រុស្ស៊ីផ្អាកការលក់ភ្លើងអគ្គិសនីឲ្យហ្វាំងឡង់ ខណៈដែលហ្វាំងឡង់ត្រៀមដាក់បេក្ខភាពចូលអូតង់
នៅក្នុងប្រទេសហ្វាំងឡង់ ក្រុមហ៊ុនគ្រប់គ្រងបណ្តាញអគ្គិសនី Fingrid បានប្រកាសឲ្យដឹងក្នុងថ្ងៃសៅរ៍ ទី១៤ ឧសភាថា ក្រុមហ៊ុននាំភ្លើងអគ្គិសនីរុស្ស៊ី RAO Nordic បានផ្អាកការនាំភ្លើងអគ្គិសនីចូលហ្វាំងឡង់តាំងពីរំលងអធ្រាត្រយប់ថ្ងៃសុក្រ ទី១៣ឆ្លងចូលថ្ងៃសៅរ៍ ទី១៤ ឧសភា។ តាមក្រុមហ៊ុន RAO Nordic ការផ្អាកនេះមកពីហ្វាំងឡង់មិនបានបង់លុយតាំងពីថ្ងៃទី៦ ឧសភា។ តែគេក៏មិនត្រូវភ្លេចនិយាយទេថា ទំនាក់ទំនងរវាងរុស្ស៊ី និងហ្វាំងឡង់បានឡើងតានតឹងខ្លាំងនៅក្រោយហ្វាំងឡង់បានបង្ហាញពីជំហរចង់ចូលអូតង់។
ចុះផ្សាយនៅថ្ងៃ៖
ស្តាប់ - ០២:១៤
ចាប់ពីថ្ងៃសៅរ៍ ទី១៤ ឧសភានេះទៅ ហ្វាំងឡង់លែងមានភ្លើងអគ្គីសនីរុស្ស៊ីប្រើប្រាស់ទៀតឡើយដោយក្រុមហ៊ុននាំភ្លើងអគ្គិសនីរុស្ស៊ី RAO Nordic បានផ្អាកការលក់ទៅឲ្យហ្វាំងឡង់។ តាមក្រុមហ៊ុន RAO Nordic គឺមកពីហ្វាំងឡង់មិនបានបង់លុយតាំងពីថ្ងៃទី៦ ឧសភា។ តែ RAO Nordic មិនបានបញ្ជាក់ទេថា ហេតុអ្វីបានជាហ្វាំងឡង់ខកខានមិនបានបង់លុយ និងថា តើការមិនបានបង់លុយរបស់ហ្វាំងឡង់នេះមានជាប់ពាក់ព័ន្ធនឹងទណ្ឌកម្មអឺរ៉ុបដាក់លើរុស្ស៊ីក្នុងសង្រ្គាមរុស្ស៊ីឈ្លានពានអ៊ុយក្រែន ឬអត់?។ យ៉ាងណាក៏ដោយ ក្រុមហ៊ុន RAO Nordic សង្ឃឹមមានស្ថានការណ៍ប្រសើរឡើងវិញនាពេលខាងមុខ ពិសេសសង្ឃឹមផ្គត់ផ្គង់ភ្លើងអគ្គិសនីទៅហ្វាំងឡង់ជាថ្មីនាពេលឆាប់ៗ។
ចំណែកក្រុមហ៊ុនគ្រប់គ្រងភ្លើងអគ្គិសនីហ្វាំងឡង់ Fingrid មិនបានធ្វើអត្ថាធិប្បាយអ្វីលើការសម្រេចចិត្តរបស់ក្រុមហ៊ុន RAO Nordic ទេ និងបានបញ្ជាក់ថា ភ្លើងអគ្គិសនីប្រើប្រាស់នៅហ្វាំងឡង់សព្វថ្ងៃបានទិញពីរុស្ស៊ីមិនដល់ ១០% ផង។ តាម Fingrid ហ្វាំងឡង់អាចជំនួសភ្លើងអគ្គិសនីរុស្ស៊ីដោយទិញបន្ថែមពីប្រទេសជិតខាងស៊ុយអែត និងន័រវែស។ « វានឹងមិនជួបការលំបាកទេ » នេះជាការថ្លែងរបស់លោក Timo Kaukonen អ្នកទទួលខុសត្រូវម្នាក់របស់ Fingrid។ តាមលោក Timo Kaukonen ហ្វាំងឡង់បានត្រៀមខ្លួនទុកជាមុនដោយបានកាត់បន្ថយការនាំចូលភ្លើងអគ្គិសនីពីរុស្ស៊ីក្នុងខែមេសាពីចំនួន ១ ៣០០មេហ្កាវ៉ាត់មកនៅត្រឹមចំនួន ៩០០មេហ្កាវ៉ាត់។
បើតាមមើលទៅ ការដែលរុស្ស៊ីផ្អាកលក់ភ្លើងអគ្គិសនីឲ្យហ្វាំងឡង់ក្រោមហេតុផលហ្វាំងឡង់មិនបានបង់លុយគ្រាន់ជាលេសមួយប៉ុណ្ណោះ។ តាមពិត រុស្ស៊ីកំពុងមិនសប្បាយចិត្តដែលឃើញហ្វាំងឡង់ត្រៀមខ្លួនចូលអូតង់។ ក្នុងថ្ងៃព្រហស្បតិ៍ ទី១២ ឧសភា ប្រធានាធិបតី និងនាយករដ្ឋមន្រ្តីហ្វាំងឡង់ចង់ឃើញហ្វាំងឡង់ចូលអូតង់ឆាប់ៗ។ តែរុស្ស៊ីបានបញ្ចេញប្រតិកម្មជាចំហថា ហ្វាំងឡង់នៅក្នុងអូតង់ជាការគំរាមកំហែងលើរុស្ស៊ី និងថា រុស្ស៊ីចាំបាច់ត្រូវចាត់វិធានការតបវិញដើម្បីធានាសន្តិសុខរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ