សភាអាល្លឺម៉ង់អនុម័តច្បាប់បង្កើតថវិកាកងទ័ពពិសេស ជាង ១០០ពាន់លានអឺរ៉ូ
អាល្លឺម៉ង់ធ្វើកំណែទម្រង់រដ្ឋធម្មនុញ្ញ ដើម្បីកសាងសមត្ថភាពកងទ័ពរបស់ខ្លួនឡើងវិញ។ នៅថ្ងៃសុក្រទី ៣មិថុនាម្សិលមិញ សភាជាន់ទាបអាល្លឺម៉ង់ Bundestag បានបោះឆ្នោតអនុម័តកំណែទម្រង់រដ្ឋធម្មនុញ្ញ ដែលបើកផ្លូវឲ្យគេបង្កើតថវិកាពិសេស ១០០ពាន់លានអឺរ៉ូ សម្រាប់ធ្វើទំនើបកម្មកងទ័ពអាល្លឺម៉ង់ នៅចំពោះមុខការគំរាមកំហែងរបស់រុស្ស៊ី។ ម៉ូស្គូ តាមរយៈ អ្នកនាំពាក្យរបស់ក្រសួងការបរទេស បានចោទប្រកាន់អាល្លឺម៉ង់កំពុងដើរលើផ្លូវយោធា និងប្រើពាក្យដែលធ្វើឲ្យគេនឹកឃើញដល់របបណាហ្ស៊ីអាល្លឺម៉ង់ កាលពីអតីតកាល។
ចុះផ្សាយនៅថ្ងៃ៖
ស្តាប់ - ០២:២១
ជាមួយសំឡេងគាំទ្រភាគច្រើន (២ភាគ៣នៃសំឡេងសរុប) រដ្ឋសភាអាល្លឺម៉ង់បោះឆ្នោតអនុម័តកំណែទម្រង់រដ្ឋធម្មនុញ្ញ ដែលអនុញ្ញាតឲ្យគេបង្កើតមូលនិធិពិសេស ១០០ពាន់លានអឺរ៉ូ សម្រាប់ធ្វើទំនើបកម្មវិស័យការពារជាតិអាល្លឺម៉ង់។
ភ្លើងខៀវរបស់រដ្ឋសភាអាល្លឺម៉ង់ ឆ្លើយតបទៅនឹងការសន្យារបស់លោកនាយករដ្ឋមន្រ្តី អូឡាហ្វ ស្ហុល៍ ដែលថា អាល្លឺម៉ង់នឹងក្លាយជាប្រទេសអឺរ៉ុបដែលមានកម្លាំងទ័ពខ្លាំងជាងគេ នៅក្នុងសម្ព័ន្ធអាត្លង់ទិកអូតង់។ នៅចំពោះមុខការគំរាមកំហែងសន្តិសុខ ក្រោយរុស្ស៊ីធ្វើសង្រ្គាមឈ្លានពានអ៊ុយក្រែន នាយករដ្ឋមន្រ្តីអាល្លឺម៉ង់ធ្លាប់បានប្រកាស កាលពីចុងខែកុម្ភៈថា នឹងបង្កើតកញ្ចប់ថវិកាពិសេស ១១៣ពាន់លានអឺរ៉ូ សម្រាប់កសាងសមត្ថភាពកងទ័ព និងបង្កើនថវិកាការពារជាតិ ឲ្យដល់ ២% នៃផលិតផលក្នុងស្រុកសរុប ទៅតាមការទាមទាររបស់អូតង់។
ដើម្បីបង្កើតមូលនិធិកងទ័ពពិសេស ១០០ពាន់លានអឺរ៉ូ អាល្លឺម៉ង់ត្រូវការខ្ចីប្រាក់បំណុលបន្ថែម។ ដូច្នេះដើម្បីជៀសរួចផុតពីសំណាញ់ច្បាប់រឹតបន្តឹងថវិកាដែលមានគោលដៅកាត់បន្ថយ ប្រាក់បំណុលសាធារណៈ រដ្ឋាភិបាលអាល្លឺម៉ង់ ត្រូវការចាំបាច់ការធ្វើកំណែទម្រង់រដ្ឋធម្មនុញ្ញ។
ថ្លែងទៅកាន់សមាជិកសភាកាលពីថ្ងៃសុក្រ ប្រមុខការបរទេសអាល្លឺម៉ង់ លោកស្រី Annalena Baekbock បាននិយាយថា “នេះជាពេលវេលាដែលអាល្លឺម៉ង់អាចនិយាយថា អាល្លឺម៉ង់នៅទីនេះ នៅពេលអឺរ៉ុបត្រូវការអាល្លឺម៉ង់”។
សម្រាប់អាល្លឺម៉ង់ ដែលជាប្រទេសមានសេដ្ឋកិច្ចនាំមុខគេ នៅអឺរ៉ុប កញ្ចប់ថវិកាពិសេសសម្រាប់កងទ័ពនឹងជួយឲ្យអាល្លឺម៉ង់អាចការពារទឹកដី និងគោរពករណីយកិច្ចរបស់ខ្លួន ក្នុងនាមជាសមាជិករបស់អូតង់។
មួយផ្នែកធំនៃកញ្ចប់ថវិកាពិសេស ដែលស្មើនឹង៤០,៩ពាន់លានអឺរ៉ូ នឹងត្រូវគេប្រើ សម្រាប់កងទ័ពជើងអាកាស ដូចជាការទិញ យន្តហោះចម្បាំង អាមេរិកាំង និងអឺរ៉ុប ចំនួន៣៥គ្រឿង ឧទ្ធម្ភាគចក្រធុនធ្ងន់ Chinook របស់ប៊ូអីង ៦០គ្រឿង។ ២០ពាន់លានដុល្លារសម្រាប់កងទ័ពជើងទឹក ចំណែក ១៦ពាន់លានដុល្លារសម្រាប់កងទ័ពជើងគោក ជាមួយការទិញបន្ថែម រថក្រោះ ជាច្រើនគ្រឿង។
ជាមួយថវិកាកងទ័ពពិសេស ១០០ពាន់លានអឺរ៉ូ អាល្លឺម៉ង់ ជាប្រទេសធំទី៣ក្នុងលោក បន្ទាប់ពីអាមេរិក និងចិន ដែលបានបោះទុនវិនិយោគ ដ៏ច្រើនសម្បើមទៅលើវិស័យកងទ័ព។ នៅថ្ងៃសុក្រ អ្នកនាំពាក្យរបស់ក្រសួងការបរទេសរុស្ស៊ី លោកស្រី Maria Zakharova បានប្រតិកម្មភ្លាម ដោយថា ការសម្រេចបោះឆ្នោត របស់រដ្ឋសភាអាល្លឺម៉ង់បានបញ្ជាក់ថា អាល្លឺម៉ង់ កំពុងធ្វើយោធូបនីយកម្ម។ ដោយនិយាយយោងដល់របបណាហ្ស៊ី អាល្លឺម៉ង់ អ្នកនាំពាក្យរបស់ក្រសួងការបរទេសរុស្ស៊ី បានបន្ថែមថា ជាមួយបទពិសោធន៍ពីអតីតកាល គេដឹងហើយថា តើការធ្វើយោធូបនីយកម្មរបស់អាល្លឺម៉ង់បានបញ្ចប់ដោយរបៀបណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ