លោកម៉ាក្រុង៖រុស្ស៊ីមិនអាច និងមិនត្រូវឈ្នះសង្រ្គាមនៅអ៊ុយក្រែនទេ
កិច្ចប្រជុំកំពូលរយៈពេល ៣ថ្ងៃនៃក្រុមប្រទេស G៧ បានបិទបញ្ចប់នៅថ្ងៃអង្គារ ទី២៨ មិថុនា។ ថ្លែងនៅក្នុងសន្និសីទកាសែត ប្រធានាធិបតីបារាំងលោកអេម៉ានុយអែល ម៉ាក្រុងបានលើកឡើងពីវិបត្តិស្បៀង វិបត្តិថាមពល និងបានបរិហារលើឧក្រិដ្ឋកម្មសង្រ្គាមរបស់រុស្ស៊ីនៅអ៊ុយក្រែន។ នៅក្នុងរឿងប្រេង និងឧស្ម័នឡើងថ្លៃត្រូវបានលោកម៉ាក្រុងចោទក្រុមប្រទេសផលិត និងក្រុមអ្នកក្រឡុកហាងឆេងថាជាក្រុមឆ្លៀតឱកាសនិយមកេងចំណេញពីសង្រ្គាមនៅអ៊ុយក្រែន។ បន្ទាប់មក លោកម៉ាក្រុងបានបកស្រាយលើសំណូមពររបស់ប្រធានាធិបតីអ៊ុយក្រែនលោកហ្សេឡេនស្គីចំពោះ G៧ និងការលើកឡើងរបស់ប្រធានាធិបតីរុស្ស៊ីលោកពូទីន។ តាមលោកម៉ាក្រុង រុស្ស៊ីមិនអាច និងមិនត្រូវឈ្នះសង្រ្គាមនៅអ៊ុយក្រែនទេ។
ចុះផ្សាយនៅថ្ងៃ៖
ស្តាប់ - ០២:៣០
« ជាដំបូង ខ្ញុំគិតថា គេត្រូវសាទរពីការប្តេជ្ញាចិត្ត និងភាពក្លាហានរបស់ប្រធានាធិបតីអ៊ុយក្រែន ក្រុមអ្នកទទួលខុសត្រូវទាំងអស់ ប្រជាជន និងទាហានអ៊ុយក្រែន។ ថ្លែងតាមវីដេអូទៅកាន់ក្រុមប្រទេស G៧ ប្រធានាធិបតីអ៊ុយក្រែនលោកហ្សេឡេនស្គីចង់ឃើញសង្រ្គាមបិទបញ្ចប់នៅដំណាច់ឆ្នាំ។ ដូចអស់លោកដឹងស្រាប់ហើយ សង្រ្គាមមួយនេះបានកើតមាន ៤ខែមកហើយ។
ដំណាច់ឆ្នាំនៅឆ្ងាយនៅឡើយ ហើយយើងពិតជាអាចយល់បានពីរយៈពេលនេះ មានន័យថាមិនមែនថ្ងៃស្អែកទេ។ គ្មានអ្នកណាម្នាក់អាចមើលឃើញថា សង្រ្គាមមួយនេះបិទបញ្ចប់នៅប៉ុន្មានសប្តាហ៍ ឬប៉ុន្មានខែខាងមុខនេះទេ។ ខ្ញុំសង្ឃឹម ខ្ញុំសង្ឃឹមយ៉ាងមុតមាំថា ច្រកចេញពីសង្រ្គាមអាចនឹងទទួលបាននៅដំណាច់ឆ្នាំ។ តែអ្វីដែលច្បាស់ រុស្ស៊ីមិនអាច និងមិនត្រូវឈ្នះសង្រ្គាមនៅអ៊ុយក្រែនឡើយ។
ទាក់ទងនឹងការលើកឡើងរបស់ប្រធានាធិបតីរុស្ស៊ីពូទីន គាត់បានបកស្រាយយ៉ាងច្បាស់លើអ្វីដែលខ្ញុំធ្លាប់បាននិយាយច្រើនដង។ តាមរយៈការលើកឡើងនេះ ពូទីនបានទម្លាយចេញនូវការលាក់លៀមដែលគាត់ខ្លួនឯងបានរក្សាទុកជាយូរតាំងពីជម្លោះបានចាប់ផ្តើមដំបូង។ អស់លោកមាននៅចាំទេ នៅពេលដែលមានកិច្ចចរចាត្រូវបានរៀបចំឡើងនៅព្រំដែនជាមួយប្រទេសបេឡារុស។
កាលណោះយើងមានអារម្មណ៍ថា ពូទីនចង់ចរចា។ ឥឡូវនេះគឺច្បាស់ហើយ ការឈ្លានពានអ៊ុយក្រែនពីសំណាក់រុស្ស៊ីមានគោលដៅមួយ គឺទាមទារឲ្យអ៊ុយក្រែនទម្លាក់អាវុធចុះចាញ់។ នេះគេមិនហៅថាជាការចរចាទេ។
ដូច្នេះយើង យើងនឹងបន្តដាក់ទណ្ឌកម្មប្រឆាំងរុស្ស៊ី។ យើងនឹងបន្តគាំទ្រប្រទេស និងប្រជាជនអ៊ុយក្រែនរហូតទទួលបានជ័យជំនះទាំងស្រុងតាមផ្លូវអាវុធ ឬមួយក៏ទទួលបានលទ្ធភាពនៃកិច្ចចរចាដែលអ៊ុយក្រែនចង់បាន និងតាមលក្ខខណ្ឌទាមទាររបស់អ៊ុយក្រែន។ គ្មានជម្រើសផ្សេងដែលក្រុម G៧ ឬបារាំងគាំទ្រទេ។ ខ្ញុំមើលឃើញថា អ្វីដែលពូទីនបានលើកឡើងគឺគ្មានអ្វីក្រៅពីការបំភិតបំភ័យជាថ្មីទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ