របាយការណ៍មួយព្រមានពីកង្វះលោហៈធាតុនៅសហភាពអឺរ៉ុប
លីចូម នីកែល ... សហភាពអឺរ៉ុបត្រូវរៀបចំ ស្វែងរកប្រភពផ្គត់ផ្គង់លោហៈធាតុឲ្យបានឆាប់រហ័ស បើចង់សម្រេចផែនការធ្វើអន្តរកាលថាមពលស្អាត។ បើពុំនោះទេ សហភាពអឺរ៉ុប នឹងត្រូវជួបការលំបាកខ្លាំង ហើយលែងមានស្វ័យភាព ក្នុងវិស័យមួយចំនួនដូចជាអាកាសធាតុ ចាប់ពីឆ្នាំ២០៣០ទៅ។ នេះបើរបាយការណ៍មួយចេញផ្សាយក្នុងថ្ងៃចន្ទ ទី២៥ មេសា ដែលព្រមានពីកង្វះលោហៈនៅក្នុងសហភាពអឺរ៉ុប។
ចុះផ្សាយនៅថ្ងៃ៖
គិតត្រឹមថ្ងៃនេះ ដើម្បីធ្វើអន្តរកាលថាមពល ឈប់ប្រើប្រេងសាំង/ម៉ាហ្សូត និងដើម្បីសម្រេចអព្យាក្រឹតកាបោន នៅឆ្នាំ២០៥០បាន សហភាពអឺរ៉ុបត្រូវការមានលោហៈធាតុ ច្រើនជាងមុនខ្លាំងស្ទើរគ្រប់មុខ ៖ សារធាតុលីចូម ៣៥% អាលុយមីញ៉ូម ៣៣% និងរ៉ែកូបាលត៍ ដែលជាលោហៈខ្វះមិនបានសម្រាប់ផលិតយានយន្តអគ្គីសនី ដល់ទៅ៣៣០%លើសពេលបច្ចុប្បន្ន។ នេះបើតាមការគណនារបស់អ្នកស្រាវជ្រាវនៃសាកលវិទ្យាល័យ KU Leuven សម្រាប់សមាគមអ្នកផលិតលោហៈអឺរ៉ុប។
បើតាមការប៉ាន់ស្មានរបស់ក្រុមអ្នកស្រាវជ្រាវអឺរ៉ុបនេះដដែល អឺរ៉ុបក៏នឹងត្រូវការរ៉ែកម្រ ដល់ទៅ២៦ដង ព្រមទាំងនីកែលទ្វេដង ស៊ីលីចូម៤៥% សង្កស័១០ទៅ១៥% ទង់ដែង៣៥% ច្រើនជាងពេលនេះទៀត។ ប៉ុន្តែ អឺរ៉ុប អាចបំពេញសេចក្តីត្រូវការរបស់ខ្លួនបានពី៤០ទៅ៧០% ចាប់ពីឆ្នាំ២០៥០ទៅ ដោយសារការកែច្នៃប្រើឡើងវិញ។ នេះប្រសិនបើអឺរ៉ុបចាប់ធ្វើវិនិយោគហេថារចនាសម្ព័ន្ធកែច្នៃប្រើថ្មី ភ្លាម។
ក្នុងពេលរង់ចាំ និងក្នុងរយៈពេល១៥ខាងមុខនេះ ការធ្វើអន្តរកាលថាមពលស្អាតអឺរ៉ុបប្រឈមនឹងភាពខ្វះខាតខ្លាំងណាស់។ ដូច្នេះអឺរ៉ុបត្រូវរួសរាន់រៀបចំយុទ្ធសាស្ត្រច្បាស់លាស់ រកប្រភពផ្គត់ផ្គង់បង្កើនស្តុកលោហៈសម្រាប់ពេលយូរ ភ្លាម ជាពិសេស គឺសារធាតុ លីចូម កូបាល់ត៍ នីកែល ទង់ដែង និងរ៉ែកម្រ បើអឺរ៉ុបមិនចង់ជួបស្ថានភាពរស់រំពឹងដង្ហើមគេទៀត។ បច្ចុប្បន្ន អឺរ៉ុបរំពឹងយ៉ាងខ្លាំងលើការនាំចូលរ៉ែ នីកែល ទង់ដែង និងអាលុយមីញ៉ូមពីរុស្ស៊ី។ ហើយ១០ឆ្នាំខាងមុខ ចិន និងឥណ្ឌូណេស៊ី នឹងគ្រប់គ្រងទីផ្សារចម្រាញ់លោហៈដើម្បីធ្វើអាគុយហើយ។ ដូច្នេះអឺរ៉ុបត្រូវភ្ជាប់ខ្លួនទៅនឹងអ្នកផ្គត់ផ្គង់មានទំនួលខុសត្រូវសម្រាប់សង្គមនិងបរិស្ថាន។
បើតាមម្ចាស់របាយការណ៍ដដែល ដែនដីអឺរ៉ុបក៏មានបង្កប់រ៉ែសម្រាប់ឆ្លើយតបនឹងសេចក្តី ត្រូវការបានដល់ទៅប្រមាណពី ៥ទៅ៥៥% និងត្រូវគិតគូរបើកដំណើរការរោងចក្រចម្រាញ់រ៉ែឡើងវិញដែរបើទោះបីកំពុងប្រឈមនឹងវិបត្តិប្រេងឡើងថ្លៃក៏ដោយ។
របាយការណ៍របស់អ្នកស្រាវជ្រាវអឺរ៉ុបនេះមានអត្ថន័យដូចការព្រមានរបស់ទីភ្នាក់ងារថាមពលអន្តរជាតិ កាលពីឆ្នាំ២០២១ ជំរុញឱ្យពិភពលោករៀបចំយុទ្ធសាស្ត្របែងចែងធនធានរ៉ែដែលកកផ្តុំក្នុងតែប្រទេសមួយក្តាប់តូច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ