខភាពពិភពលោក ក្នុងមួយសប្តាហ៍ដំបូង នៃខែមករាឆ្នាំថ្មីនេះ មានប្រជាជនអឺរ៉ុប ៧លាននាក់បានឆ្លងមេរោគកូវីដ។ ប្រទេសអឺរ៉ុបចំនួន៥០ (ក្នុងចំណោមសរុប ៥៣) ប្រកាសរកឃើញមានករណីឆ្លងអូមីក្រុង។ គិតមកដល់ថ្ងៃចន្ទដើមសប្តាហ៍នេះ ពាក់កណ្តាលនៃប្រទេសអឺរ៉ុប (២៦ប្រទេស) អះអាងថា ១%នៃប្រជាជនរបស់ខ្លួនបានឆ្លងមេរោគកូវីដក្នុងមួយសប្តាហ៍ៗ។
ផ្អែកទៅលើល្បឿននៃរលកចម្លងថ្មី បង្កឡើងដោយអូមីក្រុង ប្រធានអង្គការសុខភាពពិភពលោក ប្រចាំតំបន់អឺរ៉ុប លោក Hans Kluge បានព្រមានថា នៅក្នុងរយៈពេល២ខែទៅមុខ ពាក់កណ្តាលនៃប្រជាជនអឺរ៉ុបនឹងអាចឆ្លងជំងឺកូវីដ។ សូមបញ្ជាក់ថា ទ្វីបអឺរ៉ុបដែលអាចមានបញ្ចូលប្រទេសអាស៊ីកណ្តាលមួយចំនួន មានប្រជាជនរស់នៅជាង ៧៤៨លាននាក់។
កាលពីខែវិច្ឆិកាកន្លងទៅ នៅពេលអឺរ៉ុបចាប់ផ្តើមប្រឈមរលកទី៥នៃជំងឺកូវីដ ប្រធានអង្គការសុខភាពពិភពលោកប្រចាំអឺរ៉ុបដដែលធ្លាប់បានសំដែងក្តីបារម្ភពីល្បឿនឆ្លងនៃមេរោគកូវីដក្នុងទឹកដីអឺរ៉ុប និងថាកូវីដ១៩អាចនឹងឆក់យកជីវិតមនុស្សអស់កន្លះលាននាក់បន្ថែមទៀត នៅអឺរ៉ុប គិតរហូតដល់ចុងខែកុម្ភៈ២០២២។
នៅក្នុងសន្និសីទកាសែតកាលពីថ្ងៃអង្គារ ប្រធានអង្គការសុខភាពពិភពលោកប្រចាំទ្វីបអឺរ៉ុបបានមានប្រសាសន៍ដែរថា អូមីក្រុងដែលងាយឆ្លង និងឆ្លងលឿនខ្លាំងមានលក្ខណៈពិសេសបំប្លែងខ្លួនដែលអនុញ្ញាតឲ្យមេរោគអាចជ្រាបចូលយ៉ាងងាយទៅក្នុងជាលិការបស់មនុស្ស និងអាចឆ្លងទៅកាន់មនុស្សដែលធ្លាប់ឆ្លងកូវីដរួចហើយ ឬអ្នកដែលបានទទួលចាក់វ៉ាក់សាំង។ ទាក់ទងនឹងអូមីក្រុងនេះ ក្រុមហ៊ុនឱសថអាមេរិក Pfizer បានអះអាងថា គេនឹងអាចផលិតចេញ វ៉ាក់សាំងប្រឆាំងមេរោគអូមីក្រុងនៅអំឡុង ខែមីនាខាងមុខ។
សម្រាប់លោក Hans Kluge ទោះបីជា អូមីក្រុង មិនបានធ្វើឲ្យ ករណីស្លាប់ដោយសារជំងឺកូវីដកើនឡើងមែន ប៉ុន្តែ ល្បឿនឆ្លង របស់អូមីក្រុងកំពុងដាក់សម្ពាធខ្លាំងលើមន្ទីរពេទ្យ ក្នុងបណ្តាប្រទេសអឺរ៉ុប ដែលកំពុងចាប់ផ្តើមឡើងចាល់បណ្តើរៗ ដោយអ្នកជំងឺកូវីដ។
ជាមួយរលកឆ្លងខ្លាំងនៃជំងឺកូវីដ រដ្ឋាភិបាលនៅប្រទេសអឺរ៉ុបមួយចំនួន បានបង្កើនល្បឿនយុទ្ធនាការចាក់ដូសជំរុញ និងចាក់វ៉ាក់សាំងបង្ការកូវីដក្នុងចំណោមប្រជាជនដែលមិនទាន់ចាក់វ៉ាក់សាំងទាល់តែសោះ ដូចជាកុមារជាដើម។ នៅបារាំង ជាមួយករណីឆ្លង ជាង ២សែននាក់ ក្នុងមួយថ្ងៃៗ នៅក្នុងរយៈពេលជាង១សប្តាហ៍មកនេះ សាលារៀនរាប់ពាន់ត្រូវបានបិទទ្វារដោយសារការកើនឡើងនៃករណីឆ្លងកូវីដក្នុងចំណោមកុមារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ