ប៊ូតឆា៖ ភស្តុតាងកាន់តែច្រើន បញ្ជាក់ពីការសម្លាប់រង្គាលលើប្រជាជនស៊ីវីល ពីសំណាក់ទាហានរុស្ស៊ី
សាកសពប្រជាជនស៊ីវីលអ៊ុយក្រែន ជាង៤០០នាក់ ដែលត្រូវគេប្រទះឃើញនៅក្រុងប៊ូតឆា ភាគពាយ័ព្យរដ្ឋធានីកៀវ កំពុងតែបង្កើតជាចំណោទចោទសួរជាខ្លាំង ថាតើវាជាអំពើបាញ់សម្លាប់ ដ៏សាហាវព្រៃផ្សៃ ដោយឥតរើសមុខ របស់កងទ័ពរុស្ស៊ី ទៅលើប្រជាជនស្លូតត្រង់អ៊ុយក្រែន ឬយ៉ាងណា!
ចុះផ្សាយនៅថ្ងៃ៖
ភាគីរុស្ស៊ីបានបដិសេធច្រានចោលទាំងស្រុង ថាវាជាឆាកល្ខោន រៀបចំដោយអ៊ុយក្រែន និងអាមេរិក ព្រោះថាកងទ័ពរុស្ស៊ីបានចាកចេញពីតំបន់នោះ តាំងតែពីថ្ងៃទី៣០មីនាម្លេះ ហើយហេតុអ្វី បានជាទើបតែដល់ថ្ងៃទី៣មេសា ទើបភាគីអ៊ុយក្រែនផ្សព្វផ្សាយរូបភាពទាំងនេះ។
តែយ៉ាងណា កាសែត New York Times បានចុះផ្សាយវីដេអូមួយនៅថ្ងៃនេះ ដែលគេប្រៀបធៀបរូបភាពសាកសពនៅតាមផ្លូវ ទៅនឹងរូបភាព ថតដោយផ្កាយរណបនៅថ្ងៃទី១៩មីនា។ គេឃើញថា សាកសពទាំងនោះ ពិតជាដេកស្លាប់រាយប៉ាយនៅតាមផ្លូវ តាំងតែពីថ្ងៃទី១៩មីនាម្លេះ។ អ្នកនាំពាក្យឧត្តមស្នងការសិទ្ធិមនុស្សបានលើកឡើងថា គេត្រូវការពេលវេលាដើម្បីស៊ើបអង្កេតម៉ដ្ឋចត់ តែសម្រាប់ពេលនេះ អ្វីៗហាក់បង្ហាញឲ្យឃើញកាន់តែច្បាស់ហើយ ថាប្រជាជនស៊ីវីលអ៊ុយក្រែននៅប៊ូតឆា ប្រហែលជាត្រូវបានគេបាញ់សម្លាប់រង្គាលពិតមែន។
បុរសជនជាតិអ៊ុយក្រែនម្នាក់ នៅក្រុងប៊ូតឆា ដែលនៅរួចជីវិត បានផ្តល់បទសម្ភាសន៍ឲ្យអ្នកយកព័ត៌មានបារាំង កាលពីថ្ងៃម្សិលមិញ ដោយលោកបានអះអាងថា លោកបានឃើញនឹងភ្នែក នូវសកម្មភាពរបស់ទាហានរុស្ស៊ី បាញ់រះឆៅៗ សម្លាប់ប្រជាជនស្លូតត្រង់នៅប៊ូតឆា។ សាក្សីម្នាក់នេះ បានទាំងអះអាងទៀតថា ខ្លួនបានចូលរួម ប្រមូលសាកសពខ្លះ យកទៅកប់ថែមទៀតផង៖
សម្តីសក្ខីកម្ម របស់លោក Mykola Zakharchenko ស្តីពីការសម្លាប់រង្គាលនៅក្រុងប៊ុតឆា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ