អាមេរិកបង្កើនជំនួយយោធា៨០០លានដុល្លារបន្ថែមទៀតដល់អ៊ុយក្រែន
ខណៈការច្បាំងប្រយុទ្ធគ្នានៅឯសមរភូមិក្នុងសង្គ្រាមអ៊ុយក្រែនកំពុងតែបន្តក្តៅគគុក សហរដ្ឋអាមេរិកក៏កំពុងបង្កើនជំនួយយោធារបស់ខ្លួនទៅឲ្យអ៊ុយក្រែនដែរ។ បើតាមមន្ត្រីសេតវិមាន លោកប្រធានាធិបតី ចូ បៃដិន នឹងប្រកាសផ្តល់ជំនួយថ្មីបន្ថែមទៀតក្នុងតម្លៃ ៨០០លានដុលារសម្រាប់ក្រុងកៀវនៅថ្ងៃពុធ ទី១៦ មីនា ឆ្នាំ២០២២នេះ។
ចុះផ្សាយនៅថ្ងៃ៖
ស្តាប់ - ០២:១២
សេចក្តីប្រកាសរបស់លោក ចូ បៃដិន ត្រូវគេរំពឹងថា នឹងចាប់ផ្តើមនៅវេលាម៉ោង ១១ និង ៤៥ នាទីព្រឹក ម៉ោងនៅក្នុងសហរដ្ឋអាមេរិក បន្ទាប់ពីការថ្លែងសុន្ទរកថាពីចម្ងាយរបស់លោកប្រធានាធិបតីអ៊ុយក្រែន ហ្សេឡេនស្គី ទៅកាន់សភាអាមេរិក។
បើគិតទាំងជំនួយថ្មីបន្ថែមចំនួន ៨០០លានដុល្លារ ជំនួយសរុបរបស់អាមេរិក សម្រាប់អ៊ុយក្រែនតែក្នុងមួយសប្តាហ៍មកនេះ កើនដល់ ១ពាន់លានដុល្លារហើយ។ យោងតាមមន្ត្រី សេតវិមានអាមេរិក ជំនួយសន្តិសុខថ្មី ដែលនឹងប្រកាសដោយលោក បៃដិន រួមមានមីស៊ីលប្រឆាំងរថក្រោះ និងមីស៊ីលប្រឆាំងយន្តហោះជាច្រើន។ គឺសព្វាវុធទាំងនេះហើយ ដែលបានជួយអ៊ុយក្រែន ទប់ទល់នឹងការវាយប្រហារយ៉ាងសន្ធឹកពីសំណាក់កងទ័ពរុស្ស៊ី ក្នុងរយៈពេលបីសប្តាហ៍កន្លងមកនេះ។
នៅខណៈដែលសមាជិកសភាអាមេរិកមួយចំនួនកំពុងជំរុញឲ្យរដ្ឋាភិបាលក្រុងវ៉ាស៊ីនតោនចាត់វិធានការកាន់តែម៉ឺងម៉ាត់ ឆ្លើយតបចំពោះទង្វើឈ្លានពានរបស់រុស្ស៊ី ប្រធានាធិបតីអ៊ុយក្រែនលោកហ្សេឡេនស្គីឯណោះវិញក៏គ្រោងនឹងបន្តអំពាវនាវសុំជំនួយបន្ថែមទៀតនៅក្នុងពេលថ្លែងសុន្ទរកថាតាមវីដេអូពីចម្ងាយទៅកាន់សភាអាមេរិកនាប៉ុន្មានម៉ោងខាងមុខ។
គួររំឭកថា លោក បៃដិន បានប្រកាសផ្តល់ជំនួយយោធាបន្ថែមចំនួន ២០០លានដុល្លារដល់អ៊ុយក្រែនរួចហើយកាលពីថ្ងៃសៅរ៍។ ជំនួយខាងលើបន្ថែមពីលើជំនួយយោធា ៣៥០លានដុល្លារដែលទីក្រុងវ៉ាស៊ីនតោនបានប្រកាសផ្តល់ឲ្យអ៊ុយក្រែនកាលពីចុងខែកុម្ភៈ។ ជំនួយរបស់អាមេរិកដល់អ៊ុយក្រែននេះគឺជំនួយផ្នែកសន្តិសុខដ៏ធំបំផុតនៅក្នុងប្រវត្តិសាស្ត្ររបស់អាមេរិក។
មន្ត្រីសេតវិមានម្នាក់និយាយថា រហូតមកទល់នឹងពេលនេះ អាមេរិកនៅតែជាប្រទេសដែលផ្តល់ជំនួយយោធាច្រើនជាងគេបំផុតដល់អ៊ុយក្រែន។ យ៉ាងណាក៏ដោយ លោកប្រធានាធិបតីអាមេរិក បៃដិន បានបដិសេធ ទៅនឹងសំណើរបស់លោក ហ្សេឡេនស្គី ដែលជំរុញឲ្យ វ៉ាស៊ីនតោន សហភាពអឺរ៉ុបនិងអង្គការអូតង់បង្កើតតំបន់ហាមឃាត់ការហោះហើរនៅអ៊ុយក្រែន។ លោក បៃដិន បានទាញសញ្ញាអាសន្នថា ការធ្វើដូច្នោះ អាចនឹងបង្កឲ្យមានសង្គ្រាមដ៏មហន្តរាយជាមួយរុស្ស៊ី ដែលជាប្រទេសមហាអំណាចអាវុធនុយក្លេអ៊ែរមួយក្នុងលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ