តុលាការរុស្ស៊ី សម្រេចបិទហ្វេសប៊ុកនិងអ៊ីនស្តាក្រាម
តុលាការរុស្ស៊ីបានសម្រេចនៅថ្ងៃចន្ទ ២១មីនាម្សិលមិញបិទបណ្តាញសង្គមហ្វេសប៊ុកនិងអ៊ីនស្តាក្រាមក្រោមបទញុះញង់ឲ្យមានសកម្មភាពជ្រុលនិយមប្រឆាំងនឹងទីក្រុងមូស្គូ។ ចំណាត់ការនេះត្រូវបានគេមើលឃើញថាជាផ្នែកមួយនៃកិច្ចខិតខំប្រឹងប្រែងយ៉ាងស្វិតស្វាញរបស់វិមានក្រេមឡាំងក្នុងការបង្ក្រាបបណ្តាញសង្គមក្នុងអំឡុងសង្គ្រាមអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:២១
សេចក្តីសម្រេចរបស់តុលាការរុស្ស៊ី ធ្លាក់មកក្រោយរុស្ស៊ីខឹងនិងបានប្រកាសបើកការស៊ើបអង្កេតប្រឆាំងនឹងក្រុមហ៊ុនមេតាដែលជាក្រុមហ៊ុនបច្ចេកវិទ្យាយក្សរបស់អាមេរិក។ អាជ្ញាធររុស្ស៊ីកាលពីថ្ងៃទី១១ មីនា បានចោទប្រកាន់ក្រុមហ៊ុនមេតាដែលជាក្រុមហ៊ុនមេរបស់ហ្វេសប៊ុក និងអ៊ីនស្តាក្រាមពីបទមិនលុបសារដែលបង្កប់ន័យស្អប់ ឬប្រឆាំងនឹងជនជាតិរុស្ស៊ី ឬក៏ប្រទេសរុស្ស៊ី ចាប់តាំងពីលោកពូទីនបញ្ជូនទ័ពចូលវៃអ៊ុយក្រែនកាលពីថ្ងៃទី២៤ កុម្ភៈមក។
នៅក្នុងសវនាកាលពីម្សិលមិញ ភ្នាក់ងារសន្តិសុខរុស្ស៊ី (FSB) បានចោទប្រកាន់ក្រុមហ៊ុនមេតាថាកំពុងធ្វើសកម្មភាពដែលប្រឆាំងនឹងផលប្រយោជន៍របស់ទីក្រុងមូស្គូ និងកងទ័ពរុស្ស៊ីដែលកំពុងធ្វើសង្គ្រាមនៅអ៊ុយក្រែន។
នៅក្នុងប្រទេសរុស្ស៊ី គេមិនអាចចូលប្រើហ្វេសប៊ុកនិងធ្វីតធ័របានឡើយ តាំងពីដើមខែមីនាមក ចំណែកអ៊ីនស្តាក្រាមដែលជាបណ្តាញសង្គមយុវជនរុស្ស៊ី និយមប្រើខ្លាំងណាស់នោះវិញត្រូវបានបិទនៅក្នុងប្រទេសរុស្ស៊ីតាំងពីមួយសប្តាហ៍មកហើយ។
តុលាការរុស្ស៊ីបានឯកភាពទៅតាមសំណើរបស់រដ្ឋអាជ្ញាក្រុងមូស្គូ និងបានសម្រេចបិទបណ្តាញសង្គមដ៏ល្បីល្បាញទាំងពីររបស់អាមេរិកជុំវិញរឿងប្រព្រឹត្តសកម្មភាពជ្រុលនិយម។ សកម្មភាពជ្រុលនិយមនេះគឺរុស្ស៊ីចង់សំដៅដល់គោលការណ៍របស់ក្រុមហ៊ុនមេតាដែលអនុញ្ញាតឲ្យមានការបញ្ចេញមតិ ស្អប់ខឹង ឬប្រឆាំងរុស្ស៊ីរឿងធ្វើសង្គ្រាមនៅអ៊ុយក្រែន។
ក្រុមហ៊ុនមេតានៅមិនទាន់ចេញមុខនិយាយអ្វីមួយមាត់នោះទេ។ ហើយនៅថ្ងៃចន្ទម្សិលមិញនេះ គេហទំព័រព័ត៌មានរបស់បារាំងមួយទៀតឈ្មោះថា Euronews ក៏ត្រូវអាជ្ញាធររុស្ស៊ីបិទដែរ។ វិធានការនេះធ្វើឡើងដោយស្របទៅតាមសំណើរបស់ការិយាល័យរដ្ឋអាជ្ញារុស្ស៊ីដូចគ្នា។
យ៉ាងណាក៏ដោយ រុស្ស៊ីមិនបានបញ្ជាក់ប្រាប់នោះទេពីមូលហេតុដែលនាំឈានទៅដល់ការបិទគេហទំព័រ Euronews។ ស្រដៀងគ្នានេះ កាលពីដើមខែមីនា រុស្ស៊ីក៏បានបិទមិនឲ្យគេចូលមើលគេហទំព័រព័ត៌មាន BBC របស់អង់គ្លេសបានឡើយ។ ចំណាត់ការជាបន្តបន្ទាប់គ្នានេះ ធ្លាក់មកស្របពេលដែលក្រសួងការបរទេសរុស្ស៊ីព្រមានចាត់វិធានការសងសឹកប្រឆាំងនឹងប្រព័ន្ធផ្សព្វផ្សាយទាំងឡាយណា ដែលដើរផ្ទុយនឹងផលប្រយោជន៍របស់ក្រេមឡាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ