ប្រធានាធិបតីអ៊ុយក្រែនចាត់ទុកការឈ្លានពានរបស់រុស្ស៊ីថា ជាចេតនាលុបបំបាត់ចោលប្រជាជនអ៊ុយក្រែន
មកដល់ថ្ងៃទី៧ នៃសង្រ្គាមអ៊ុយក្រែន កងទ័ពរុស្ស៊ីបានអះអាងថា គេបានវាយចូលគ្រប់គ្រងទីក្រុងឆ្នេរសមុទ្រនៅភាគខាងត្បូងអ៊ុយក្រែន ចំណែកកងឆ័ត្រយោងរុស្ស៊ីបានវាយលុកចូលដល់ទីក្រុងខាកៀវ ទីក្រុងធំទី២ របស់អ៊ុយក្រែន។ តាមអាជ្ញាធរគ្រប់គ្រងថ្នាក់តំបន់អ៊ុយក្រែន មនុស្ស២២នាក់ ស្លាប់ និងមនុស្សជាង១០០នាក់រងរបួសនៅក្នុងការវាយប្រហាររបស់រុស្ស៊ី ទៅលើទីក្រុងខាកៀវ នៅមួយថ្ងៃចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:៥១
នៅយប់ថ្ងៃអង្គារ ឈានចូលដល់ថ្ងៃពុធនេះ កងឆ័ត្រយោងរុស្ស៊ីបានទម្លាក់ខ្លួនចូលដល់ទីក្រុងខាកៀវ (Kharkiv) បន្ទាប់ពីទីក្រុងធំទី២របស់អ៊ុយក្រែនក្បែរព្រំដែនរុស្ស៊ីមួយនេះបានរងការវាយប្រហារដ៏សន្ធឹកដោយគ្រាប់ផ្លោងរបស់កងទ័ពរុស្ស៊ី កាលពីថ្ងៃអង្គារ។ នេះបើតាមការប្រកាសរបស់កងទ័ពអ៊ុយក្រែន នៅលើបណ្តាញតេឡេក្រាម នៅថ្ងៃពុធទី២មីនា។ តាមកងទ័ពអ៊ុយក្រែន ការប្រយុទ្ធគ្នាក៏បានចាប់ផ្តើមមានបណ្តើរៗនៅក្នុងទីក្រុងខាកៀវ ជាទីដែលមានប្រជាជនរស់នៅជាង ១លាន៤សែននាក់។
ទីប្រឹក្សារដ្ឋមន្រ្តីមហាផ្ទៃអ៊ុយក្រែនវិញបាននិយាយថា ស្ទើរគ្រប់កន្លែងក្នុងទីក្រុងខាកៀវបានរងការបំផ្លាញដោយសារមីស៊ីល គ្រាប់ផ្លោងរបស់កងទ័ពរុស្ស៊ី ដែលបានសម្លាប់ជីវិតមនុស្សជាង២០នាក់ និងរបួសជាង១០០នាក់ កាលពីថ្ងៃអង្គារ។
នៅថ្ងៃអង្គារដែរ មីស៊ីលរបស់រុស្ស៊ីបានបាញ់បំផ្លាញអង់តែនទូរទស្សន៍ដ៏ធំជាងគេរបស់អ៊ុយក្រែន នៅទីក្រុងកៀវ និងបានសម្លាប់មនុស្ស៥នាក់។ នៅក្រោយការបាញ់បំផ្លាញអង់តែនទូរទស្សន៍ដែលសាងសង់នៅក្នុងតំបន់គោរពវិញ្ញាណក្ខន្ធជនរងគ្រោះជ្វីហ្វក្នុងសម័យសង្រ្គាមលោកលើកទី២ ប្រធានាធិបតី អ៊ុយក្រែន លោកហ្សេឡេនស្គី បានថ្លែងចាត់ទុកការវាយប្រហារឈ្លានពានរបស់រុស្ស៊ីទៅលើអ៊ុយក្រែនថា ជាចេតនារបស់រុស្ស៊ីដែលចង់កម្ចាត់ប្រជាជនអ៊ុយក្រែន បំបាត់ប្រវត្តិសាស្រ្ត និងលុបអ៊ុយក្រែនពីផែនទី។
ដូច្នេះ ប្រមុខរដ្ឋអ៊ុយក្រែនបានអំពាវនាវឲ្យសហគមន៍ជនជាតិជ្វីហ្វនៅក្នុងពិភពលោកងើបឡើងដើម្បីនិយាយថ្កោលទោសរុស្ស៊ី។
នៅក្រោយការវាយលុករបស់កងឆ័ត្រយោងរុស្ស៊ីនៅទីក្រុងខាកៀវ រដ្ឋធានីកៀវអាចជាផ្ទាំងស៊ីបធំទី២របស់កងទ័ពរុស្ស៊ី។ រូបភាពផ្កាយរណប របស់ក្រុមហ៊ុនអាមេរិកាំងMaxar បានបង្ហាញកាលពីថ្ងៃអង្គារ ក្បួនរថពាសដែក និងរថយន្តដឹកកងទ័ពរុស្ស៊ីប្រវែង៦០គីឡូម៉ែត្រកំពុងបែរសំដៅទីក្រុងកៀវ។ តាមអ្នកទទួលខុសត្រូវម្នាក់នៅ ក្រសួងការពារជាតិអាមេរិកដែលដកស្រង់សំដីដោយទីភ្នាក់ងារព័ត៌មានបារាំងAFP ក្បួនកងទ័ពរុស្ស៊ីមិនសូវលូនលឿនទៅមុខ ដោយសារការប្រយុទ្ធតដៃពីសំណាក់កម្លាំងតស៊ូអ៊ុយក្រែន និងដោយសារបញ្ហាខ្វះខាតស្បៀង និងប្រេងឥន្ធនៈ។
នៅពេលកងទ័ពថ្មើរជើងរុស្ស៊ីមិនសូវរុលទៅមុខសំដៅក្រុងកៀវ ប៉ុន្តែ កងទ័ពរុស្ស៊ីបានសម្រេចជោគជ័យច្រើននៅសមរភូមិភាគខាងត្បូងអ៊ុយក្រែន។ នៅថ្ងៃ ពុធនេះ ក្រសួងការពារជាតិរុស្ស៊ីបានអះអាងវាយយកបាន Kherson ទីក្រុងឆ្នេរសមុទ្រ ក្បែរតំបន់គ្រីមេដែលរុស្ស៊ីបានកាត់យកពីអ៊ុយក្រែនកាលពីឆ្នាំ ២០១៤។ នៅក្នុងការប្រកាសតាមកញ្ចក់ទូរទស្សន៍ អ្នកនាំពាក្យរបស់ក្រសួងការពារជាតិរុស្ស៊ីបាននិយាយថា កងទ័ពរុស្ស៊ីបានចូលគ្រប់គ្រងទីក្រុង Kherson និងថាភាគីរុស្ស៊ីកំពុងពិភាក្សាជាមួយអាជ្ញាធរមូលដ្ឋានដើម្បីស្តារសណ្តាប់ធ្នាប់។ ចៅហ្វាយក្រុងKherson វិញបាននិយាយផ្ទុយពីការលើកឡើងរបស់រុស្ស៊ីដោយថា Kherson ស្ថិតនៅក្នុងដៃរបស់ប្រជាជនអ៊ុយក្រែននៅឡើយ និងថា ភារៈកិច្ចរបស់អាជ្ញាធរអ៊ុយក្រែនគឺត្រូវប្រមូលសាកសពជនរងគ្រោះ ស្តារឡើងវិញ បណ្តាញអគ្គិសនី ហ្គាសនិងទឹកនៅតំបន់ដែលរងការវាយប្រហាររបស់កងទ័ពរុស្ស៊ី។
គិតសរុបក្នុងរយៈពេល៧ថ្ងៃដែលរុស្ស៊ីធ្វើសង្រ្គាមឈ្លានពានអ៊ុយក្រែន កងទ័ពរុស្ស៊ីតាមរយៈអ្នកនាំពាក្យក្រសួងការពារជាតិ អះអាងថា គេបានបាញ់បំផ្លាញ រចនាសម្ព័ន្ធយោធាអ៊ុយក្រែន ជាង ១៥០០កន្លែង បំផ្លាញយន្តហោះ ៥៨គ្រឿង រថក្រោះរបស់កងទ័ពអ៊ុយក្រែនចំនួន៤៧២គ្រឿង។ ប្រធានាធិបតីអ៊ុយក្រែនវិញលើកឡើងថា ភាគីរុស្ស៊ីក៏ខាតបង់ធ្ងន់ធ្ងរណាស់ដែរ ព្រោះថា កងទ័ពរុស្ស៊ីប្រមាណ ៦០០០នាក់ស្លាប់នៅក្នុងសង្រ្គាមអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ