រុស្ស៊ីឈានទៅបង្កើតច្បាប់ដើម្បីជួយទ្រទ្រង់កងទ័ព នៅក្នុងសង្រ្គាមអ៊ុយក្រែន
សភាឌូម៉ាអនុម័តសេចក្តីព្រាងច្បាប់ស្តីពីសេដ្ឋកិច្ចនៃយុគសង្រ្គាម។ នៅក្នុងអង្គសភា កាលពីថ្ងៃអង្គាទី ៥កក្កដា អ្នកតំណាងរាស្រ្តរុស្ស៊ីបានលើកដៃ ភ្លាមភ្លែត គាំទ្រសេចក្តីព្រាងច្បាប់ពីរដែលអនុញ្ញាត បើកផ្លូវឲ្យរដ្ឋាភិបាលរុស្ស៊ីចាត់វិធានការសេដ្ឋកិច្ចពិសេស ដើម្បី គាំទ្រប្រតិបត្តិការទ័ពរុស្ស៊ី នៅទឹកដីអ៊ុយក្រែន។ នៅក្នុងសង្រ្គាមឈ្លានពានអ៊ុយក្រែនជាង៤ខែមកនេះ រុស្ស៊ីបានចំណាយកម្លាំងទ័ព និងសព្វាវុធច្រើនសន្ធឹកសន្ធាប់ ប៉ុន្តែ អាចរំកិលចូលកាន់កាប់ទឹកដីមួយផ្នែកតូចរបស់អ៊ុយក្រែន។ អ៊ុយក្រែនដែលចាប់ទទួលសព្វាវុធទំនើបៗពីប្រទេសលោកខាងលិច ដើម្បីទប់ទល់នឹងកងទ័ពរុស្ស៊ី។
ចុះផ្សាយនៅថ្ងៃ៖
សេចក្តីព្រាងច្បាប់ថ្មីទាំងពីរដែលសមាជិកសភារុស្ស៊ីអនុម័តគាំទ្រ កាលពីថ្ងៃអង្គារ មានចែងពីការផ្តល់សិទ្ធិដល់រដ្ឋាភិបាល ក្នុងការចាប់តម្រូវឲ្យក្រុមហ៊ុនឯកជនត្រូវតែផ្គត់ផ្គង់ទំនិញ វត្ថុធាតុដើម និងបុគ្គលិករបស់ខ្លួន សម្រាប់គាំទ្រសកម្មភាពធ្វើសង្រ្គាមរបស់រុស្ស៊ីនៅអ៊ុយក្រែន។ តាមរយៈសេចក្តីព្រាងច្បាប់ទាំងពីរ រុស្ស៊ីចាប់ផ្តើមអនុវត្តរបបសេដ្ឋកិច្ចក្នុងបរិបទសង្រ្គាម។
ជាក់ស្តែង តាមសេចក្តីព្រាងច្បាប់ទី១ ដែលស្រង់ដោយទីភ្នាក់ងារព័ត៌មានអង់គ្លេសReuters រដ្ឋអំណាចរុស្ស៊ីអាចចេញវិធានការសេដ្ឋកិច្ចពិសេស នៅក្នុងអំឡុងពេលមានប្រតិបត្តិការទ័ព ដែលនៅក្នុងនោះ ក្រុមហ៊ុនត្រូវផ្គត់ផ្គង់ទំនិញ និងសេវាទៅឲ្យកងទ័ព ទៅតាមការបញ្ជារបស់រដ្ឋាភិបាល។ កំណត់សំគាល់ដែលមានភ្ជាប់នៅក្នុងសេចក្តីព្រាងច្បាប់ បានបង្ហាញថា កងទ័ពរុស្ស៊ីត្រូវការសម្ភារៈថ្មីៗ និងការជួសជុលអាវុធ ដើម្បីអាចបន្តយុទ្ធនាការនៅអ៊ុយក្រែន។
នៅចំពោះមុខសមាជិកសភាឌូម៉ា ឧបនាយករដ្ឋមន្រ្តីរុស្ស៊ី លោក Louri Borissov បាននិយាយថា គំនិតផ្តួចផ្តើមច្បាប់ស្តីពីវិធានការសេដ្ឋកិច្ចពិសេស ធ្វើឡើង ដោយសារមានតម្រូវការចាំបាច់សម្រាប់គាំទ្រកងទ័ព នៅក្នុងកាលៈទេសៈមួយ ដែលសេដ្ឋកិច្ចរុស្ស៊ីរងការដាក់សម្ពាធដ៏ធំធេងពីសំណាក់ក្រុមប្រទេសលោកខាងលិច នៅ៤ខែមកនេះ។ ៤ខែដែលរុស្ស៊ីចាប់ផ្តើមសង្រ្គាមឈ្លានពានអ៊ុយក្រែន នៅក្រោមស្លាកឈ្មោះថា ប្រតិបត្តិការទ័ពពិសេសនៅអ៊ុយក្រែន។ “បន្ទុកលើឧស្សាហកម្មយោធារុស្ស៊ីបានកើនឡើងច្រើនអនេក។ ដូច្នេះដើម្បីធានាការផ្គត់ផ្គង់អាវុធយុទ្ធភណ្ឌសម្រាប់កងទ័ពរុស្ស៊ី គេចាំបាច់ត្រូវតែប្រើឲ្យអស់លទ្ធភាព ដើម្បីពង្រឹងវិស័យឧស្សាហកម្មយោធា។” នេះជាប្រសាសន៍របស់ឧបនាយករដ្ឋមន្រ្តីរុស្ស៊ី។
សេចក្តីព្រាងច្បាប់មួយទៀត ដែលសភាឌូម៉ាបានអនុម័តផងដែរ មានចែងពីការធ្វើកំណែទម្រង់ច្បាប់ការងារដើម្បីអនុញ្ញាតឲ្យរដ្ឋាភិបាលមានសិទ្ធិកំណត់ម៉ោងធ្វើការរបស់បុគ្គលិកក្រុមហ៊ុនដែលជាប់កាតព្វកិច្ចបម្រើការឲ្យកងទ័ពរុស្ស៊ី។ ទៅតាមសេចក្តីព្រាងច្បាប់ រដ្ឋាភិបាលមានសិទ្ធិ ចាប់តម្រូវឲ្យបុគ្គលិករបស់ក្រុមហ៊ុនទាំងនោះ ធ្វើការពេលយប់ គ្មានថ្ងៃសៅរ៍អាទិត្យ គ្មានថ្ងៃបុណ្យ និងគ្មានសិទ្ធិបានទទួលថ្ងៃឈប់ប្រចាំឆ្នាំ។ ទោះយ៉ាងណា បើតាម ឧបនាយករដ្ឋមន្រ្តីរុស្ស៊ី ការងារបន្ថែមម៉ោងនឹងមិនធ្វើឡើងក្នុងទ្រង់ទ្រាយធំ ហើយបុគ្គលិករបស់ក្រុមហ៊ុនជាប់កាតព្វកិច្ចនឹងទទួលបានប្រាក់ឧបត្ថម្ភបន្ថែម ពីលើប្រាក់ខែ។
បន្ទាប់ពីការអនុម័ត ភ្លាមៗ នៅសភាឌូម៉ា សេចក្តីព្រាងច្បាប់ទាំងពីរនឹងត្រូវសមាជិកសភា ពិភាក្សាបិទទ្វារបន្តទៀត នៅថ្ងៃពុធ មុននឹងត្រូវបញ្ជូនទៅឲ្យព្រឹទ្ធសភារុស្ស៊ីបោះឆ្នោតអនុម័ត។ បន្ទាប់មក គឺប្រធានាធិបតីរុស្ស៊ី លោកពូទីន ដែលជាអ្នកចុះហត្ថលេខា ធ្វើឲ្យច្បាប់ទាំងពីរចូលជាធរមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ