សង្គ្រាមអ៊ុយក្រែន ៖ បាត់ការទាក់ទងជាមួយប្រព័ន្ធគ្រប់គ្រងសារធាតុនុយក្លេអ៊ែរនៅឈែរណូប៊ីល
ទីភ្នាក់ងារថាមពលបរមាណូអន្តរជាតិ បានសម្តែងការកង្វល់យ៉ាងខ្លាំងនៅថ្ងៃ ៩ មីនានេះ ដោយគូសបញ្ជាក់ថា ប្រព័ន្ធគ្រប់គ្រង ពីចម្ងាយ សារធាតុនុយក្លេអ៊ែរនៅមជ្ឈមណ្ឌលឈែរណូប៊ីល ឈប់ផ្តល់ទិន្នន័យមកឱ្យភ្នាក់ងារ។ មជ្ឈមណ្ឌលអគ្គីសនីនុយក្លេអ៊ែរឈែរណូប៊ីល របស់អ៊ុយក្រែន ដែលធ្លាប់មានគ្រោះថ្នាក់ដ៏ធ្ងន់ធ្ងរបំផុតក្នុងប្រវត្តិសាស្ត្រនុយក្លេអ៊ែរស៊ីវិល កាលពីឆ្នាំ១៩៨៦ ស្ថិតក្រោមការគ្រប់គ្រងរុស្ស៊ី តាំងពីរុស្ស៊ីចូលវាយប្រហារលើអ៊ុយក្រែនភ្លាមមក។
ចុះផ្សាយនៅថ្ងៃ៖
ស្តាប់ - ០១:៥១
លោក Rafael Grossi ប្រធានទីភ្នាក់ងារថាមពលបរមាណូអន្តរជាតិ ដែលជាស្ថាប័នរបស់អង្គការសហប្រជាជាតិទទួលបន្ទុកគ្រប់គ្រងវិស័យនុយក្លេអ៊ែរ បានអះអាងថា ការទាក់ទងជាមួយប្រព័ន្ធគ្រប់គ្រងសារធាតុនុយក្លេអ៊ែរ ដើម្បី “ធានា” សុវត្ថិភាពរបស់មជ្ឈមណ្ឌលនុយក្លេអ៊ែរឈែរណូប៊ីល ត្រូវបានកាត់ផ្តាច់។ បណ្តាញទាក់ទងនេះ ជាការផ្តល់នូវទិន្នន័យ សម្រាប់ “ធានា” តាមផ្នែកបច្ចេកទេស ថាគ្មានការរីកសាយភាពសារធាតុនិងអាវុធនុយក្លេអ៊ែរ និងអាចចាប់សញ្ញាបានជាមុននៅមានករណីប្រើប្រាស់ហួសកំរិត។
ចំណែកស្ថានភាពរបស់អ្នកបំរើការនៅក្នុងមជ្ឈមណ្ឌលវិញ មានអ្នកបច្ចេកទេសនិងអ្នកយាមអ៊ុយក្រែនជាង២០០នាក់ កំពុងជាប់កុន ហើយត្រូវធ្វើការដោយគ្មានឈប់សម្រាកសោះអស់រយៈ១៣ថ្ងៃជាប់គ្នាមកហើយ ក្រោមបញ្ជារបស់រុស្ស៊ី។ ដោយយល់ពីសក្តានុពលនៃគ្រោះថ្នាក់នុយក្លេអ៊ែរ ភ្នាក់ងារAIEAបានស្នើសុំឱ្យរួចហើយឱ្យរុស្ស៊ីដាក់វេនឆ្លាស់គ្នាធ្វើការ ផ្តល់ម៉ោងសម្រាក និងកំណត់ពេលម៉ោងធ្វើការត្រឹមត្រូវដើម្បីសុវត្ថិភាពរបស់មជ្ឈមណ្ឌល។
សម្រាប់ពេលនេះ អ្នកចាត់ចែងអ៊ុយក្រែនអាចទាក់ទងជាមួយនឹងមជ្ឈមណ្ឌលបានតាមរយៈសារអេឡិចត្រូនិកតែប៉ុណ្ណោះ។ ហេតុដូច្នេះហើយបានជាលោក Grossi បានទទូចហើយទទូចទៀតសុំធ្វើដំណើរទៅមជ្ឈមណ្ឌលឈែរណូប៊ីលឬកន្លែងផ្សេងទៀត ដើម្បីបានជំរុញឱ្យគ្រប់ភាគីសន្យារក្សាសន្តិសុខ និងសន្យាធានាមិនធ្វើឱ្យមានគ្រោះថ្នាក់នៅមជ្ឈមណ្ឌលអគ្គីសនីនុយក្លេអ៊ែរអ៊ុយក្រែន។
សូមបញ្ជាក់ថា ក្រៅពីឈែរណូប៊ីល រុស្ស៊ីបានចូលគ្រប់គ្រងតាំងពីថ្ងៃសុក្រទី ៤មីនាមកមជ្ឈមណ្ឌលនុយក្លេអ៊ែរ Zaporojie មួយទៀតដែលស្ថិតនៅភាគអាគ្នេយ៍អ៊ុយក្រែន។ ភ្នាក់ងារសារព័ត៌មានរុស្ស៊ី RIA Novosti បានផ្សព្វផ្សាយនៅថ្ងៃពុធនេះ រូបភាពវីដេអូជាច្រើន បង្ហាញពីសកម្មភាពឆ្មាំជាតិរុស្ស៊ីនៅមុខមជ្ឈមណ្ឌល ដោយប្រកាសថាទាហានរុស្ស៊ីគ្រប់គ្រងស្ថានភាពបានទាំងស្រុង ហើយមជ្ឈមណ្ឌលដំណើរការជាធម្មតា។
Zaporojie ជាមជ្ឈមណ្ឌលនុយក្លេអ៊ែរដ៏ធំជាងគេមួយដែរនៅអឺរ៉ុប មានបំពាក់ម៉ាស៊ីនប្រតិករនៅឆ្នាំ១៩៨៤-១៩៩៥ ដែលទំនើបនិងមានសុវត្ថិភាពជាងរោងចក្រនុយក្លេអ៊ែរឈែរណូប៊ីល ដែលសង់ឡើងកាលពីឆ្នាំ១៩៧០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ