រុស្ស៊ីប្រកាសពីការបាញ់សាកល្បងដោយជោគជ័យនូវគ្រាប់មីស៊ីលបាលីស្ទិកអន្តរទ្វីបថ្មី « RS-28 Sarmat »
នៅថ្ងៃពុធ ទី២០ មេសា ប្រទេសរុស្ស៊ីបានប្រកាសពីការបាញ់សាកល្បងលើកទី១ ដោយជោគជ័យនូវគ្រាប់មីស៊ីលបាលីស្ទិកអន្តរទ្វីបថ្មីឈ្មោះ « RS-28 Sarmat »។ គ្រាប់មីស៊ីលថ្មី « Sarmat » នេះត្រូវចូលទៅជំនួសគ្រាប់មីស៊ីល « SS-18 Satan » និងអាចជាចម្លើយមួយរបស់រុស្ស៊ីដើម្បីតបនឹងកម្មវិធីកងទ័ពអាមេរិកក្រោមឈ្មោះ « Prompt Global Strike »។ តែក្រសួងការពារជាតិអាមេរិកបានថ្លែងថា ការបាញ់សាកល្បងគ្រាប់មីស៊ីលថ្មីរបស់រុស្ស៊ីពេលនេះមិនបង្កការគំរាមកំហែងដល់អាមេរិក និងសម្ព័ន្ធមិត្តរបស់អាមេរិកទេ។
ចុះផ្សាយនៅថ្ងៃ៖
ស្តាប់ - ០២:១០
« RS-28 Sarmat » ជាអាវុធសម័យថ្មី និងជាគ្រាប់មីស៊ីលបាលីស្ទិកអន្តរទ្វីបប្រភេទថ្មីដែលប្រហែលគ្មានគូប្រៀបលើលោក នេះបើតាមប្រធានាធិបតីរុស្ស៊ីលោកវ្ល៉ាឌីមៀរ ពូទីន។ ជាមួយនឹងគ្រាប់មីស៊ីលបាលីស្ទិកអន្តរទ្វីបប្រភេទថ្មីនេះ គេអាចបំពាក់ក្បាលនុយក្លេអ៊ែរជាច្រើនក្នុងពេលតែមួយ និងដែលក្បាលនុយក្លេអ៊ែរនីមួយៗមានផ្ទាំងស៊ីបខុសៗគ្នា ពោលមិនសំដៅលើផ្ទាំងស៊ីបតែមួយទេ។ « RS-28 Sarmat » ដែលត្រូវបានរុស្ស៊ីបាញ់សាកល្បងលើកទី១ ពីតំបន់ប៉ែកពាយ័ព្យប្រទេសបានធ្លាក់ចំផ្ទាំងស៊ីបនៅចុងបូព៌ាប្រទេសដែលមានចម្ងាយ ៥ ០០០គីឡូម៉ែត្រពីទីតាំងបាញ់ចេញ។
តែគ្រាប់មីស៊ីលបាលីស្ទិកអន្តរទ្វីបប្រភេទថ្មីរបស់រុស្ស៊ីដែលមានទម្ងាន់ជាង ២០០តោននេះអាចបាញ់បានចម្ងាយដល់ទៅជាង ១១ ០០០គីឡូម៉ែត្រ។ លោកពូទីនបានថ្លែងតាមទូរទស្សន៍ដោយពន្យល់បកស្រាយថា គ្រាប់មីស៊ីលបាលីស្ទិកអន្តរទ្វីបប្រភេទថ្មីរបស់រុស្ស៊ីនឹងធានាសន្តិសុខរុស្ស៊ីប្រឈមនឹងការគំរាមកំហែងពីខាងក្រៅ និងធ្វើឲ្យអ្នកដែលព្យាយាមគំរាមកំហែងរុស្ស៊ីពិចារណាចំនួន ២ដង។ តាមលោកពូទីន គ្មានប្រព័ន្ធប្រឆាំងដែនអាកាសទំនើបណាមួយអាចស្ទាក់ចាប់ « RS-28 Sarmat »បានទេ។
យ៉ាងណាក៏ដោយ រុស្ស៊ីនឹងបន្តធ្វើការសាកល្បងគ្រាប់មីស៊ីលប្រភេទថ្មីរបស់ខ្លួនជាបន្តទៀត មុននឹងដាក់បញ្ចូលទៅក្នុងកម្លាំងអាវុធយុទ្ធសាស្រ្តរុស្ស៊ីនាពេលខាងមុខ។ ទោះជាយ៉ាងនេះក្តី ការបាញ់សាកល្បងគ្រាប់មីស៊ីល « RS-28 Sarmat » លើកដំបូងនេះមិនបានធ្វើឲ្យអាមេរិកភ្ញាក់ផ្អើលឡើយ ព្រោះរុស្ស៊ីបានជូនដំណឹងអាមេរិកជាមុន។ ទង្វើរបស់ក្រុងមូស្គូនេះមិនមែនជាការគួរសម ឬជាការឌឺដងដាក់ក្រុងវ៉ាស៊ីនតោនទេ តែជាកាតព្វកិច្ចដែលមានចែងនៅក្នុងសន្ធិសញ្ញាស្តីពីនុយក្លេអ៊ែរ។ ចំណែកក្រសួងការពារជាតិអាមេរិកបានថ្លែងថា ការសាកល្បងគ្រាប់មីស៊ីល « RS-28 Sarmat » របស់រស្ស៊ីនេះមិនបង្កការគំរាមកំហែងដល់អាមេរិក និងក្រុមសម្ព័ន្ធមិត្តរបស់អាមេរិកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ